نامه وه فیلیمون 1 - کتاب مقدس به زبان کردی جنوبی - گویش کلهوری

¹ له پولوس، زندانی مەسیح عیسا و براگەمان تیموتاوس، وه هاوکار عەزیزمان فیلیمون،

² وه خویشگمان ئاپفیا و هاورەزم ئیمه ئارخیپوس و کلیساێگ که ها ناو ماڵد:

³ فیز و ئاشتی و سڵامەتی له لاێ خودا، باوگ ئیمه و خوداوەند عیسا مەسیح وه ملدانەو بود.

سپاس و دوعا کردن

⁴ مه هەر وەختێگ وەناو دوعایلم تو تیەرمه هویرم، هەمویشه سپاس خوداێ خوەم کەم،

⁵ ئەڕا ئیه که مابەت و ئیماند وه خوداوەند عیسا و گشت ئیمانداریل مەسیح که دێرێ، شنەفم.

⁶ دوعا کەم که هاوبەش بوین ئیماند مەیەت بێی ئەڕا هەر چشت خاسێ که وەبونەێ مەسیح ها ناومان، ئاگاداری کامڵ پەێا بود.

⁷ چوینکه براگەم، مابەت توی منیش حساوی خوەش و دڵگەرمەو کردێه، ئەڕا ئیه که توی دڵ ئیمانداریل مەسیح تازەوه کردیده.

داوا کارێ پولوس له باوەت ئونسیموس

⁸ وه ئی بونه، هەر چەن وەناو مەسیح ئی ئازایه دێرم که حوکم بکەمه پێد تا هەر چی له لێد داوا کریەد وه جێ باری،

⁹ وه ئی حاڵەو خاستر زانم که له ڕوی مابەت له لێد داوا بکەم. جا مه، پولوس پیر، که ئێرنگەیش ئەڕا مەسیح عیسا زندانیم،

¹⁰ له باوەت ڕوڵەم ئونسیموس که وەناو زندان ئەڕاێ بیمەسه باوگ، داواکاریگ له لێد دێرم.

¹¹ ئەوه جاران ئەڕاد هویچ قازانجێگ نیاشت، وەلێ ئێرنگه وه ڕاسی هەم ئەڕا توی و هەم ئەڕا منیش قازانج دێرێ.

¹² ئەوه که جگر گوشەێ منه وه دواره کلیەو کەم ئەڕا لاد.

¹³ تواسم له لاێ خوەم گیرێ بێەم تا له ماوەێگ که وەبونەێ ئینجیل هامه زندان، له جێ توی خزمەت وه مه بگرێه ملەو.

¹⁴ وەلێ نەتواسم کارێگ کردویم بی ئیه که توی قەبوڵ بکێد، تا خاسێ کردنێد وه گێ دڵیگ بود، نه که وادارد بکەم.

¹⁵ هاتێ هەر وه ئی باوەته بی که ماوەێگ له لێد جیاوه بی تا ئەوه ئەڕا هەمویشه باێدەو ئەڕا لاد،

¹⁶ وەلێ دیتر نه جور خوڵام، بەڵکەم بانتر له خوڵام، جور یە براێ عەزیز. ئەوه ئەڕا مه فره عەزیزه، وەلێ ئەڕا توی هەڵبەت فره عەزیزه، تواێ له جیگەێ یەێ ئنسان و تواێ له جیگەێ براێگ وەناو خوداوەند.

¹⁷ جا ئەگەر مه وه دوس خود زانید، ئەوه هەر ئەوجورە قەبوڵ بکه که چماێ مه قەبوڵ کەید.

¹⁸ ئەگەر خراوێگ وه پێد کردێه، یا چشتێگ وه پێد قەردداره، ئەوه بنه حساو مه.

¹⁹ مه، پولوس، وه دەس خوەم نویسم که تاوانێ دەم، هەڵبەت هەوەجیگ نێری که بویشم تەنانەت گیان خوەدیش و مه قەردداری.

²⁰ ئەرێ ئێ برا، توام وەناو خوداوەند نەفێگ له توی برەسده پێم؛ جا دڵ مه وەناو مەسیح تازەوه بکه.

²¹ ئیه نویسم چوینکه دڵنیام گوشە لێم تەکنێد و زانم تەنانەت فرەتر له ئەو چشته که ئویشم، وه جێ تیەرێد.

²² هەر ئیجوره، وتاخێگیش ئەڕام گورجەو بکه، ئەڕا ئیه که ئمید دێرم خودا دوعایلدان قەبوڵ بکێ و وه فیز خوەێ مه وه دواره بارێدەو ئەڕا لادان.

²³ ئپافراس، هاو زندان من وەناو مەسیح عیسا، سڵامد رەسنێد.

²⁴ هەر ئیجوره هاوکارەگانم، مەرقوس، ئاریستارخوس، دیماس و لوقا سڵامد رەسنن.

²⁵ فیز خوداوەند عیسا مەسیح وەگەرد روح ئیوه بود.