وەحی وه یوحەنا 21 - کتاب مقدس به زبان کردی جنوبی - گویش کلهوری

ئاسمان و زەوی تازه

¹ ئمجا ئاسمانیێگ تازه و زەویێگ تازه دیم، چوینکه ئاسمان یەکم و زەوی یەکم گوزیشتوی و دیتر دەریاێگ نوی.

² جا شار موقەدەس یانێ ئورشەلیم تازه دیم که له ئاسمان له لاێ خوداوه هاتیاده خوار، گورجەو کریاێگ هەرجور وەویگ که ئەڕا شویەگەێ خوەێ ڕەژیایدەو.

³ له تەختەگه، دەنگ بەرزێگ شنەفتم که وەت: «بنوڕ، جیگەێ نیشتەجێ خودا ها گەرد ئایەمیل، ئەیو وەگەردێانەو نیشتەجێ بود؛ جا ئەوانه بونه قەوم ئەیو و خودا خوەێ ها گەردێانەو و بوده خوداێ ئیانه.

⁴ ئەیو هەر ئەسرێگ له چەویلیان پاکەو کەێد. دیتر مەرگ نیه؛ و دیتر ئازیەتی و گیره و ژان هەر نیه، چوینکه چشتیل جاران گوزەریاس.»

⁵ ئمجا ئەو تەختنشینه فەرمایش کرد: «بنوڕ، گشت چشتێگ تازەوه کەم.» هەرئیجوره فەرمایش کرد: «ئیه بنویس چوینکه ئی قسیەيله شایسەێ دڵنیایی و ڕاسه.»

⁶ ئەیو وه پێم فەرمایش کرد: «وه دی هات! منم ’ئا‘ و منم ’ی‘، من سەرداڵم و من دەس ئاخرم. مه وه هەر کەسێگ تیەنی بود، له کیەنی ئاو ژیان وه پەتی دەمه پێ.

⁷ هەر کەسێگ بوێدەو، ئیه وه میراتی بەێد و مه بومه خوداێ ئەوه و ئەوه بوده کوڕ مه.

⁸ وەلێ نسیو زاورچیەیل و بی ئیمانیل و قیزهاوەریل و ئایەم کوشیل و خێزیل و جادوکەریل و بتپەرەسیل و گشت دروزنیل، دەریاچەێ گڕان وه ئاگر و گوگرده. ئیه مەرگ دویمه.»

ئورشەلیم تازه

⁹ ئمجا یەکیگ له ئەو هەفت گله فریشته که هەفت پیاڵەێ پڕ له هەفت بەڵای ئاخر داشتن، هات وه مه وەت: «بەو! مه وەوی، یانێ هاوسەر وەرکەگه نیشاند دەم.»

¹⁰ ئمجا وەناو روح خودا بردەمه ئەڕا بان کویەێ گەورا و بەرزێگ و شار موقەدەس ئورشەلیم نیشانم دا که له ئاسمان له لاێ خوداوه هاتیاده خوار.

¹¹ ئی شاره جەڵاڵ خودا داشت و دروشیانێ جور جەوایر نایابی بی، هەر جور یەشم بی و جور بلور بریقەێ هاتیاد.

¹² دیوار گەورا و بەرزێگ داشت که دوانزه دەروازه داشت و دوانزه فریشته له لاێ دەروازەێیلێ بین. وه مل هەر کام له ئەو دەروازەێیله ناو یەکیگ له دوانزه هوز بەنیئیسرائیل نویسریاوی.

¹³ سێ دەروازه له لاێ ڕوژهەڵات، سێ دەروازه له لاێ باشور، سێ دەروازه له لاێ باکور و سێ دەروازه له لاێ ڕوژئاوا بی.

¹⁴ جا دیوار شارەگه دوانزه بنەوا داشت که وه ملێانەو ناو دوانزه ڕەسول وەرکەگه نویسریاوی.

¹⁵ ئەو فریشته که وەگەردمەو قسیه کرد، میلەێگ له تەڵا وه دەسێەو بی که ئەڕا ئەنازەگیری بی تا شار و دەروازەگانێ و دیوارەگەی ئەنازەگیری بکێد.

¹⁶ شار وه شێوەێ چوارگوش بی و دریژا و پاناێ یەێ جور بی. فریشتەگه ئەو شاره وەگەرد میلەگەێ خوەێ ئەنازه گرد، که دو هەزار و چوارسەد کیلومتر بی. دریژا و پانا و بەرزای بەرابەر بی.

¹⁷ فریشتەگه دیوارەگەیشه ئەنازه گرد، وه ڕوی بەراورد ئنسانی شەس و پەنج متر بی، ئیه بەراوردی بی که فریشته وه کار بردیاد.

¹⁸ دیوار شار له یەشم درس کریاوێ و شار له تەڵای ناب بی و جور شیشه بریقەێ هاتیاد.

¹⁹ بنەواێ دیوار شار وەگەرد هەر جور جەوایرێگ ڕەنگینەو بوی. بنەواێ یەکم له یەشم بی، دویمی له لاجوەرد، سێێەمی له عەقیق چەرمگ، چوارمین له زمڕود،

²⁰ پەنجمی له عەقیق سویر، شەشمی له عەقیق ئاگرین، هەفتمی له زەبەرجەد، هەیشتمی له یاقوت کەو، نومی له یاقوت زەرد، دەهمی له عەقیق سەوز، یانزەهمی له فیروزه و دوانزەهمی له یاقوت دێز.

²¹ دوانزه دەروازەێ شار، دوانزه مرواری بین، یانێ هەر کام له دەروازەێیل له یە مرواری درس بوی و خێاوان شار له تەڵای ناب بی و جور شیشه بریقەێ هاتیاد.

²² مابەدێگ له ناو شار نێیم، چوینکه خوداوەند خوداێ هەر وه تویەنا و وەرکەگه، مابەد ئەوەنه.

²³ شار هەوەجیگ وه خوەر یا مانگ نێرید که وه ملێەو بدرەوشێد چوینکه جەڵاڵ خودا ڕوشنێ کەێد و وەرکەگه چراخ ئەوەسه.

²⁴ ملەتیل وەناو نویر ئەیو ڕێ کەن و پادشایل زەوی، جەڵاڵ خوێان تیەرنه ئەڕا ئەوره.

²⁵ دەروازەێیل ئەوه هەراێهەر له ڕوژ نیەوەسیەد، چوینکه له ئەوره هەر شەو نیه.

²⁶ جەڵاڵ و حرمەت ملەتیل تیەرێده ئەڕا ئەوره.

²⁷ وەلێ هویچ چشت ناپاک و هویچکەسێگ که کاریل قیزهاوەر یا گولدەر وەجێ بارێ، هەراێهەر نیەچوده ناوێ، بەڵکەم تەنیا کەسیلێگ که ناوێان له دەفتەر ژیان وەرکەگه نویسریاس، چنه ناوێ.