مەرقوس 13 - کتاب مقدس به زبان کردی جنوبی - گویش کلهوری

نیشانەیل خراو بوین مابەد

¹ وەختێ عیسا له مابەد هاتیاده دەیشت، یەکی له شاگردەگانێ وەپێ وەت: «ماموستا، بنوڕ! چ کوچگيل و چ بەنايل ئەڵاجویێگ!»

² وەلێ عیسا وەپێ وەت: «گشت ئی بەنايل گەورا دوینی؟ ئیه بزان کوچگی وه مل کوچگی تر نیەمینێ، بەڵکەم گشتێ ڕمێده خوار.»

³ وەختێ عیسا وەبان کویەێ زیتون وه ڕوی وه ڕوی مابەدەگه نیشتوی، پتروس و یاقوب و یوحەنا و ئاندریاس وه تەنیایی له لێ پرسین:

⁴ «وه ئیمه بویش ئیانه کێ بود و نیشانەێ نزیکەو بین زەمان هەڵکەفتن گشت ئیانه چەس؟»

⁵ عیسا وەپێان وەت: «هوشدان بود تا کەسێ گومڕادان نەکێ.

⁶ فره له کەسیل وه ناو من تیەن، ئویشن، ”مه هەر ئەوه مه“ فره وه کەسیلیش گومڕا کەن.

⁷ وەختێ له باوەت جەنگیل شنەفین و خەوەر جەنگیل وه گوشدان رەسێ، ڕخدان نەچود. ئیجور هەڵکەفتیلێ باێه بکەفێ، وەلێ هێمراێ ئاخر زەمان نویه.

⁸ ملەتێگ ئەڕا ملەتێگ‎تر و مەمڵەکەتیگ ئەڕا مەمڵەکەتی تر هەڵسێ. وه جایل جورواجور زەویه لەرزەیل تێد و بوده قاتوقڕی. وەلێ ئیانه تەنیا نیشانەیل شرو ژانیل زاینه.

⁹ «وەلێ ئیوه هوشدانه خوەدانەو بود، چوینکه دەنەدانه دەس دادگایل و وەناو کەنیسەيل دەنه لێدان و وەبونەێ مه بەنەدانه لاێ فەرمانداریل و پادشایل تا وه نوایان شاێەتی بیەین.

¹⁰ یەکم جار باێه ئینجیل ئەڕا گشت ملەتیل بانگەوازی بکرێی.

¹¹ جا هەر وەخت گردنەدان و بردندانه دادگا، وەرجه ئەوه نگران نەون چه بویشین، بەڵکەم هەر چی وه ئەو وەخته وەپێدان بیەرێی ئەوه بویشن، چوینکه ئەوه که قسیه کێ ئیوه نین بەڵکەم روح‌القودوسه.

¹² برا، براگەێ و باوگ، ڕوڵەگەێ دەێده دەس مەرگ. مناڵیل ئەڕا داڵگ و باوگێان هەڵسن و دەنێانه وەر کوشت.

¹³ گشتیەکی وەبونەێ ناو من قینێانه لێدان تێد؛ وەلێ هەر کەس تا وه ئاخر بەردەوام بمینێ، نجات پەێا کەی.

¹⁴ «وەلێ وەختێ ئەو پێس کاولکەره، وەشونێ که نەبایه وه پاوه بوینین - با خوینەر بزانێ مەبەست چەس - ئمجا ئەوانه که هانه یەهودیه، دەر بچنه ئەڕا ناو کویەگان؛

¹⁵ هەر کەیش که ها بان ماڵێگەو، ئەڕا هەڵگردن چشتێ، نایده خوار و نەچوده ناو ماڵ؛

¹⁶ هەر کەیش ها سەر زەویزار، ئەڕا بردن دڵنگەگەێ نەچوده ئەڕا ماڵ.

¹⁷ وه ئەو ڕوژیله وای وه ژنیلێگ که زگێان پڕه و داڵگیلێگ که شیر دەن!

