وەحی وه یوحەنا 2 - کتاب مقدس به زبان کردی جنوبی - گویش کلهوری

پێخام مەسیح وه کلیساێ ئەفسوس

¹ «وه فریشتەێ کلیساێ شار ئەفسوس بنویس: «ئەیو که هەفت هەساره ها دەس ڕاسی و له ناوڕاس هەفت چراخدان تەڵا ڕێ کەێد، ئیجوره ئویشێد:

² خەوەر کاریلد دێرم و له زامەت و سەور و بەردەوام بویند ئاگادارم. زانم که نیەتویەنی شەڕئاشویل تاموڵ بکێ، بەڵکەم کەسیلێگیش که خوێان وه ڕەسول زانن وەلێ نین، دایدەسێانه سەر‎نج و فامیده که ئەوانه دروزنن.

³ زانم که سەور و بەردەوامی نیشان دایده و وه بونەێ ناو مه سەختییل تاموڵ کەێد و شەکەت نیەوێد.

⁴ «وەلێ ئی گلەیێه له لێد دێرم، ئەو مابەته که له سەرەتا داشتی، نایدەسه لا.

⁵ جا باره هویرد که له کوره کەفتیەسه خوار. توبه بکه و کاریلێگ وه جێ بار که له سەرەتا وه جێ هاوردیاید. ئەگەر نه تیەمه ئەڕا لاد و چراخدانەگەد له ئەوره که هەس، هەڵگرم، مەر ئیه که توبه بکێ.

⁶ وەلێ ئی خاسیه ديری که له کاریل دار‎دەسەی نیکولاییل قینێد تێد، ئەوجورە که منیش قینم تێد.

⁷ «هەرکەسێگ گوش دێرێد بشنەفێد که روح خودا وه کلیسایل چه ئویشێد. هەر کەسێگ بوێدەو، وه پێ ئجازەێ خواردن له دار زنەیی بەخشم که ها ناو بەهیشت خودا.

پێخام مەسیح وه کلیساێ ئسمیرنا

⁸ «وه فریشتەێ کلیساێ شار ئسمیرنا بنویس: «ئەیو که سەرەتاس، ئەیو که ئاخره، ئەیو که مرد و ئەیو که زنیەو بی، ئیجوره فەرمایش کەێد:

⁹ له بەرد و دەستەنگێد ئاگادارم، وەلێ دەوڵەمەنی! له بختیل ئەوانه که خوێان جویلەکە زانن وەلێ نین، بەڵکەم کەنیسەێ شەیتانن، خەوەر دێرم.

¹⁰ له رەنجێگ که ڕوی کیه پێد، ڕخد نەچود. بنوڕ، ئبلیس تواێ بڕێگ لەلێدان بخێده زندان تا ئەزموندان بکێد و ده ڕوژ بەرد کیشێد. وەلێ تا وه مەرگ وەفادار بمێن که مه تاج زنەیی بەخشمه پێد.

¹¹ «ئەوه که گوش دێرێ بشنەفێد که روح خودا وه کلیسایل چه ئویشێد. هەر کەسێگ بوێدەو، له مەرگ دویم زیانێگ نیەوێد.

پەێخام مەسیح وه کلیساێ پرگاموم

¹² «وه فریشتەێ کلیساێ شار پرگاموم بنویس: «ئەیو که شمشێر فره تێژ دو دەمێگ دێرێ، ئیجوره ئویشێد:

¹³ زانم له کوره نیشتەجێید، ئەوره که تەخت شەیتانه. وه ئی هەمگه وه ناو مه وەفادار مەنیده و ئیمانێ که وەپێم داشتی، حاشا نەکردێ، تەنانەت وه ڕوژگاریل ئانتیپاس، ئەو شاێەت ئەمین منه که وه ناو ئیوه کوشریاد، هەر ئەو شونه که شەیتان وەناوێ نیشتەجێه.

