ئنجیل مەتا 24 - کتاب مقدس به زبان کردی جنوبی - گویش کلهوری

پێشگویی وێران بوین مابەد

¹ عیسا وه مابەد هاته دەیشت، هەرئەوجوره که وەناو ڕێ بی شاگردەگانێ هاتنه ئەڕا لاێ تا بەناگان مابەد نیشانی بێەن.

² وەلێ عیسا وەپێان وەت: «ئیانه گشتێ دوینین؟ وه ڕاسی وەپێدان ئویشم، کوچگی وه مل کوچگی تر نیەمینێ بەڵکەم گشتێ ڕمێده خوار.»

³ وەختێ وەبان کویەێ زیتون دانیشتوی، شاگردەگانێ وه تەنیایی هاتنه ئەڕا لاێ، وەتن: «وەپێمان بویش ئی هەڵکەفتیله کەی ڕوی دەێد و نیشانەێ هاتند و ئاخر ئی دەوره چەس؟»

⁴ عیسایش جواویان دا: «هوشدان بود تا کەسێ له ڕێ دەردان نەکێ.

⁵ چوینکه فره له کەسیل وه ناو منەو تیەن، ئویشن، ”مه مەسیحم“ فره وه کەسیلیش له ڕێ دەر کەن.

⁶ هەر ئیجوره له باوەت شەڕیل شنەفین و خەوەر شەڕیل وه گوشدان رەسێ، ڕخدان نەچود. چوینکه ئیجور هەڵکەفتیلێ باێه بکەفێ، وەلێ هێمراێ ئاخر کار نەرەسیه.

⁷ چوینکه ملەتێگ ئەڕا ملەتێگتر و مەمڵەکەتیگ ئەڕا مەمڵەکەتی تر هەڵسێ. وه جایل جورواجور قاتوقڕییل و زەویەلەرزیل تێ.

⁸ وەلێ ئیانه تەنیا شرو ژان زاینه.

⁹ «ئمجا دەنەدانه دەسەو تا بەرد باێه ملدان و بکوشنەدان. گشت ملەتیل وەبونەێ ناو من قینێانه لێدان تێ.

¹⁰ وه ئەو وەخته قێر فرەێگ وه ئیمانێان هەڵوگەردیەن، وه یەکترەکی خێانەت کەن و قینێان له یەکترەکی تێ.

¹¹ پەێخەمەریل دروەکانی فرەێگ هەڵسن و قێر فرەێگیش له ڕێ دەر کەن.

¹² وەبونەێ فرەوه بوین خراوی، مابەت مەردم فرەێگ وەرەو سەردی چود.

¹³ وەلێ هەر کەس تا وه ئاخر بەردەوام بمینێ، نجات پەێا کەی.

¹⁴ ئی خەوەر خوەش پادشایه وه سەرئانسەر جهان جار درێید تا بوده شاێەتی ئەڕا گشت ملەتیل. ئمجا جهان وه ئاخر رەسێ.

¹⁵ «جا وەختێ دوینین ئەو ’پێس کاولکەره‘ که دانیاڵ پەێخەمەر باسێ کردێه، وەشون موقەدەس وساسه پاوه - با خوینەر بزانێ -

¹⁶ ئمجا هەر کەس که ها ناو یەهودیه دەر بچوده ئەڕا ناو کویەگان؛

¹⁷ هەر کەیش که ها بان ماڵیگەو، ئەڕا هەڵگردن چشتێگ له ناو ماڵی، نایده خوار؛

¹⁸ هەر کەیش ها سەر زەویزار، ئەڕا بردن دڵنگەگەێ نەچودەو.

¹⁹ وای وه ژنیلێگ که وه ئەو ڕوژیله زگێان پڕه و داڵگیلێگ که شیر دەن!

²⁰ دوعا بکەن که دەرچیندان وه زمسان یا وه ڕوژ شەبات که هەر ئەو شەمەێ موقەدەس جویلەکەیله نود.

²¹ چوینکه وه ئەو وەخته، ئەوجورە بەرد گەوراێگ پێش تێ که له شرو جهان تا ئێرنگه پێش ناتیه، هویچ وەختیش پێش نیەتێید.

²² ئەگەر ئەو ڕوژیله کوڵەو نویاتیاد، هویچ بەشەرێگ گیان ساق وه دەر نیەوەردیا. وەلێ وەبونەێ هەڵوژاردەیل ئەو ڕوژیله کوڵەو بود.

²³ «وه ئەو وەخته، ئەگەر کەسێ وه ئیوه بویشی، ”بنوڕ، مەسیح ها ئێرا“، یا ”مەسیح ها ئەوره!“ باوەڕ نەکێن.

²⁴ چوینکه مەسیحیل دروەکانی و پەێخەمەریل دروەکانی تیەن و نیشانەیل و موجزەیل گەورا تیەرن تا ئەگەر بکرێ، تەنانەت هەڵوژاردەگان له ڕێ دەر بکەن.

²⁵ بنوڕن، وه نواوه گشتێ چشتێ وەپێدان وەتمه.

²⁶ جا ئەگەر وەپێدان وەتن، ”بنوڕن، مەسیح ها ناو بیاوان،“ نەچنه ئەوره؛ ئەگەریش وەتن، ”بنوڕن، ها وتاخ پشتینه،“ باوەڕ نەکەن.

