مەرقوس 9 - کتاب مقدس به زبان کردی جنوبی - گویش کلهوری

¹ عیسا وەپێان وەت: «وه ڕاسی، وەپێدان ئویشم، بڕێگ وه ئێرا وسانه تا پادشایی خودا که وه هێزەو تێد نوینن، تام مەرگ نیەکەن.»

گویڕیان شێوەێ عیسا

² وەشون شەش ڕوژ، عیسا پتروس و یاقوب و یوحەنا وه تەنیا برده ئەڕا بان کویەێ بەرزێگ تا تەنیا بون. وه ئەوره، له لاێ ئەوانه، دەمچەوی گویڕیا.

³ دڵنگەگەێ فره چەرمیەو بی و بریقه دیا، ئەوجورە که وەناو دنیا هویچکەس نیەتویەنی دڵنگەگەێ ئەوقره چەرمێەو بکێ.

⁴ وه ئەو وەخته، ئەلیاس پەێخەمەر و موسای پەێخەمەر وه نوای چەویان دیاردان و وەگەرد عیسا نیشتنه قسیه و باس کردن.

⁵ پتروس وه عیسا وەت: «ماموستا، فره خاسه هایمنه ئێرا. جا بیل تا سێ گله کوڵا درس بکێم، یەکی ئەڕا تو، یەکی ئەڕا موسا و یەکیگیش ئەڕا ئەلیاس.»

⁶ پتروس نیەزانستیا چه بویشی، چوینکه گەن جور زاورێان چوی.

⁷ ئمجا هەوریگ ساێەڕ خسته ملێان و دەنگێگ وەناو هەورگەوه هات، «ئیەسه کوڕه عەزیزەگەم، گوش بێەنه لێ.»

⁸ لەناکاوا، وەختێ نوڕینه دەور خوێان، کەسێگ تر بێجگه عیسا له لاێ خوێانا نین.

⁹ وەختێ له کویەگەوه هاتیانه خوار، عیسا وەپێان فەرمان دا ئەو چشته که دينه ئەڕا کەسێ نویشن تا وەختێ که کوڕ ئنسان وەناو مردگیل زنیەو بود.

¹⁰ ئەوانه ئی هەڵکەفته وه بین خوێان هیشتنەێ، وەلێ له یەکترەکی پرسیان ’زنیەو بین له مردگیل‘ چەس.

¹¹ ئمجا له عیسا پرسین: «ئەڕا ماموستایل تەورات ئویشن یەکم جار باێه ئەلیاس باێ؟»

¹² عیسا جواو دا: «ئیه درسه که یەکم جار ئەلیاس تێ تا گشت چشتێگ جور جارانێ ڕیکڕاس بکێ. وەلێ ئەڕا له باوەت کوڕ ئنسان نویساس که باێه رەنج فرەێگ بکیشێ و سوکەو بکرێی؟

¹³ وەلێ وه ئیوه ئویشم ئەلیاس، ئەوجورە که له باوەتێەو نویسریاس، هات و ئەوانه هەر چی تواسن وەگەردیەو کردن.»

شەفاێ کوڕێگ که روح ناپاک داشت

¹⁴ وەختێ رەسینه لاێ ئەو شاگردەگان، دین جەماێەت فرەێگ وه دەوریانەو وسانه و ماموستایل تەوراتیش وەگەردێان باس کردیان.

¹⁵ جەماێەتیش تا عیسا دین، گشتێان سەریان سڕ مەن و وه دەودەوان هاتن سڵامێ کردن.

¹⁶ عیسا پرسی: «له باوەت چ چشتێ وەگەردێان باس کین؟»

¹⁷ پیاێگ وەناو جەماێەت جواو دا: «ماموستا، کوڕەگەم هاوردمەسه ئەڕا لاد. ئەوه تویش روحێگه که تویەناێ قسیه کردن وه لێ سەنديه.

¹⁸ وەختێ گرێدەێ، کوتێدێ زەویا، جوری که دەمێ کەف کەی و دگانیلی فشار دەێده یەکەو، گیانێ وشک بود. له شاگردەگاند تواسم ئەو روحه بکەنه دەیشت، وەلێ نەتویەنستن.»

¹⁹ عیسا وەپێان وەت: «ئێ نەتەوەێ بی ئیمان، تا کەی وەگەرد ئیوه بمێنم؟ تا کەی تاموڵدان بکەم؟ بارنێ ئەڕا لام.»

²⁰ جا کوڕەگه هاوردنه ئەڕا لاێ عیسا. روح وەختێ عیسا دی، زویزی کوڕەگه خسته ڕکه و ئەوه کەفته زەوی و پلکیاده ناو خوڵ و کەف وه دەمێ هاتیاد.

²¹ عیسا له باوگی پرسی: «چەن وەخته ئیجورەسه؟» جواو دا: «له مناڵیەو.

²² ئی روحه چەن جار خستيەسەی ناو ئاو و ئاگر تا بکوشیدی. وەلێ ئەگەر تویەنی کارێ بکەی، بەزییده پێمان باێد و مەیەتمان بیه.»

²³ عیسا وەت: «ئەگەر تویەنی؟ ئەڕا کەسێ که ئیمان دێرێ گشت چشتێگ بود.»

²⁴ باوگ کوڕەگه زویزی وه دەنگ بەرز وەت: «ئیمان دێرم؛ مەیەتم بیه تا ئیمانم فرەترەو بود!»

²⁵ وەختێ عیسا دی جەماێەتێگ وه دەودەوان دێرن تیەن، وه روح ناپاکەگه تەشەری دا، وەت: «ئێ روح کەڕ و لاڵ، وەپێد فەرمان دەم له لێ بەوه دەیشت و دی هەراێهەر نەچیده ناوێ!»

