وەحی وه یوحەنا 16 - کتاب مقدس به زبان کردی جنوبی - گویش کلهوری

هەفت پیاڵەێ توڕەێ خودا

¹ ئمجا دەنگ بەرزێگ له مابەد و شنەفتم که وه ئەو هەفت فریشته وەتیا: «بچن و هەفت پیاڵەێ توڕەێ خودا وه مل زەویا بڕشنن.»

² جا فریشتەێ یەکم چی و پیاڵەگەێ خوەێ ڕشانه مل زەویا؛ زامیل پێسیگ که پڕ له ژان بی وه مل جەسەێ مەردمێگ که نیشانەێ ئەو گیانەوەر دڕنه داشتن و پێکەر ئەوه پەرەسیان، دیار دا.

³ فریشتەێ دویم پیاڵەگەێ خوەێ ڕشانه ناو دەریا و دەریا بیه خوین، خوینێگ که مینستیاده خوین یە ئایەم مردگ و گشت گیانەوەریلێ که هانه ناو دەریا مردن.

⁴ فریشتەێ سێیەم پیاڵەگەێ خوەێ ڕشانه ناو چەمیل و کیەنییل ئاو و ئەوانه بینه خوین.

⁵ ئمجا شنەفتم فریشتەێگ که دەسڵات ئاویل دریاویده پێ، ئیجوره وەت: «توی دادپەروەرید وه ئی حوکمیله که کردیده، تو که هەید و بید، ئێ قودوس؛

⁶ چوینکه ئەوانه خوین موقەدەسیل و پەێخەمەریل ڕشاننه، جا وه ئەوانه خوین دایده تا بنوشن که سزاێان هەر ئیەسه!»

⁷ مه شنەفتم له قوروانگا جواو هات که: «بەڵێ، ئێ خوداوەند خوداێ هەر وه تویەنا، حەقه و داده، داوەرییل توی.»

⁸ فریشتەێ چوارم پیاڵەگەێ خوەێ ڕشانه مل خوەر و ئجازه دریاده خوەر تا مەردم وه ئاگر بسزنێد.

⁹ مەردم له تین گەرما سزیان و ناو خودا که هێز ئی بەڵایله ها دەسێ، لانەت کردن، ئەوانه توبه نەکردن و ئەیو جەڵاڵ نیان.

¹⁰ فریشتەێ پەنجم پیاڵەگەێ خوەێ ڕشانه مل تەخت ئەو گیانەوەر دڕنه و مەمڵەکەت شانشینیەگەێ چیه ناو تیەریکی، مەردم وه بونەێ ژان فره، قەپ کردیانه زوان خوێان و

¹¹ وه سەوەو ژانیل و زامیل خوێان، لانەت کردیانه خوداێ ئاسمان. ئەوانه له کاریل خوێان توبه نەکردن.

¹² فریشتەێ شەشم پیاڵەێ خوەێ ڕشانه مل چەم گەوراێ فورات و ئاوەگەێ وشک بی، تا ڕێ ئەڕا پادشایلێ که له ڕوژهەڵاتەو تیەن، گورجەو بود.

¹³ ئمجا دیم سێ روح ناپاک که جور غورواق بین له دەم ئەژدەها و له دەم ئەو گیانەوەر دڕنه و له دەم پەێخەمەر دروەکانی هاتنه دەیشت.

¹⁴ چوینکه ئیانه روحیل شەیتانین که نیشانه و موجزەیل ئاشکرا کەن و چنه ئەڕا لاێ پادشایل سەرئانسەر جهان تا ئەوانه ئەڕا شەڕ وه ڕوژ گەوراێ خوداێ هەر وه تویەنا وه دەور یەکەو گردەو بکەن.

¹⁵ «بنوڕ، هەر جور دز تیەم! خوەش وه حاڵ ئەو کەسه وەخەوەر مەنید و دڵنگەگەێ ها وەرێ، تا نەخوای ڕویت خڕ بخوێ و له تەمام جهان حەێاێ بچود.»

¹⁶ ئمجا ئەو سێ روح ناپاکه، پادشایل زەوی له شونێگ که وه زوان عبرانییل ’حارمەگدون‘ خوەنرێی، گردەو کردن.

¹⁷ فریشتەێ هەفتم پیاڵەگەێ خوەێ ڕشانه هەواێا ‎و له ئەو تەخته که له ناو مابەد بی، دەنگ بەرزێگ دەر هات که: «تەمام بی!»

¹⁸ ئەو وەخته بڵاچه و گرمەگرم و هەوره تریقه بی که هەڵسیاد و زەوی لەرزەی فره گەوراێگ ڕوی دا، ئەو زەوی لەرزه ئەوقره گەورا بی که له وەختێگ ئایەم له بان زەوی زنەیی کردێه، جور ئەوه هویچ وەخت هەڵنەکەفتوی.

¹⁹ شار گەورا بیه سێ کوتەو و شاریل ملەتیل ڕمیاده مل یەکەو، خودا بابڵ گەورا هاورد هویرێ تا وادارێ بکێ له ئەو جامه که پڕ له شراو خەزەو ئاگرین ئەیو بی، بخوێ.

²⁰ گشت جەزیرەیل دەرچین و کویەیل نوقم بین.

²¹ له ئاسمان تەگر سەخت قورسیگ واریاده مل مەردم که هەر دەنگی، نزیک پەنجا کیلو بی و ئایەمیل له باوەت بەڵای تەگر خودا لانەت کردن، چوینکه بەڵاێ فره سەختێگ بی.