مەرقوس 15 - کتاب مقدس به زبان کردی جنوبی - گویش کلهوری

بازخواز وه نوای پیلاتوس

¹ دەم شەوەکی زوی بێ ماتەڵی، سەران کاهنیل وەگەرد شێخیل و ماموستایل تەورات و گشت شوراێ جویلەکە نیشتنه مەشویرەت کردن، عیسا وه دەس بەسریای بردنێ و دانەێ دەس پیلاتوس فەرماندار رومی.

² پیلاتوس له عیسا پرسی: «تو پادشاێ جویلەکەیلی؟» عیسا جواو دا: «تو خوەد ئیجوره وەتی!»

³ سەران کاهنیل بخت فرەێگ کردنه پێ.

⁴ جا پیلاتوس وه دواره له لێ پرسی: «هویچ جواوی نێری بێی؟ بنوڕ چەنێ بخت کەنه پێدەو!»

⁵ وەلێ وه دواره عیسا هویچ جواوێ نیا، جورێ که پیلاتوس سەری سڕ مەن.

⁶ پیلاتوس وه پێ نەریتیگ هەر ساڵ له وەخت جەشن پسەخ، ئەو زندانیه که مەردم تواسیان ئەڕاێان ڕزگار کردیاد.

⁷ وەناو یاخییلێگ که وه جرم خوینکردن وەناو شوڕش کەفتوینه زندان پیاێگ بی باراباس ناو.

⁸ مەردم هاتنه ئەڕا لاێ پیلاتوس و له لێ تواسن نەریت خوەێ ئەڕاێان وه جێ بارێ.

⁹ پیلاتوس وه جواویان وەته پێان: «تواین پادشاێ جویلەکە ئەڕادان ڕزگار بکەم؟»

¹⁰ ئیه وه ئەو بونه وەت که زانستوی سەران کاهنیل وه سەر حەسویی عیسا دانەسه دەسێ.

¹¹ وەلێ سەران کاهنیل گاڵ مەردمەگه دان تا وه پیلاتوس بتوان وه جاێ عیسا، باراباس ئەڕاێان ڕزگار بکێ.

¹² ئمجا پیلاتوس یەێ جارتر له لێان پرسی: «ئێ وەگەرد ئی پیا که ئویشین پادشاێ جویلەکەس، چه بکەم؟»

¹³ ئەوانه هاوار کردن: «بکوتێ بان سەلیب!»

¹⁴ پیلاتوس له لێان پرسی: «ئەڕا چه؟ چ کار گەنێگ کردێه؟» وەلێ ئەوانه وه دەنگ بەرزتر هاوار کردن: «بکوتێ بان سەلیب!»

¹⁵ جا پیلاتوس که تواسیا مەردم رازی بون، باراباس ئەڕاێان ڕزگار کرد و دا عیسا قەمچی دان و سپاردەێ تا بکوتنێ بان سەلیب.

تویلەکی کردن وه عیسا

¹⁶ ئمجا سەربازیل، عیسا بردنه ئەڕا ناو حسار کاخ، یانێ کاخ فەرمانداری، گشت سەربازیلیش وه دەور یەکەو گردەو کردن.

¹⁷ ئمجا بەتیەێگ ئەرخەوانی کردنه وەرێ و تاجێگ له دڕگ چنین، نانه سەری.

¹⁸ ئمجا وەنوای عیسا چەمیانەو وەپێ وەتیان: «سڵام ئێ پادشاێ جویلەکەیل!»

¹⁹ وه چو دیانه ناو سەری و تف کردیانه ڕوی، وه نوای زرانی دیانه زەوی و سجدەی کردیان.

²⁰ وەشون ئیه که تویلەکی وەپێ کردن، بەتیه ئەرخەوانیەگە له وەرێ دەر هاوردن و دڵنگەگان خوەێ کردنه وەرێ. ئمجا بردنێ دەیشت تا بکیشنێ سەلیب.

وه سەلیب کیشاین عیسا

²¹ ئەوانه ڕێویارێگ شەمعون ناو له مەردم قیرەوان که باوگ ئەسکەنەر و روفوس بی و له دەیشت شار هاتیاد، ناچاری کردن تا سەلیب عیسا هەڵبگرێ.

²² جا عیسا بردنه ئەڕا شونێ که ناوێ جولجوتا بی، که وه ماناێ کاسەێ سەره.

²³ شراو هامیته وه موڕ دانه پێ، وەلێ قەبوڵ نەکرد.

²⁴ ئمجا کیشانێ سەلیب و دڵنگەگانێ وەناو خوێان بەشەو کردن، ئەڕا مالوم کردن بەش هەر کامێان تیرپشک خستن.

²⁵ سات نو شەوەکی بی که عیسا کوتانه بان سەلیب.