²⁷ چوینکه هەر ئەو جوره که هەورەتریقه وه ڕوژهەڵاتەو دیار دەێ و تا ڕوژئاوا ڕوشناوه کەی، هاتن کوڕ ئنسانیش هەر ئیجوره بود.

²⁸ هەر کوره لەشێگ بود، وه ئەوره بوده داڵەگڕان.

²⁹ «زویزی، وەشون بەرد ئەو ڕوژیله، «”خوەر تیەریکەو بود و مانگیش دی نویر خوەێ نێی. هەسارەیل وه ئاسمان کەفنه خوار و هێزیل ئاسمانیل تیەنه لەرزه.“

³⁰ ئمجا نیشانەێ کوڕ ئنسان وەناو ئاسمان کەفێه دەیشت، ئەوسا گشت هوزیل زەوی ئازیەتباری کەن و کوڕ ئنسانیش دوینن که وه هێز و جەڵاڵ فره گەوراێگ وه مل هەوریل ئاسمانەو تێید.

³¹ ئەیو فریشتەگانێ وه دەنگ بەرز شەیپور کل کەی و ئەوانه هەڵوژاردەگان ئەیو له چوار پەر جهان، له ئی سەر تا ئەو سەر ئاسمان، وه دەور یەکەو گردەو کەن.

³² «ئێرنگه، له دار هەنجیر ئی دەرسه یاێ بگرن: هەر ئیه که پەلەگانێ جویق دەن و گڵا دەر تیەرێ، زانین تاوسان نزیکەو بیه.

³³ هەر ئیجوره، هەر وەخت گشت ئی چشتیله دوینین، بزانین که هاتن کوڕ ئنسان نزیکه، بەڵکەم ها دەم دەر.

³⁴ وه ڕاسی، وەپێدان ئویشم تا گشت ئی چشتیله هەڵنەکەفێ، ئی نەتەوه له بین نیەچود.

³⁵ ئاسمان و زەوی له بین چود، وەلێ قسیەیل مه هەراێهەر له بین نیەچود.

ئەو ڕوژ و ساته هویچکەس نیەزانێ

³⁶ «وەلێ ئەو ڕوژ و ساته هویچکەس نیەزانێ بێجگه باوگ؛ تەنانەت فریشتەیل ئاسمان و کوڕیش وه لێ ئاگادار نین.

³⁷ وەخت هاتن کوڕ ئنسان مێنیده ڕوژگار نوح.

³⁸ چوینکه وه ئەو ڕوژەیل وەرجه لافاوەگه، مەردم خواردیان و نوشیان و ژن خوازیان و شوی کردیان، تا ئەو ڕوژه که نوح چیه ناو کەشتیەگه و

³⁹ ئەوانه نیەزانستیان چه بود، تا ئەو وەخته لافاوەگه هات و گشتێان وەگەرد خوێەو برد. هاتنەوەێ کوڕ ئنسانیش هەر ئیجوره بود.

⁴⁰ وه ئەو وەخته دو پیا که هانه ناو زەویزار، یەکیگێان برێید و ئەواکه هیلنه جێ.

⁴¹ دو ژن که وەگەرد یەکەو دەسهار کەن یەکیگێان برێید و ئەواکه هیلنه جێ.

⁴² جا وەخەوەر بون، چوینکه نيەزانين خوداوەنددان وه چ ڕوژیگ تێید.

⁴³ وەلێ ئیه بزانن ئەگەر خاون ماڵ بزانستیا دز وه چ ساتێگ له شەو تێد، وه خەوەر مەنیاد و نەێشتیاد دز بێیده ماڵەگەێ.

⁴⁴ ئمجا ئیوەیش باێه گورجەو بوین، چوینکه کوڕ ئنسان وه یەێ ساتێگ تێ که چەوەڕێی نین.

⁴⁵ «جا ئەو خوڵام ئەمین و زانا کیه که ئەرواوەگەێ ئەوه ناسه بان سەر ئاڵ ماڵەگەێ تا له وەخت خوەێ نانەگەیان بێی؟

⁴⁶ خوەش وه حاڵ ئەو خوڵامه که وەختێ ئەرواوەگەێ تێد، دوینی خەریک هەر ئی کارەسه.

⁴⁷ وه ڕاسی وەپێدان ئویشم، ئەوه دا نێده بان سەر گشت دارایەگەێ خوەێ.

⁴⁸ وەلێ ئەگەر ئەو خوڵام شەڕئاشوه وه خوەێ بویشی که ”ئەرواوەگەم وه هاتنێ دێر کردێه،“

⁴⁹ شرو بکێده کوتاین هاوکاریل خوەێ و وەگەرد سەرخوەشیل بنیشێده خواردن و نوشاین،

⁵⁰ ئەوسا ئەرواو ئەو خوڵامه ڕوژی که خوڵامەگه چەوەڕێی نیه وه یەێ ساتێگ که وه لێ ئاگادار نیه، تێیدەو

⁵¹ وه ناوڕاسەو کەێدەێ دو کوت و خەێدەێ جاێ که دوڕوییل خەن، جاێ که گیره و دگان وەبان یەک ساینه.