نامەێ فیلیپییل 4 - کتاب مقدس به زبان کردی جنوبی - گویش کلهوری

¹ جا، ئێ برایل عەزیزم که تاسەێ دیندان دێرم، ئێ ئیوه که خوەشی و تاج سەر منین، ئێ عەزیزەیلم، وەئیجوره وەناو خوداوەند بەردەوام بوین.

ئاموژیاریێل ئاخر

² لاڵکیەمه ئفودیه و له سینتیخی لاڵکیەم که وەناو خوداوەند یەێ فکر بون.

³ ئەرێ، له تنیش ئێ هاوکار ڕاسەکانی، له لێد توام که ئی دوگله ژنه مەیەت بێید، چوینکه وەگەرد ئەکلیمنتوس و ئەو باقی هاوکارەگانم که ناوێان وەناو دەفتەر زنەیی نویسریاس، شان وه شان مه ئەڕا کار ئینجیل زامەت کیشانه.

⁴ هەمویشه وەناو خوداوەند خوەشاڵ بوین؛ وه دوارەیش ئویشم: خوەشاڵ بوین.

⁵ بیلن تا خوەشڕوییدان ئەڕا گشتیەکی ئاشکرا بود. هاتن خوداوەند نزیکه.

⁶ ئەڕا هویچ چشتێگ نگران نوین، بەڵکەم وەناو هەر چشتێگ وەگەرد دوعا و لاڵکیان، وەگەرد شوکرکردن، هەر چی خوەدان تواین وه خودا بویشن.

⁷ ئاشتی و سڵامەتی خودا که فره بانتر له گشت فامەیله، دڵیل و فکریلدان وەناو مەسیح عیسا پارێزنێد.

⁸ ئاخرسەر، ئێ برایل، هەر چشتێ که ڕاسه، هەر چشتێ که حرمەت دێرێ، هەر چشتێ که درسه، هەر چشتێ که پاکه، هەر چشتێ که بود دوسی بیاشتوین و هەر چشتێ که تاریفیه. ئەگەر چشتێ هەس که فره خاسه و ئەگەر چشتێ هەس که تیەرزێ ستایشێ بکێ، وه ئی چشتیله فکر بکێن.

⁹ هەر چشتێ که له مه یاێ گردینه و قەبوڵ کردینه و هەر چشتێ که له مه شنەفتینه و له لێم دینه، ئی چشتیله وه جێ بارین، که خوداێ ئاشتی و سڵامەتی ها گەرددانەو.

سپاس ئەڕا خەڵاتییل

¹⁰ وەناو خوداوەند فره خوەشاڵم که ئێرنگه ئیوه دەس ئاخر ئەو نگرانیه که ئەڕا من دێرین وەناو خوەدان زنەوه کردینه. ئیوه وەڕاسی نگرانم بین، وەلێ دەرفەتێگ ئەڕا نیشان داین ئەوه نیاشتین.

¹¹ ئیه له سەر هەوەجی نیویشم، چوینکه یاێ گردمه که له هەر وەزوحالێگ باێه قانێ بوم.

¹² هەم زانم دەستەنگێ چەس، هەم زانم زنەیی کردن وەناو فراوانی چەس. وه هەر حاڵێگەو، رەمز راز زنەیی کردن وەناو تێرێ و ورسیایی و فراوانی و دەستەنگێ یاێ گردمه.

¹³ هەر کارێگ تویەنم بکەم له ڕێ مەسیح که تویەنایی بەخشیده پێم.

¹⁴ هەمباز، مەرەمەت کردین که وەناو زامەتم هاوبەش بوین.

¹⁵ ئیوەیش، ئێ فیلیپییل، خوەدان خاس زانين که وه شرو کار ئینجیل، وەشون ئەوه که مەنتەقەی مەقدونیه هیشتمه جێ، هویچ کلیساێگ له باوەت داین و گردن وەگەردمەو هاوبەش نوی، تەنیا بێجگه ئیوه.

¹⁶ تەنانەت زەمانێگ که وەناو شار تسالونیکی بیم، ئەڕا پەرچەو کردن هەوەجیێلم، مەێەت ئەڕام کل کردین و وەدواره کل کردین.

¹⁷ نه ئیەک وەشون گردن خەڵاتی بوم، بەڵکەم هامه شون بەرێگەو که وه حساودان فرەوه بود.

¹⁸ من گشت ئەو پویله تاویل گردمه و تەنانەت فرەتر له هەوەجی خوەم دێرم. ئیسه که خەڵاتیلی که ئیوه هناردین له ئەپافرودیتوس تاویل گردمه، له گشت چشتێگ فره فره دێرم. خەڵاتیەگەدان هویرات خوەشبو و قوروانی قەبوڵ کریاێگه که خودا خوەشنود کەێد.

¹⁹ خوداێ مه، گشت هەوەجیێل ئیوه وه پێ دەوڵەمەنی پڕ جەڵاڵ خوەێ وەناو مەسیح عیسا پەرچەو کەێد.

²⁰ وه خودامان، باوگ ئاسمانیمان تا ئەبەد و تا ئەبەد جەڵاڵ بود. ئامین.

دورودیل ئاخر

²¹ وه گشت موقەدەسیل وەناو مەسیح عیسا سڵام برەسنن. برایلێ که هانه گەردمەو، وه ئیوه سڵام رەسنن.

²² گشت ئیمانداریل وه مەسیح که هانه ئێرا وه ئیوه سڵام رەسنن، وه تایبەتی ئەوانه که ئاڵ ماڵ ئمپراتورن.

²³ فیز خوداوەند عیسا مەسیح وەگەرد روح ئیوه بود.