²⁶ وەناو تەخسیر نامەگەێ نویسریا: «پادشاێ جویلەکە.»

²⁷ دو گله ڕێگریش وەگەردیەو کیشانه سەلیب، یەکیگێان له لاێ ڕاسی و ئەواکەیش له لاێ چەپی.

²⁸ هەر ئیجوره ئەوه که وەناو کتاو موقەدەس نویسریاس وه دی هات، که ئویشێ: «ئەوه وه خەتاکاریل وه حساو هات.»

²⁹ ڕێویاریل سەر لەقانیان، قسیەێ گەن وەپێ کردیان و وەتیان: «تو که تواسیاێ مابەد خودا بڕمنێ و وەناو سێ ڕوژ وه دواره بسازیدێ،

³⁰ خوەد نجات بیه له سەلیب بەوه خوار!»

³¹ سەران کاهنیل و ماموستایل تەوراتیش وەناو خوێان تویلەکی وەپێ کردیان و وەتیان: «کەسیلێ تر نجات دا وەلێ نیەتویەنی خوەێ نجات بێی!

³² بیل تا مەسیح، پادشاێ ئێسرائیل، ئێرنگه وه سەلیب داوەزی تا بوینیم و ئیمان باریم.» ئەو دو نەفەریشه که وەگەردیەو وەبان سەلیب بین قسیەێ گەن وەپێ کردیان.

مردن عیسا

³³ له سات دوانزەێ نیمەڕو تا سات سێ دویای نیمەڕو، تیەریکی، گشت ئەو وڵاته گرده وەر.

³⁴ له سات سێ دویای نیمەڕو عیسا وه دەنگ بەرز هاوار کرد: «ئیلویی، ئیلویی، لەما سەبەقتەنی؟» یانێ «ئێ خوداێ من، ئێ خوداێ من، ئەڕا مه هیشتیدە جێ؟»

³⁵ جا بڕێگ که وه ئەوره وساوین وەختێ ئیه شنەفتن، وەتن: «ئەوەسه، ئەلیاس پەێخەمەر چڕێ.»

³⁶ جا یەکی دەویه نواو ئەبرێگ خەڵپانه ناو شراو ترشیای و نادێ سەر چوێگ و بردێ نوای دەم عیسا تا بخوێ، وەت: «بیلنی حاڵ خوێەو تا بوینیم ئەلیاس تێ وه سەلیب بارێدەێ خوار؟»

³⁷ جا عیسا وه دەنگ بەرز هاوار کرد و هەناس ئاخرێ هەڵکیشا.

³⁸ ئمجا پەردەێ مابەد له بان تا خوار بیه دو کوتەو.

³⁹ وەختێ فەرماندەێ سەربازەگان که وه ڕوی وه ڕوی عیسا وساوی، دیەێ چوی گیان سپارد، وەت: «وه ڕاسی ئی پیا کوڕ خودا بی.»

⁴⁰ قێرێ له ژنيلیش له دویرەو نوڕیان. وەناوێان مریەم مەجدەلیه، مریەم داڵگ یاقوب بویچگ و یوشا و سالومه بین.

⁴¹ ئی ژنيله وەختێ عیسا وه جەلیل بی، کەفتوینه شونێ و خزمەتی کردوین. قێر فرەێگ له ژنيل تریش که وەگەردێ له ئورشەلیم هاتوین، وه ئەوره بین.

خاکسپاری جنازەێ عیسا

⁴² ئەو ڕوژه، ڕوژ ’گورجەو کردن‘، یانێ ڕوژ وەرجه شەبات که هەر ئەو شەمەێ موقەدەس جویلەکەیلەسه، بی. جا ئێواره،

⁴³ یوسف ناوێ له مەردم رامه، که بەش حرمەتدارێگ له شوراێ جویلەکە بی و چەوەڕێ هاتن پادشایی خودا کردیا، جرئەت کرد و چیه ئەڕا لاێ پیلاتوس داواێ جنازەێ عیسا له لێ کرد.

⁴⁴ پیلاتوس باوەڕ نەکردیا عیسا وه ئی زویه مردگه، فەرماندەێ سەربازیل چڕێ تا بزانێ عیسا گیان سپاردیه یا نه.

⁴⁵ وەختێ پیلاتوس له فەرماندەێ سەربازیل زانست که هەر ئیجورەسه، جنازەێ عیسا سپارده یوسف.

⁴⁶ یوسفیش پارچەێ له کەتان سەند و جنازەگەێ له سەلیب هاورده خوار، پێچانێ ناو کەتان و نادێ ناو مەقبەرەیگ که وەناو تاش کەمەر تاشیاوی. ئمجا کوچگی پل دا دەم دەر مەقبەرەگه.

⁴⁷ مریەم مەجدەلیه و مریەم، داڵگ یوشا، دینەێ که عیسا نریاده کوره.