ئنجیل مەتا 23 - کتاب مقدس به زبان کردی جنوبی - گویش کلهوری

هەڕەشه وه ڕابەریل مەسەوی

¹ ئمجا عیسا وه جەماێەتەگه و شاگردەگانێ وەت:

² «ماموستایل تەورات و زانایل فرقەێ فەریسی وه سەر تەخت موسای پەێخەمەر دانیشتنه.

³ جا هەر چی وەپێدان ئویشن گوش بگرن و وه جا بارن، وەلێ کردەوەدان جور ئەوانه نود، چوینکه ئەو چشته که ئویشن، خوێان وه جا نیەتیەرن.

⁴ باریل قورس و گران هەڵپیچنن و خەنه سەر شان مەردم، باریلێگ که کیشاینێ سەخته، وەلێ خوێان نیەتوان تەنانەت کلکێگ ئەڕا وه ڕێ خستنی تەکان بێەن.

⁵ گشت کاریلێان وەبونەێ ئیەسه تا مەردم بویننیان، ئایەیل کتاو موقەدەس گن گن بەسنه تەخت تێوڵ و بان باڵێان و داوان بەتیەگانێان شوڕترەو کەن.

⁶ خوەشێان تێ وەناو مێوانییل وەبان مەجلس بنیشن و وەناو کەنیسەیل خاسترین جا بیاشتون و

⁷ مەردم وەناو کویچه و بازار سڵامیان بکەن و وه ’ماموستا‘ بچڕنێان.

⁸ وەلێ ئیوه نەبایه وه ’ماموستا‘ بخوەنرێین، چوینکه تەنیا یەێ ماموستا دێرین و گشتدان براین.

⁹ وه مل زەوی هویچکەسێگ وه باوگ نەخوەنین، چوینکه تەنیا یەێ باوگ دێرین ئەیویش ها ئاسمان.

¹⁰ با هویچکامدان وه ’مالم‘ نەخوەنرێین، چوینکه تەنیا یەێ مالم دێرین ئەیویش مەسیحه.

¹¹ ئەوه که وه گشتدان گەوراتره، بوده خزمەتکاردان.

¹² چوینکه هەر کەس خوەێ گەوراوه بکێ، سوکەو بود، هەر کەس خوەێ وه کەم حساو بکێ، سەربەرزەو بود.

¹³ «وای وه حاڵ ئیوه ماموستایل تەورات و فەریسیەیل، ئێ دوڕوییل! چوینکه ئیوه دەر پادشایی ئاسمان وه ڕوی مەردم بەسین؛ خوەدان نیەچینه ناو و نوای کەسیلێ که توان بچنه ناو، گرین.

¹⁴ «وای وه حاڵ ئیوه ماموستایل تەورات و فەریسیەیل، ئێ دوڕوییل! چوینکه ئیوه لەلاێگەو ماڵ بێوه ژنیل چەپاو کین و لەلاێگتریشەو، ئەڕا ئیه که خوەدان نیشان بیەین، دوعایلدان دریژەو کین، وه ئەو بونه، سزادان چەنێ سەختتر بود.

¹⁵ «وای وه حاڵ ئیوه ماموستایل تەورات و فەریسیەیل، ئێ دوڕوییل! چوینکه ئیوه دەریا و وشکی گەردین تا یەکی بکێنه شاگرد خوەدان، وەختێ بیه شاگرددان، ئەوسا دو ئەوقره بەتر وه خوەدان سزاوار جەهەنمی کین.

¹⁶ «وای وه حاڵ ئیوه ڕێنمایل کور، ئیوه ئویشین: ”ئەگەر کەسێگ وه مابەد قەسەم بخوێ، هویچ نیه. وەلێ ئەگەر کەسێگ قەسەم وه تەڵای مابەد بخوێ، باێه قەسەمەگەی بویده سەر.“

¹⁷ ئێ گیلگەوجیل کور! کامێان گەوراتره؟ تەڵا یا مابەدێگ که تەڵاگه تەقدیس کەی؟

¹⁸ هەر ئیجوره ئیوه ئویشین: ”ئەگەر کەسێگ قەسەم وه قوروانگا بخوێ هویچ نیه، وەلێ ئەگەر کەسێگ قەسەم وه پیشکەشیەگەێ بانی بخوێ، باێه قەسەمەگەی بویده سەر.“

¹⁹ ئێ کوریل! کامێ گەوراتره؟ پیشکەشی یا قوروانگاێگ که پیشکەشیەگه تەقدیس کەی؟

²⁰ جا، هەر کەس قەسەم وه قوروانگا خوەێ، ئەوه قەسەم وه قوروانگا و هەر چشتێ که ها ملێ خواردێه.

