وەحی وه یوحەنا 14 - کتاب مقدس به زبان کردی جنوبی - گویش کلهوری

وەرک و سەد و چل و چوار هەزار نەفەر

¹ ئمجا وەختێ نوڕستم، ئەو وه‎ڕکه دیم که له بان کویەێ سەهیون وساوی، وەگەرد سەد و چل و چوار هەزار نەفەر که ناو ئەیو و ناو باوگ ئەیو وه بان تەخت تێوڵیان نویسریاوی.

² جا دەنگێگ له ئاسمان شنەفتم جور گرمەێ ئاویل فره؛ جور دەنگ هەوره تریقەێ بەرز؛ ئەو دەنگه که شنەفتم مینستیاده دەنگ چەنگ‎ژەنیل ئەو وەخته که چەنگیلێان بژەنن.

³ جا بەیتیگ تازه خوەنیان له نوای ئەو تەخت و له نوای ئەو چوار گیانەوەر زنی و له نوای ئەو پیریله. هویچکەسێگ نیەتویەنست ئەو بەیته یاێ بگرێد، مەر ئەو سەد و چل و چوار هەزار نەفەره که وەناو مەردم بان زەوی ڕزگاریان سەنریاوی.

⁴ ئیانه هەر ئەو کەسیلنه که خوێان وەگەرد ژنيل ناپاکەو نەکردنه، چوینکه ئی پیاێله ئازەون. وەرک ئەڕا هەر شونێگ بچود، ئیانه هانه شونیەو. ئیانه ڕزگاریان له بین ئایەمیزاێ سەنریاس، هەر جور نەوبەر ئەڕا خودا و ئەڕا وەرکەگه.

⁵ هویچ دروێگ وەناو دەمیانەو پەێا نوی. ئەڕا ئیه که ئیانه هویچ نەخسێگ وەناو خوێان نێرن.

سێ فریشته و پێخامەگەێان

⁶ ئمجا یەێ فریشتەتر دیم که له ناوڕاس ئاسمانەو باڵەو گردیا و ئینجیل ئەبەدی وەگەرد خوێەو داشت تا وه نیشتەجێیل زەوی جار بێی، وه هەر ملەت و هوز و زوان و قەومێگ که بون.

⁷ ئەو وه دەنگ بەرز وەت: «له خودا زاوردان بچود و ئەیو جەڵاڵ بيەن، چوینکه سات داوەریەگەێ رەسیه. ئەیو بپەرەسن که ئاسمان و زەوی و دەریا و کیەنییل ئاو درس کرد.»

⁸ فریشتەێگتر یانێ فریشتەێ دویم وه شونیەو هات و وەت: «کەفته خوار! بابڵ گەورا کەفته خوار! ئەوه که گشت ملەتیل وادار کرد تا له شراو هەواوهەوەس خێزیەگەێ بخوەن.»

⁹ فریشتەێگتر یانێ فریشتەێ سێیەم له شون ئەو دوانه هات، وه دەنگ بەرز وەت: «ئەگەر کەسێگ ئەو گیانەوەر دڕنه و پێکەرەگەێ بپەرەسێد و نیشانەێ ئەوه له بان تەخت تێوڵ یا له بان دەسیەو وەربگرید،

¹⁰ ئەو کەسیشه له شراو خەزەو خودا نوشید، شراوێ پڕ قەوەت و ناب که وەناو جام خەزەو ئەیو ڕشیاس. ئەو کەسیشه وه لاێ فریشتەیل موقەدەس و وه لاێ وەرکەگه وەگەرد ئاگر و گوگرد، عەزاو دوینید.

¹¹ جا دویکەڵ عەزاو ئەوانه تا ئەبەد و تا ئەبەد چوده بان. ئەڕا ئەوانه که ئەو گیانەوەر دڕنه و پێکەرەگەێ پەرەسن و ئەڕا هەر کەسێگ که نیشان ناوێ وەرگرێ، نه ڕوژ و نه شەو ئارامی نیه.»

¹² ئیه بەردەوام بین ئیمانداریل وه مەسیح تواید، هەر ئەوانه که حوکمیل خودا و ئیمانێان وه عیسا پارێزنن.

¹³ ئمجا دەنگێگ له ئاسمانەو شنەفتم که وەتیا، «بنویس: خوەش وه حاڵ ئەوانه که له ئیەولا وەناو خوداوەند مرن.» جا روح خودا فەرمایش کرد: «وه ڕاسی خوەش وه حاڵ ئەوانه چوینکه له زامەتیل خوێان ئارام گرن، ئەڕا ئیه که کاریلێان وه شونێانەو تێد!»

گردەو کردن خەلەی زەوی

¹⁴ ئمجا وەختێ نوڕستم، هەورێگ چەرمگ وه نوای چەوم بی. له بان ئەو هەوره یەکیگ دانيشتوی که مینستیاده کوڕ ئنسان و تاجێگ له تەڵا وه بان سەر و داسێگ تێژ له دەسیەو بی.

¹⁵ ئمجا یە فریشتەتر له مابەد هاته دەیشت و وه دەنگ بەرز وه ئەیو که له بان هەورەگه دانيشتوی وەت: «داسەگەێ خوەد هەڵگر و درەو بکه، ئەڕا ئیه که سات درەو ڕەسیه و خەلەی زەوی خاس ڕەسیه.»

¹⁶ جا ئەیو که وەبان هەورەگه دانيشتوی داسەگەێ خوەێ وەبان زەوی خڕ دا و زەوی درەو بی.

¹⁷ ئمجا یە فریشتەتر له مابەدێگ که ها له ئاسمان هاته دەیشت و ئەویش داس تێژێگ له دەسیەو بی.

¹⁸ یە فریشتەتر له قوروانگا هاته دەیشت. فریشتەێگ که وه مل ئاگر دەسڵات داشت، وه دەنگ بەرز وه ئەو کەسه که داس تێژ داشت، وەت: «داسه تێژەگەد هەڵگر و بوڵیل‎ له دار مەێو زەوی گردەو که، چوینکه ئەنگویریلێ ڕەسینه.»

¹⁹ جا ئەو فریشته داسەگەێ وه بان زەویا خڕ داد و ئەنگویرەگان زەوی گردەو کرد و وەناو کەوەڵ گەوراێ توڕەێ خودا ڕشان.

²⁰ جا ئەنگویرەگان وەناو ئەو کەوەڵ دەیشت شار پاوڵا بین و له ئەو کەوەڵه خوین کەفته ڕێ و تا هەوسار ئەسپەگان هاته بان و وه دریژایی سێسەد کیلومتر خوین کەفته ڕێ.