²⁶ روح قیڕەێگ کرد و کوڕەگه خسته ڕکه، له لێ هاته دەیشت. کوڕەگه جور مردگێگ وەپێ هاتوی، جوری که فرەێگ وه مەردمەگه وەتیان: «مردگه.»

²⁷ وەلێ عیسا دەس کوڕەگه گرد و هێزێ دا، کوڕەگه هەڵسا سەر پاوه.

²⁸ وەختێ عیسا چیه ئەڕا ماڵ، شاگردەگانێ وه تەنیا له لێ پرسین: «ئیمه ئەڕا نەتویەنستيم ئەو روحه بکێمه دەیشت؟»

²⁹ عیسا وەپێان وەت: «ئی جنسه بێجگه وه دوعا نيەتێدە دەیشت.»

عیسا دواره مردن و زنیەو بین خوەێ پێشگویی کەی

³⁰ ئەوانه ئەو شونه هیشتنەجێ و وه ناوچەێ جەلیل ڕەد بین. عیسا نيەتواسیا کەسێگ بزانێ ها کوره،

³¹ چوینکه وه شاگردەگان خوەێ تالیم دیاد و وەپێان وەتیا: «کوڕ ئنسان درێیده دەس مەردم و کوشنێ. وەلێ وەشون کوشتنێ وه ڕوژ سێیەم، زنیەو بود.»

³² وەلێ شاگردەگان مەبەست عیسا حالی نوین و زاورێان چی له لێ بپرسن.

گەورایی وه چەس؟

³³ ئمجا هاتنه ئەڕا کەفەرناحوم. وەختێ وه ماڵ بین، عیسا وه شاگردەگانێ پرسی: «وەناو ڕێ له باوەت چه چشتێ باس کردیاين؟»

³⁴ وەلێ ئەوانه بیدەنگ مەنن، چوینکه وەناو ڕێ وه سەر ئیه باس کردیان که وەناو ئەوانه کی گەوراتره.

³⁵ عیسا دانیشت و ئەو دوانزه شاگرده چڕێ و وەت: «هەر کەس بتواێ یەکمین بود، باێه ئاخرین گشتێ و خزمەتکار گشتێ بود.»

³⁶ ئمجا مناڵێگ هێز دا، نادێ ناوڕاسیان و گردێ باوشەو، وەپێان وەت:

³⁷ «هەر کەس ئیجور مناڵێگ وه ناو منەو قەبوڵ بکێ، مه قەبوڵ کردێه؛ هەر کەیش مه قەبوڵ بکێ، نه مه، بەڵکەم ئەوه که مه کل کردێه قەبوڵ کردێه.»

هەر کەس وه زد ئیمه نیه، ها گەرد ئيمه

³⁸ یوحەنا وه عیسا وەت: «ماموستا، یەکی دیمن وه ناو تنەو دێو دەر کردیا، وەلێ وەبونەێ ئیه که له ئیمه نوی، نەێشتیمنەێ.»

³⁹ وەلێ عیسا وەت: «نوای نەگرن، چوینکه کەسێ نیەتویەنی وه ناو منەو موجزه بکێ و وەشونێ وه حەقمیش قسیەێ خراو بکێ.

⁴⁰ چوینکه هەر کەس وه زد ئیمه نیه، ها گەرد ئيمه.

⁴¹ چوینکه وه ڕاسی، وه ئیوه ئویشم، هەر که وەبونەێ ئیه که هن مەسیحین، جامی ئاو بيده دەسدانەو، بێ گومان بی دەسخوەشانه نيەمينێ.

تالیم له باوەت خەڵەتیان و گونا

⁴² «هەر کەیش بایس بود یەکیگ وه ئی بویچگیله که وه من ئیمان دێرن تویش گونا بود، ئەڕاێ خاستر ئیه بی هارئاسیاو گەوراێگ بخەنه ملێ و فڕەی بێەنه ناو دەریا!

⁴³ ئەگەر دەسد تویش گوناد کەی، بوڕێ. چوینکه ئەڕاد خاستر ئیەسه کوچ بچیه ناو ژیان ئەبەدی تا ئیه که وه هەردگ دەسەو بچیه ناو جەهەنم، وەناو ئاگرێ که هویچ وەخت نیەکوشرێیدەو.

⁴⁴ جێ که کرمێان نیەمرن و ئاگرەگه نیەکوشرێیدەو.

⁴⁵ ئەگەریش پاد تویش گوناد کەی، بوڕێ. چوینکه ئەڕا تو خاستر ئیەسه شەل بچیه ناو ژیان ئەبەدی، تا ئیه که وەگەرد هەردگ قولد فڕه بیەرێیه ناو جەهەنم.

⁴⁶ جێ که کرمێان نيەمرن و ئاگرەگه نیەکوشرێیدەو.

⁴⁷ ئەگەریش چەود تویش گوناد کەی، دەرێ بار، چوینکه ئەڕا تو خاستر ئیەسه وه یەێ چەو بچیه ناو پادشایی خوداوه تا ئیه که وەگەرد هەردگ چەو فڕه بیەرێیده ناو جەهەنم،

⁴⁸ شونێگ که «”کرمێان نيەمرن و ئاگرەگه نیەکوشرێیدەو.“

⁴⁹ «چوینکه گشتیەکی وەگەرد ئاگر نمەکینەو بون.

⁵⁰ نمەک خاسه، وەلێ ئەگەر تامێ له دەس بێی، چوی بو وه دواره سوڵەو بکرێ؟ ئیوەیش وەناو خوەدان نمەک بیاشتون وەگەرد یەکترەکی وه ئاشتی و سڵامەتی بیەینێ سەر.»