²¹ هەر کەیش وه مابەد قەسەم خوەێ، وه مابەد و خوداێگ که وەناوێ نیشتەجێه، قەسەم خواردێه.

²² هەر کەیش قەسەم وه ئاسمان خوەێ، وه تەخت خودا و ئەیو که وه ملێ دانیشتێه، قەسەم خواردێه.

²³ «وای وه حاڵ ئیوه ماموستایل تەورات و فەریسیەیل، ئێ دوڕوییل! چوینکه ئیوه ئەڕا نەعناع و شوید و زیره حوکم ده یەک شەریعەت وه جا تیەرێن، وەلێ حوکمیل گرنگتر شەریعەت که هەر ئەو دادپەروەری و بەزەیی و وەفاداریه خەینه پشت گوش. ئیانه باێه وه جا باوردیاین و ئەوانیشە وه هویردانەو نەچیاد.

²⁴ ئێ ڕێنمایل کور! ئیوه پەخشه له ئاشپاڵو ڕەد کین، وەلێ شتر قویرت دێن!

²⁵ «وای وه حاڵ ئیوه ماموستایل تەورات و فەریسیەیل، ئێ دوڕوییل! چوینکه ئیوه دەیشت پیاڵه و پێشقاو پاکەو کین، وەلێ ناوەگەێ پڕ له تەما و خوەشگوزەرانیه.

²⁶ ئێ فەریسی کت کور، یەکم جار ناو پیاڵه و پشقاوەگه پاکەو بکه، تا دەیشتەگەیشێ پاکەو بود.

²⁷ «وای وه حاڵ ئیوه ماموستایل تەورات و فەریسیەیل، ئێ دوڕوییل! چوینکه ئیوه مینینه قەوریلێگ که سپی کریاس، که له دەیشتەو ڕەنگینه، وەلێ ناوێان پڕ له سقان مردگ و گشت جور ناپاکیه!

²⁸ ئیوەیش هەر ئیجورینه، وه ڕویەو له لاێ مەردم سالحانین، وەلێ ناودان پڕ له دوڕویی و خراوەکاریه.

²⁹ «وای وه حاڵ ئیوه ماموستایل تەورات و فەریسیەیل، ئێ دوڕوییل! چوینکه ئیوه مەقبەرەێ پەێخەمەریل درس کین و قەور سالحانیل ڕەژنینەو

³⁰ جا ئویشین: ”ئەگەر وه ڕوژگار باپیریلمان زنەیی بکردیایمن، وەناو خوین ڕشانن پەێخەمەریل وەگەردێانەو بەشدار نویاتیام.“

³¹ جا وه ئیجوره وه زد خوەدان شاێەتی دێن که مناڵیل قاتڵیل پەێخەمەریلین.

³² ئێرنگه که ئیجورەسه کارێ که باپیریلدان شرو کردنه، بوەنێ سەر.

³³ ئێ ماریل! ئێ هەفی زادەیل! چوی وه سزاێ جەهەنم دەر چین؟

³⁴ وەبونەێ ئیه ئەڕادان پەێخەمەریل و زانایل و ماموستایل کل کەم، قێرێ له لێان کوشین و کیشینێانه سەلیب، قێرێ تریشێان وەناو کەنیسەیلدان قەمچییان دین، شار وه شار عەزاوێان دین.

³⁵ وه ئی بونه خوین گشت سالحان که ڕشیاسه مل ئی زەویه، ها ملدان، له خوین هابیل سالح تا خوین زەکەریا کوڕ بەرەخیا، که له بین شون موقەدەس مابەد و قوروانگا کوشتینێ.

³⁶ وه ڕاسی، وەپێدان ئویشم، ئیه گشتێ داوان ئی نەتەوه گری.

³⁷ «ئێ ئورشەلیم، ئێ ئورشەلیم، ئێ شارێگ که قاتڵ پەێخەمەریل و کوچگوارانکەر کەسیلێگید که کل کریەنه لاێ تو! چەن جار تواسم جور مامرێگ که جویجگەگانی له ژێر باڵیل خوەێ گردەو کەید، مناڵەگاند گردەو بکەم، وەلێ نەتواسێ!

³⁸ بنوڕن، ماڵەگەدان ئەڕا خوەدان چوڵەو مینێد.

³⁹ چوینکه وەپێدان ئویشم دی وەشون ئیه مه نیوینین تا وەختێگ بویشین: ”بمارکه ئەوه که وه ناو خوداوەند تێ.“»