وەحی وه یوحەنا 12 - کتاب مقدس به زبان کردی جنوبی - گویش کلهوری

ژن و ئەژدەها

¹ ئمجا نیشانەیگ فره گەورا وه ناو ئاسمانەو دیار دا: ژنێگ که خوەر کردویه وەرێ و مانگ له ژێر پاێ بی و تاجێگ له دوانزه هەساره له بان سەری بی.

² ژنەگه زگێ پڕ بی و له ژان زایێن و عەزاو زایێن قیژەێ بەرزەو بی.

³ ئمجا نیشانەیگ تر له ناو ئاسمانەو دیار دا: بنوڕ، ئەژدەهاێگ سویرەتاوه و فره گەورا که هەفت گله سەر داشت و ده گله شاخ و هەفت گله تاج له بان سەرەگانی بی.

⁴ دمێ سێ کوتی هەسارەیل ئاسمان گزێ دا و ڕشانی مل زەویا. ئەژدەها له وەر دەم ئەو ژنه که نزیک زاینی بی وساد، وه ئی مەبەسته تا که مناڵەگەێ باێه دنیا، قویرتی بێید.

⁵ ئەو ژنه کوڕێگ هاورده دنیا، کوڕێگ که باێه وەگەرد گوچان ئاسنی وه مل گشت ملەتیل حوکم بکێ. وەلێ مناڵەگەێ قەپانیاد و بڕیاده ئەڕا لاێ خودا و تەختەگەێ ئەیو.

⁶ جا ژنەگه وەرەو بیاوان، وه شونێگ که خودا ئەڕاێ گورجەو کردوی، دەرچی تا له ئەوره وه ماوەێ هەزار و دویس و شەس ڕوژ بپارێزننێ.

⁷ ئێرنگه جەنگێگ له ناو ئاسمان کەفته ڕێ. میکائیل و فریشتەیلێ وەگەرد ئەژدەها کردنێ جەنگ و ئەژدەها و فریشتەیلێ وه نوای ئەوانه ئەڕا جەنگ وسان،

⁸ وەلێ ئەژدەها شکەس خوارد و دیتر وەناو ئاسمان شونێگ ئەڕا ئەوانه نەمەن.

⁹ ئەژدەهاێ گەورا فڕه دریاده خوار، هەر ئەو مار جارانه که ئبلیس و شەیتان ناویه و گشت جهان فریو دێ. ئەوه و فریشتەیلێ فڕه دریانه بان زەوی.

¹⁰ ئمجا دەنگ بەرزێگ له ناو ئاسمان شنەفتم که وەتیا: «ئێرنگه نجات و هێز و پادشایی خوداێ ئیمه و دەسڵات مەسیح ئەیو ڕەسیه. چوینکه ئەوه که ئەڕا برایل ئیمه قوڕات دێ که شەو و ڕوژ له نواێ خوداێ ئیمه بخت ئەوانه کەێد، فڕه دریاسه خوار.

¹¹ ئەوانه وەگەرد خوین وەرکەگه و وەگەرد کەڵام شاێەتی خوێان له ئەوه بردنەسەو. چوینکه گیان خوێان عەزیز نەزانستنه، تەنانەت تا وه قێ مردن.

¹² جا خوەشی بکێن ئێ ئاسمانیل و ئێ ئیوه که نیشتەجێیل ئەورەیلینه! وەلێ وی وه توێ ئێ زەوی و وی وه تو ئێ دەریا، چوینکه ئبلیس وەگەرد توڕەێ فرەێگ وه ملدانەو هاتیەسه خوار، چوینکه زانێد وەخت فرەێگ نێرێد.»

¹³ وەختێ ئەژدەها دی که کەفتیەسه بان زەوی، کەفته شون ئەو ژنه که ئەو مناڵ کوڕه زاوید.

¹⁴ وەلێ دو باڵ ئەو هەڵو گەورا وه ئەو ژنه دریاد تا له ئەو ماره، وه جیگەێ وەناو بیاوان باڵەو بگرێد که ئەڕاێ گورجەو بویه، تا ئەڕا زەمانێگ و زەمانیلێگ و کوته زەمانێگ له ئەوره بپارێزێید.

¹⁵ مارەگه وه شون ئەو ژنه له دەم خوەێ ئاوێگ هەر جور چەم خسته ڕێ تا لافاو ئەو ژنه وەگەرد خوێەو بوێد.

¹⁶ وەلێ زەوی هاته مەیەت ژنەگه و زەوی دەمێ واز کرد و چەمیگ که ئەژدەها له دەم خوەێ خستویده ڕێ، قویرتەو دا.

¹⁷ ئمجا ئەژدەها وه مل ژنەگه توڕه بی و چی تا وەگەرد ئەو باقی نەتەوەگەێ بجەنگێ؛ یانێ وەگەرد ئەوانه که حوکمیل خودا وه جێ تیەرن و شاێەتی عیسا پارێزنن.

¹⁸ جا ئەژدەها له بان شنیل لاێ دەریا، وساد.