وەحی وه یوحەنا 11 - کتاب مقدس به زبان کردی جنوبی - گویش کلهوری

دو شاێەت

¹ ئمجا چو دریژێگ دریاده پێم که مینستیاده چو قەراوڵ، جا وه مه وەتریا: «هەڵسه پا و مابەد خودا و قوروانگا ئەنازەێ بگر و ژمارەێ ئەوانه که له ئەوره پەرەسش کەن، بژمار،

² وەلێ حسار دەیشت مابەد ئەنازەێ مەگێر و کارێگ وەپێ نیاشتوید، چوینکه دریاسه ملەتیل. جا ئەوانه چل و دو مانگ شار موقەدەس پاوڵا کەن.

³ جا مه وه دو گله شاێەت خوەم دەسڵات دەم و ئەوانه جل و پەڵاس کەنه وەر و هەزار و دویس و شەس ڕوژ نەبوەت کەن.»

⁴ ئی دو گله، هەر ئەو دو دار زیتوننه و هەر ئەو دو چراخدانه که له لاێ خوداوەند زەوی وسن.

⁵ ئەگەر کەسێگ بتواێ زەرەرێگ وه پێان برەسنێ، ئاگر له دەمیانەو بڵێزه کیشێد و دشمەنیلیش سزنێد و کەێده خوڵەکەو. ئەگەر کەسێگ بتواێ زەرەر وە پێان برەسنێد، وه ئیجوره باێه بکوشرێی.

⁶ ئەوانه هێز ئیه دێرن ئاسمان بوەسن تا له ڕوژیل نەبوەتیان واران نەوارید و هێز ئیه دێرن تا ئاویل بکەنه خوین و زەویش هەر چەن جار که بتوان وه هەر جور بەڵاێگ گیروده بکەن.

⁷ وەختێ ئەوانه شاێەتی خوێان وه ئاخر رەسانن، ئەو گیانەوەر دڕنه که له چاێ هاویه تێدە دەیشت، وەگەردێانەو کەێدەێ جەنگ و وه مل ئەوانه زاڵەو بود و کوشێدیان.

⁸ جا لەشەگانیان له خێاوان ئەو شار گەورا که نمادین وه پێ ئویشن سودوم و مسر، وەبان زەوی مینێد؛ هەر ئەو شاره که خوداوەندیانیش له ئەوره وەسەلیب کیشریا.

⁹ تا سێ ڕوژ و کوتێگ، مەردم له هەر قەو‎‎م و هەر هوز و هەر زوان و هەر ملەتێگ نوڕنه لەشیل ئەوان و نیێلێن تا بنێانەنه قەور.

¹⁰ نیشتەجێیل زەوی له مردن ئەوانه خوەشاڵەو بون و جەشن گرن و ئەڕا یەکترەکی پیشکەشێ کل کەن؛ چوینکه ئی دو گله پەێخەمەره، بوینه بایس عەزاو نیشتەجێیل زەوی.

¹¹ وەلێ له شون سێ ڕوژ و کوتێگ، روح زنەیی له لاێ خوداوه چیه ناو گیانێان و ئەوانه هەڵسانه سەر پاوه. ترس فره گەوراێگ کەفته مل کەسیلێگ که ئەوانه دین.

¹² ئمجا شنەفتن که دەنگ بەرزێگ له ئاسمانەو وه پێان وەت: «باینه بان ئەڕا ئێره!» جا ئەوانه له نوای چەو دشمەنیلیان له ناو هەورێگ وەر‎و ئاسمان چینه بان.

¹³ هەر ئەو ساته، زەویه لەرزەێگ گەورا هەڵکەفت و ده یەکی شارەگه ڕمیاد و هەفت هەزار نەفەر وه ناو زەوی لەرزەگه کوشریان و ئەوانه که مەنوینەو فره رخێان چی و خوداێ ئاسمان جەڵاڵ دان.

¹⁴ ’وی‘ دویم له سەر گوزەریاس. بنوڕ، ’وی‘ سێیەم وه ئی زویه باێه باێد.

شەیپور هەفتم

¹⁵ ئمجا فریشتەێ هەفتم شیپورەگەێ هاورده دەنگ؛ له ناکاوەو دەنگیل بەرزێگ پێچیاده ناو ئاسمان که وەتیا: «حوکومەت جهان، بیەسه هن خوداوەند ئیمه و مەسیح ئەیو. جا ئەیو تا ئەبەد و تا ئەبەد حوکم کەێد.»

¹⁶ جا ئەو بیس و چوار پیره که له نوای خودا له بان تەختەگان خوێان نیشن، ڕوی نانه بان خاک و خودا پەرەسش کردن و

¹⁷ وەتن: «سپاسد کیم ئێ خوداوەند خوداێ هەر وه تویەنا، که هید و بید. چوینکه هێز فره گەوراێ خوەد گردیدەسه دەس و سەڵتەنەت شرو کردیده.

¹⁸ ملەتیل توڕه بین، وەلێ وەخت توڕه بوین تو ڕەسیه، وەخت ئەوه ڕەسیه که مردگیل داوەری بون و دەسخوەشانه بێرێیده خزمەتکاریل توی یانێ وه پەێخەمەریل و ئیمانداریل وه مەسیح و ئەوانه که له ناو تو رخێان چود و حرمەت ناو توی پارێزنن، له ورد و له زرو، وەخت ئەوه ڕەسیه کەسیلێگ که زەوی له بین بەن، له بین بچن.»

¹⁹ ئمجا مابەد خودا وەناو ئاسمان واز بی و سونویخ پەێمان ئەیو وەناو مابەدەگەێ کەفته دەیشت و له ناکاوەو بیه بڵاچه، گرمەگرم و هەورەتریقه وه گوش رەسیا و زەوی لەرزه بی و خوڕوم تگر بی.