ئنجیل مەتا 6 - کتاب مقدس به زبان کردی جنوبی - گویش کلهوری

سەدەقه داین

¹ «هوشدان بود کاریل خاسدان وه نوای چەو مەردم نەکەین تا بویننەدان، ئەگەر نه وه لاێ باوگدان که ها له ئاسمان پاداشێگ نێرین.

² «جا وەختێ سەدەقه دەێ پف مەکه شەیپورەو، جور دوڕوییل که وەناو کەنیسەیل و خێاوانیل کەن، ئەڕا ئیه که مەردم تاریفه لێان بکەن. وه ڕاسی وەپێدان ئویشم، ئەوانه پاداش خوێان گردنه.

³ وەلێ وەختێ سەدەقه دەێ، نێل دەس چەپد بزانێ دەس ڕاسد چه کەی،

⁴ تا سەدەقەگەد شاریاویدەو. ئمجا باوگ ئاسمانید که چشتیل شاریاێ دوینی، پاداشد دەێد.

دوعا کردن

⁵ «وەختێ دوعا کەی نەبایه جور دوڕوییل بوید، چوینکه ئەوانه خوەشێان تێ بوسن و وەناو کەنیسەیل و گوشەێ خێاوانیل دوعا بکەن تا مەردم بویننیان. وه ڕاسی وەپێدان ئویشم، ئەوانه پاداش خوێان گردنه.

⁶ وەلێ تو وەختێ دوعا کەی بچوه ناو وتاخەگەد، دەرەگه بوەس و له لاێ باوگد که شاریایەوه، دوعا بکه. ئمجا باوگ ئاسمانید که چشتیل شاریایەو دوینی، پاداشد دەێد.

⁷ «وەختێ دوعا کین، جور بتپەرەسیل ئەوقره قسیەیل پویچ مەویشن، چوینکه خیاڵ کەن وه فره وەتن، دوعاێان شنەفێی.

⁸ جور ئەوانه نەون، چوینکه باوگدان وەرجه ئەوه که داوا له لێ بکێن، زانی هەوەجیدان وه چەس.

⁹ جا ئیوه ئیجوره دوعا بکەن: «ئێ باوگ ئیمه که هایده ناو ئاسمان، ناود موقەدەس بود.

¹⁰ پادشایی تو باێد. خاست تو هەر ئەو جوره که وه ئاسمان کرێید، وه مل زەویش بکرێید.

¹¹ نان ڕوژانەمان ئیمڕو بیه پێمان.

¹² قەردەگانمان بوەخش، هەر ئەوجورە که ئیمەیش قەردداریلمان بەخشیمنه.

¹³ مەخەرەمانه ناو ئەزمون، بەڵکەم وه ئەو شەڕئاشوه ڕزگارمان بکه. چوینکه تا ئەبەد، پادشایی و هێز و جەڵاڵ هن تنه. ئامین.

¹⁴ چوینکه ئەگەر خەتایل مەردم بوەخشین، باوگ ئاسمانیدانیش، ئیوه بەخشێد.

¹⁵ وەلێ ئەگەر خەتایل مەردم نەوەخشین، باوگ ئاسمانیدانیش خەتایل ئیوه نیەوەخشێ.

ڕوژه

¹⁶ وەختێ ڕوژه گرین، جور دوڕوییل دەمچەو تیەڵ نەون، چوینکه ئەوانه دەمچەو خوێان گویڕنن، تا وه لاێ مەردم نیشان بێەن هانه ڕوژه. وه ڕاسی وەپێدان ئویشم، ئەوانه پاداش خوێان گردنه.

¹⁷ وەلێ وەختێ تو ڕوژه گری، روین بیه سەرد و دەمچەود بشور

¹⁸ تا ئەڕا مەردم دیار نود که هایده ڕوژه، بەڵکەم باوگد که شاریایەوه، بزانێد. ئمجا باوگ ئاسمانید که چشتیل شاریایەو دوینی، پاداشد دێ.

گەنج ئاسمانی

¹⁹ «وەبان زەوی گەنج ئەڕا خوەدان گردەو مەکەن، شونێگ که بید و ژەنگ دەێده لێ و دزیل تیەن و دەنه لێ.

²⁰ بەڵکەم گەنج خوەدان وه ئاسمان گردەو بکەن، شونێگ که بید و ژەنگ نیەنه لێ و دزیلیش نیەتیەن و نیەنه لێ.

²¹ چوینکه گەنجەگەد وه هەر کوره بود دڵدیش ها ئەوره.

²² «چەو، چراخ جەسەس. جا ئەگەر چەود ساق بود، گشت جەسەد پڕ له نویرەو بود.

²³ وەلێ ئەگەر چەود خراو بود، گشت جەسەد پڕ له تیەریکی بود. جا ئەگەر نویری که ها ناود تیەریکی بود، چ تیەریکی گەوراێگه.

²⁴ «هویچکەس نیەتویەنی دو گله ئەرواو خزمەت بکەی، چوینکه یا وه یەکی قینێ تێ و دوس ئەواکه دێرێ، یا سەرسپردەێ یەکی بود و ئەواکه وه هویچ حساو کەی. نیەتویەنین هەم خزمەتکار خودا بوین، هەم خزمەتکار پویل.

نگران نەون

²⁵ «جا وەپێدان ئویشم، نگران زنەییدان نەون چه بخوین یا چه بنوشین، هەر ئیجوره نگران جەسە‎دان نەون که چه بکێنه وەر. مەر زنەیی له خوراک و جەسه له دڵنگ گرنگتر نیه؟

²⁶ بنوڕنه باڵەندەیل ئاسمان، ئەوانه نەکاڵن و نه درەو کەن و نه وەناو ئەمبار گردەو کەن، وەلێ باوگ ئاسمانیدان روزیێان دەێ. مەر ئیوه وه ئەوانه فرەتر نیەتیەرزین؟

²⁷ کیه وه ئیوه که بتویەنێ وەگەرد نگرانی، ساتێگ وه عومر خوەێ فرەترەو بکێ؟

²⁸ «ئێ ئەڕا نگران دڵنگین؟ بنوڕنه گوڵیل سوسەن ناو دەردەیشت که چوی گەورا بون؛ نه زامەت کیشن و نه تەشی ڕسن.

²⁹ وەلێ وه ئیوه ئویشم تەنانەت سڵێمان پادشایش وەگەرد تەمام شکو و جەڵاڵیەو جور یەکی له ئەوانه ڕەنگین نوی.

³⁰ جا ئەگەر خودا گژگیای دەیشت که ئیمڕو هەس و بانان فڕه دریده ناو تەنویرەو، ئیجوره دایپوشنی، ئێ کەم ئیمانیل، فرەتر دانیەپوشنیدەدان؟

³¹ «جا نگران نەون و نویشن چه بخویم یا چه بنوشیم و یا چه بکێمه وەر.

³² چوینکه قەومیل بتپەرەس هانه شون گشت ئی چشتیله، وەلێ باوگ ئاسمانیدان زانی وه ئی هەمگه چشته هەوەجیدان کەفێ.

³³ بەڵکەم یەکم جار وەشون پادشایی خودا و دادپەروەری بون، ئمجا ئیانیشه گشتێ دریده پێدان.

³⁴ جا نگران بانان نەون، چوینکه بانان نگرانییل خوەێ دێرێ. دەردسەریل ئیمڕو ئەڕا ئیمڕو بەسه.