وەحی وه یوحەنا 17 - کتاب مقدس به زبان کردی جنوبی - گویش کلهوری

داوانپێس گەورا و گیانەوەر دڕنه

¹ ئمجا یەکیگ له ئەو هەفت فریشته که ئەو هەفت پیاڵه له دەسێانەو بی هات و وەته پێم: «بەو تا سزاێ ئەو داوانپێس گەورا که دانیشێده مل ئاویل فره، نیشانید بێەم.

² وەگەرد ئەوه بی که پادشایل زەوی خیزی کردنه و له شراو خیزی ئەوه بی که نیشتەجێیل زەوی سەرخوەش بینه.»

³ جا ئەو فریشته وەناو روح خودا مە بردە ئەڕا بیاوانێگ. له ئەوره ژنێگ دیم له بان پشت گیانەوەر دڕنەی سویر رەنگیگ دانیشتوی. جەسەێ ئی گیانەوەر دڕنه پڕ له ناویل هامێته وه کفر بی و هەفت گله سەر و ده گله شاخ داشت.

⁴ ژنەگه دڵنگ سویر و ئەرخەوانی له وەرێ بی و وەگەرد تەڵا و جەوایر و مرواری ڕەژیایدەو. جامێگ له تەڵا له دەسیەو بی پڕ له کەفارات و ناپاکییل خێزیەگەێ.

⁵ ئی ناو مەرموزه له تەخت تێوڵ ئەوه نویسریاوید: «بابڵ گەورا، داڵگ داوانپێسیل و پێسییل زەوی.»

⁶ ئەو ژنه دیم که له خوین موقەدەسیل و خوین کەسیلێ که وەبونەێ عیسا شەهید بوین، سەرخوەشه. هەر ئیه که ئەوه دیم فره سەرم سڕ مەن.

⁷ وەلێ فریشتەگه وەته پێم: «له چه سەرد سڕ مەنێه؟ راز ئەو ژنه و ئەو گیانەوەر دڕنه که هەفت گله سەر و ده گله شاخ دێرێ و ژنەگه سوارێ بیه، ئەڕاد ئویشم.

⁸ ئەو گیانەوەر دڕنه که دیده، زەمانێگ بیەسێ‎، ئێرنگه نێەسێ، وه ئی زویه له چاێ هاویه دەر تێد و وەرەو نابودی چود. له نیشتەجێیل زەوی ئەوانه که ناوێان له وەخت دامەزرانن جهان له ناو دەفتەر زنەیی نەنویسریاس، وەختێ ئەو گیانەوەر دڕنه دوینن، سەریان سڕ مینێد، چوینکه زەمانێگ بیەسێ، ئێرنگه نێەسێ و تێد.

⁹ «ئیه زەین زانیار تواید. ئەو هەفت سەره، هەفت گله کویەن که ئەو ژنه له بانێان دانیشتێه.

¹⁰ هەر ئیجوریشه ئەوانه هەفت پادشان که پەنج نەفەر له لێان کەفتنەسه خوار، یەکیگێان مەنیەسێ و ئەو ئاخریه هێمراێ ناتیه؛ وەختێ باێد، باێه بمەنێدەێ، وەلێ تەنیا ئەڕا ماوەێ کەمێگ.

¹¹ ئەو گیانەوەر دڕنه که زەمانێگ بیەسێ و ئێرنگه نیەسەێ، پادشا هیشتمه. وەلێ وه ئەو هەفت نەفەره تالوق دێرێ و وەرەو نابودی چود.

¹² «ئەو ده شاخه که دێ، ده گله پادشان که هێمراێ وه هێز پادشایی نەڕەسینه. وەلێ ئەوانه باێه ئەڕا ساتێگ وەگەرد ئەو گیانەوەر دڕنه وه دەسڵات پادشایی برەسن.

¹³ ئەوانه گشتێان فکرێان یەکیگه و هێز و دەسڵات خوێان دەنه گیانەوەر دڕنه.

¹⁴ ئەوانه وەگەرد وەرکەگه شەڕ کەن و وەرکەگه وه ملێانەو زاڵەو بود، چوینکه ئەیو خوداوەند خوداوەندیل و شاێ شاێیله؛ و ئەوانه که هانه گەردێەو، دەنگ کریایل و هەڵوژاردیل و پێرەویل وەفادارین.»

¹⁵ ئمجا فریشتەگه وەگەردمەو وەت: «ئەو ئاویله که دیده، هەر ئەو شونه که داوانپێسەگه دانیشتێه، هەر ئەو قەومیل و جەماێەتیل و ملەتیل و زوانیلنه.

¹⁶ ئەو گیانەوەر دڕنه و ئەو ده گله شاخه که دیده، له داوانپێسەگه بێزارەو بون. ئەوانه داوانپێسەگه وێڵ کریا و ڕویت هیلن و گوشت ئەوه خوەن و له ناو ئاگر سزننەێ.

¹⁷ چوینکه خودا ناسه دڵیان که ئامانج ئەوه وه جا بارن و وه یە فکر هێز پادشاێ خوێان بێەنه دەس ئەو گیانەوەر دڕنە، تا ئەو وەخته که کەڵام خودا وه تەمامی باێده دی.

¹⁸ ئەو ژنه که دیده، هەر ئەو شار گەوراسه که وه پادشایل زەوی حوکمرانی کەێد.»