وەحی وه یوحەنا 20 - کتاب مقدس به زبان کردی جنوبی - گویش کلهوری

سەڵتەنەت هەزار ساڵه

¹ ئمجا دیم فریشتەێگ له ئاسمانەو تێدە خوار و کلیل چاێ هاویه و زنجیر گەوراێگ له دەسیەو بی.

² ئەوه، ئەژدەها، ئەو مار جارانه که هەر ئەو ئبلیس و شەیتانەسه، گرد و ئەڕا هەزار ساڵ گیرودەێ کرد و

³ خستەی ناو چاێ هاویه و دەرگه له سەریەو کلیل کرد و مورێگ کوتاده بانیەو تا دیتر ملەتیل گول نێید تا وەختێ ئەو هەزار ساڵه باێده سەر. وەشون ئەوه باێه ئەڕا ماوەێ کەمێگ ڕزگار بکرێید.

⁴ جا تەختیلێگ دیم که له بان ئەوانه کەسیلێگ دانیشتوین که دەسڵات داوەری دریاویه پێان. هەر ئیجوره گیانیل کەسیلێگ دیم که سەریان له ڕێ شاێەتی وه عیسا و له ڕێ کەڵام خودا، له جەسەیان جیاوه‎ بوی. ئیانه ئەو گیانەوەر دڕنه یا پێکەرەگەێ پەرەسش نەکردوین و نیشانەێ ئەوه وه بان تەخت تێوڵ یا وه بان دەسیلێان نەگردوینه وەر. ئیانه وه دواره زنیەو بین و وەگەرد مەسیح هەزار ساڵ سەڵتەنەت کردن.

⁵ ئەو باقی مردگیل زنیەو نوین تا وەختێ که ئەو هەزار ساڵه باێده سەر. ئیه یەکمین زنیەوبوین له مردگیله.

⁶ بمارک و موقەدەسه، کەسێگ که له یەکمین زنیەو بوین مردگیل، بەشداره. مەرگ دویم وه مل ئیجور کەسیلێگ هویچ هێزێگ نێرید بەڵکەم ئەوانه بونه کاهنيل خودا و مەسیح و وەگەرد ئەیو هەزار ساڵ سەڵتەنەت کەن.

شکەس شەیتان

⁷ ئەو وەخته که ئەو هەزار ساڵه باێده سەر، شەیتان له زندان خوەێ ڕزگار کریەد و

⁸ ئەڕا گول داین ملەتیلێگ که هانه چوار پەل زەوی چوده دەیشت. ئەوه جوج و ماجوج که ژمارەیان جور شنیل دەریان ئەڕا جەنگ گردەو کەێد.

⁹ ئیانه وه مل پاناێ زەوی چینه نوا و دەور ئوردوگاه موقەدەسیل و ئەو شار عەزیزه گردن. وەلێ ئاگر له ئاسمانەو هاته خوار و ئەوانه سزان و کرده خوڵەکەو.

¹⁰ جا ئبلیس، که ئەوانه گول داوید، فڕه دریاده ناو دەریاچەێ ئاگر و گوگرد، شونێگ که ئەو گیانەوەر دڕنه و پەێخەمەر دروەکانیه فڕه دریاوین. ئیانه ڕوژ و شەو تا ئەبەد و تا ئەبەد عەزاو کیشن.

داوەری مردگیل

¹¹ ئمجا تەخت گەورا و چەرمگیگ دیم و کەسێگ که له بانی دانيشتوی. زەوی و ئاسمان له لاێ ئەیو دەرچین و شونێگ ئەڕا ئەوانه پەێا نوی.

¹² جا مردگیل دیم، چ زرو و چ وردو، که له وەر دەم تەختەگه وساوین و دەفتەریل واز بی. ئمجا دەفتەرێگ تر واز بی که دەفتەر ژیانه. مردگیل وه پێ کردەوەیلێان، وه ڕوی ئەو چشته که وەناو ئەو دەفتەریله نویسریاوی، داوەری بین.

¹³ دەریا مردگیلێگ که وەناوێ بی، دادەوه؛ مەرگ و جهان مردگیل، مردگیلی که وەناوێان بی، دانەوه، هەر کامێان وه پێ کردەوێ که وەجێ هاوردوی، داوەری بی.

¹⁴ جا مەرگ و جهان مردگیل فڕه دریانه ناو دەریاچەێ ئاگر. دەریاچەێ ئاگر، مەرگ دویمه.

¹⁵ جا هەر کەسێگ که ناوێ له دەفتەر ژیان نەنویسریاوی، فڕه دریاده ناو دەریاچەێ ئاگر.