وەحی وه یوحەنا 13 - کتاب مقدس به زبان کردی جنوبی - گویش کلهوری

یەکمین گیانەوەر دڕنه

¹ ئمجا دیم گیانەوەر دڕنەێگ له دەریا تێده دەیشت. ده گله شاخ داشت و هەفت گله سەر، وەگەرد ده گله تاج وه بان شاخیلێ؛ له بان هەر سەری ناوێگ هامیته وه کفر نویسریاوید.

² ئەو گیانەوەر دڕنه که مه دیم مینستیاده پەڵەنگێگ، پایلێگ جور پاێ خرس داشت و دەمێ جور دەم شیر. ئەژدەها هێز خوەێ و تەخت خوەێ و دەسڵات فره گەوراێگ داده ئەو گیانەوەر دڕنه.

³ یەکیگ له سەریل ئەو گیانەوەر دڕنه، چمانێگ زام متڵەقبڕێگ هەڵگردوی، وەلێ زام متڵەقبرەگەێ خاسەو بوید. گشت جهان سەریان سڕ مەن و کەفتنه شون ئەو گیانەوەر دڕنه.

⁴ ئایەمیل ئەژدەهاگە پەرەسیان چوینکه وه ئەو گیانەوەر دڕنه دەسڵات خوەێ بەخشاوید. هەر ئیجوره ئەو گیانەوەر دڕنەیشه پەرەسیان و پرسیان: «کیه که بوده جور ئی گیانەوەر دڕنه؟ کیه که بتویەنێ وەگەردیەو بجەنگێ؟»

⁵ دەمێگ دریاویه ئەو گیانەوەر دڕنه تا قسیەيل قوزانه و هامیته وه کفر بکێ و ئجازه دریاده پێ تا دەسڵات خوەێ چل و دو مانگ وه کار بوێد.

⁶ جا دەم خوەێ و کفر کردن وه خودا واز کرد و وه ناو ئەیو و شونێ که ئەیو نیشتەجێه، یانێ وه ئەوانه که له ناو ئاسمان نیشتەجێین، کفر کردیاد.

⁷ ئجازه دریاده پێ که وەگەرد ئیمانداریل وه مەسیح بجەنگێ و وه ملێانەو زاڵەو بود؛ وه سەر هەر هوز و قەوم و زوان و ملەت دەسڵات دریاده پێ.

⁸ گشت نیشتەجێیل زەوی ئەو گیانەوەر دڕنه پەرەسن، یانێ گشت کەسیلێگ که ناوێان له دامەزرانن جهان لەناو دەفتەر زنەیی نەنویسریاس که هن ئەیو وەرک سەر بڕیاێەسه.

⁹ ئەوه که گوش دێرێد بشنەفێد:

¹⁰ ئەگەر کەسێگ باێه وه گیرودەێ بچود، وه گیرودەێ چود. ئەگەر کەسێگ باێه وه شمشێر بکوشرێید، جا باێه وه شمشێر بکوشرێید. ئی کاره، بەردەوام بوین ئیمانداریل وه مەسیح تواید و ئیمان ئەوانه.

گیانەوەر دڕنەی دویم

¹¹ ئمجا دیم گیانەوەر دڕنەێگ تر له زەوی تێده دەیشت. هەر جور وەرک دو گله شاخ داشت و جور ئەژدەها قسیه کردیا.

¹² وەگەرد گشت دەسڵات گیانەوەر دڕنەی یەکم و له جێ ئەوه کار کردیاد و زەوی و نیشتەجێیلی وه پەرەسین گیانەوەر دڕنەی یەکم که زام متڵەقبرەگەێ خاسەو بوی، وادار کردیاد.

¹³ نیشانه و موجزەیل فره گەوراێگ له گیانەوەر دڕنەێ دویم ئاشکرا بیاد؛ تەنانەت سەوەو بیاد وه نوای چەو مەردم ئاگر له ئاسمانەو بوارنێده مل زەویا.

¹⁴ وەگەرد نیشانه و موجزەیلێ که ئجازه داشت وه جێ ئەو گیانەوەر دڕنەی یەکمه ئاشکرا بکێد، نیشتەجێیل زەوی فریو دا و وەته پێان که پێکەرێگ له ئەو گیانەوەر دڕنه درس بکەن که وه شمشێر زام خواردوی، وەلێ هێمراێ زنی بی.

¹⁵ ئجازه دریاده پێ که له هەناس خوەێ پف بکێده پێکەر گیانەوەر دڕنەگه تا پێکەر ئەو گیانەوەر دڕنه تەنانەت بتویەنێ قسیه بکێ و بایس کوشتن کەسیلێگ بود که پێکەر گیانەوەر دڕنه پەرەسش نیەکەن.

¹⁶ هەر ئیجوریشه، گشتیەکی، له ورد و زرو، دارا و نەێار، ڕزگار و خوڵام وادار کرد تا وه مل دەس ڕاسیان یا وه مل تەخت تێوڵیان نیشانه بیلن.

¹⁷ تا هویچکەسێگ نەتویەند، بسێنێد یا بفروشێد، مەر ئیه که ئەو نیشانه بیاشتود که ئەو نیشانه، یا ناو ئەو گیانەوەر دڕنه بی، یا ژمارەێ ناوێ.

¹⁸ ئیه زانیاری تواید. هەر کەسێگ که فام دێرێ، بیل تا ژمارەێ ئەو گیانەوەر دڕنه حساو بکێد، ئەڕا ئیه که ئەوه، ژمارەێ ئنسانه. ژمارەێ ئەوه شەشسەد و شەس و شەشه.