¹⁸ دوعا بکەن تا ئی هەڵکەفتیله وه زمسان نەکەفێ.

¹⁹ چوینکه وه ئەو ڕوژیله، ئەوجورە بەردیگ پێش تێ که له شرو جهان که خودا وه دی هاورد تا ئێرنگه پێش ناتیه و هویچ وەختیش پێش نیەتێید.

²⁰ ئەگەر خوداوەند ئەو ڕوژیله کوڵەو نەکردیا، هویچ ئایەمی گیان ساق وه دەر نیەوەردیا. وەلێ وەبونەێ هەڵوژاردەیلی که خوەێ هەڵوژاردیه، ئەو ڕوژیله کوڵەو کردێه.

²¹ وه ئەو دەورانه، ئەگەر کەسێ وه ئیوه بویشی: ”بنوڕن، مەسیح ها ئێرا“، یا ”بنوڕن، ئەیو ها ئەوره!“ باوەڕ نەکێن.

²² چوینکه مەسیحیل دروەکانی و پەێخەمەریل دروەکانی ئاشکرا بون و نیشانەیل و موجزەیل تیەرن تا ئەگەر بکرێ، هەڵوژاردەگان گومڕا بکەن.

²³ جا هوشدان بود، چوینکه وه نواوه، گشت ئیانه وەپێدان وەتم.

²⁴ «وەلێ وه ئەو ڕوژیله، وەشون ئەو بەرده، «”خوەر تیەریکەو بود و مانگیش دی نویر خوەێ نێی.

²⁵ هەسارەیل له ئاسمان کەفنه خوار و هێزیل ئاسمان تیەنه لەرزه.“

²⁶ ئەو وەخته مەردم کوڕ ئنسان دوینن که وه هێز و جەڵاڵ گەوراێگ وەناو هەوریلەو تێی.

²⁷ ئەوه فریشتەیل کل کەی و ئەوانه که هەڵێانوژاردوی له چوار پەر جهان، له ئی سەر زەوی تا ئەو سەر ئاسمان، وه دەور یەکەو گردەو کەی.

²⁸ «ئێرنگه، له دار هەنجیر ئی دەرسه یاێ بگرن: وەختێ پەلەگانێ جویق دەن، گڵا دەر تیەرێ، زانین تاوسان نزیکەو بیه.

²⁹ هەر ئیجوره، هەر وەخت دوینین ئی چشتیله هەڵکەفێ، بزانین هاتن کوڕ ئنسان نزیکه، بەڵکەم ها دەم دەر.

³⁰ وه ڕاسی، وەپێدان ئویشم تا ئیانه گشتێ هەڵنەکەفێ، ئی نەتەوه له بین نیەچود.

³¹ ئاسمان و زەوی له بین چود، وەلێ قسیەیل مه هەراێهەر له بین نیەچود.

هویچکەس ئەو ڕوژ و وەخته نیەزانێ

³² «وەلێ ئەو ڕوژ و ساته هویچکەس نیەزانێ بێجگه باوگ؛ تەنانەت فریشتەیل ئاسمان و کوڕیش وه لێ ئاگادار نین.

³³ جا هوشدان بود و وەخەوەر بون، چوینکه نيەزانين ئەو وەخته کەی رەسێ.

³⁴ جور پیاێگه که چیه ئەڕا گەردیان و وەختێگیش چیاد، خوڵامەگانێ هیشتویه ئەڕا سەرسامان داین ماڵەگەێ، وه هەر کامێان کارێگ داوید و وه دەربانەگەیشێ دەستور داوید وەخەوەر بمینێ.

³⁵ جا ئیوەیش وەخەوەر بون، چوینکه نيەزانين خاون ماڵ کێ تێی، شەو یا نیمه شەو، له وەخت قویلەێ کەڵەشیر یا شەوەکی.

³⁶ نەخواێ ئەوه وه ناکاوه باێ و ئیوه وەناو خەو بوینی.

³⁷ ئەوه که وه ئیوه ئویشم، وه گشتیەکی ئویشم: وەخەوەر بون!»