¹⁴ «وەلێ، یەک دو هەڵه وه پێد دێرم. له ئەوره کەسیلێگ ديری که کەفتنەسه شون تالیم بەلعام؛ هەر ئەوه که وه باڵاق یاێ دا که کوچگیگ بخیده نوای پاێ بەنیئیسرائیل که بایس کەفتنێان بود، تا له خواردەمەنی پیشکەشی وه بتیل بخوەن و دەس بێەنه خیزی.

¹⁵ بێجگه ئیه، کەسیلێگیش ديری که کەفتنەسه شون تالیم دار و دەسەی نیکولاییل.

¹⁶ جا توبه بکه، ئەگەر نه و ئی زویه تیەمه ئەڕا لاد و وه شمشێر دەمم وەگەردێانەو کەمێ جەنگ.

¹⁷ «ئەوه که گوش دێرێد بشنەفێد که روح خودا وه کلیسایل چه ئویشێد. هەر کەسێگ که بوێدەو، وه ئەوه له ئەو نان ’مەنا‘ دەمه پێ که شاریاسەو. هەر ئەوجورە کوچگ چەرمگیش بەخشمه پێ که وه بان ئەو کوچگه ناو تازەێگ نویسریاس، ناوێ که کەس نیەزانێ چەس، بێجگه ئەوه که گرێدەێ.

پێخام مەسیح وه کلیساێ تیاتیرا

¹⁸ «وه فریشتەێ کلیساێ شار تیاتیرا بنویس: «کوڕ خودا که چەویلی جور بلیزەێ ئاگره و پایلێ جور برنجەێگه که تاویاسەو، ئیجوره فەرمایش کەێد:

¹⁹ مه له کاریل و مابەت و ئیمان و خزمەت و سەور و بەردەوام بین توی خەوەر دێرم و ئاگادارم که کاریل ئاخرد له کاریل یەکم جارد فرەتره.

²⁰ وەلێ ئی هەڵه وه توی دێرم که پاپێ ئەو ژن ئیزابل ناوه نێید که خوەێ وه پەێخەمەرێگ زانید. هەر ئەوه که وەگەرد تالیم خوەێ خوڵامیل مه گول دەێد تا دەس وه خیزی بێەن و له خواردەمەنی پیشکەشی وه بتیل بوخوەن.

²¹ وه پێ دەرفەت دام تا توبه بکێ، وەلێ نیەتواێ له خیزی خوەێ توبه بکێ.

²² بنوڕ، ئەو ژنه نەخوەش خەمه بان جێ و ئەوانه که وەگەردیەو داوانپێسی کەن تویش بەرد فره گەوراێگ تیەرم، مەر ئیەک ئەوانه له چین وه ڕێیل ئەوه، توبه بکەن.

²³ جا مناڵیلی کوشم. ئەو وەخته گشت کلیسایل زانن من هەر ئەوەمه که فکر و دڵ گەردم و وه هەر کامدان وه پێ کاریلێ سزا دەم.

²⁴ وەلێ وه ئەو باقیدان وه ناو تیاتیرا که نەکەفتینەسه شون ئی تالیمەو هەرئیجوره ئەو چشته یاێ نەگردینه که بڕێگ وەپێ ئویشن ’رازیل قویل شەیتان‘، وەپێدان ئویشم که وه ملدانەو بارێگ فرەتر له ئەوه که ها بان کوڵدانەو، نیەیلم.

²⁵ تەنیا ئەو چشته که دێرین قورس بگرن تا وەختێگ مه بام.

²⁶ «هەر کەسێگ بوێدەو و کاریل مه تا وه ئاخره بپارێزنێ، له سەر ملەتیل وه پێ دەسڵات بەخشم،

²⁷ «”وه گوچان ئاسنی حوکمه پێان کەێد؛ و ئەوانه جور کویزەێ سوفالی وردخام کەێد،“ هەر ئەوجورە که مه خوەم ئی دەسڵاته له باوگم پەێا کردمه.

²⁸ وه ئەوه هەسارەێ شەوەکی بەخشم.

²⁹ ئەوه که گوش دێرێد بشنەفێد که روح خودا وه کلیسایل چه ئویشێد.