ئنجیل مەتا 12 - کتاب مقدس به زبان کردی جنوبی - گویش کلهوری

ساێو ڕوژ شەبات

¹ وه ئەو وەخته عیسا وه ڕوژ شەبات که هەر ئەو شەمەێ موقەدەس جویلەکەیلەسه وەناو زەویزاریل گەنم ڕەد بویا. شاگردیلێ له ورسیای شرو کردنه کەنین و خواردن گوڵ گەنمەگان.

² وەلێ زانایل فرقەێ فەریسی وەختێ ئیه دین وه عیسا وەتن: «بنوڕ، شاگردیلد کارێ کەن که وه ڕوژ شەبات ڕەوا نیه.»

³ عیسا جواو دا: «مەر نەخوەنینه داود پادشا چه کرد، وەختێ خوەێ و یارەگانێ ورسیان بی؟

⁴ چوی داود چیه ناو ماڵ خودا و نانێ که تەقدیس بی خوارد، هەر چەن خواردن ئەو نانه نه ئەڕا خوەێ و نه ئەڕا یارەگانێ ڕەوا نوی، بەڵکەم تەنیا ئەڕا کاهنیل ڕەوا بی؟

⁵ یا مەر وەناو تەورات نەخوەنینه که وه ڕوژ شەبات کاهنیل وەناو مابەد، وەبونەێ وەجێ هاوردن کارەگەێان حرمەت ڕوژ شەبات نیەپارێزنن، وەلێ تاوانبار وه حساو نیەتیەن؟

⁶ وەپێدان ئویشم کەسێگ ها ئێرا که له مابەد گەوراتره.

⁷ ئەگەر ماناێ ئی کەڵامه بفامیاین که ”مه بەزەیی توام نه قوروانی“ دی بیتاوانیل ماکوم نیەکردیاین.

⁸ چوینکه کوڕ ئنسان ساێو ڕوژ شەباته.»

شەفاێ پیاێ کوچ

⁹ ئمجا عیسا ئەوره هیشتەجێ و چیه ناو کەنیسەگەیان.

¹⁰ وەناو کەنیسەگه پیاێ بی که یەێ دەسێ وشک بوی. له عیسا پرسین: «ئێ شەفا داین وه ڕوژ شەبات ڕەواس؟» ئیه وەتن تا دەسپێچکێ بیاشتون که بختێگ بکەنه پێەو.

¹¹ عیسا وەته پێان: «ئەگەر یەکی وه ئیوه پەسێگ بیاشتود و ئەو پەسه وەناو ڕوژ شەبات بکەفێه ناو چاێگ، ئێ نیەگریدێ و له چا دەرێ نیەتیەرێ؟

¹² ئیسه ئنسان چەنێ وه پەس فرەتر تیەرزێد! جا خاسێ کردن وه ڕوژ شەبات ڕەواس.»

¹³ ئمجا عیسا وه پیاگه وەت: «دەسد دریژەو بکه!» پیاگەیش دەسێ دریژەو کرد و جور ئەو دەسەگەی ساقەو بی.

¹⁴ وەلێ فەریسیەیل چینه دەیشت و مەشویرەت کردن که عیسا چوی بکوشن.

خزمەتکار هەڵوژاردەێ خودا

¹⁵ عیسایش که له ئیه ئاگادار بی، ئەو شونه هیشتەجێ. قێر فرەێگ وه مەردم کەفتنه شونێ و ئەویش گشتێان شەفا دا و

¹⁶ وەپێان دەستور دا وه لاێ مەردم نویشن ئەوه کیه.

¹⁷ ئیجوره بی تا قسیەیگ که ئەشعەیاێ پەێخەمەر وەتوی باێه دی که ئویشێ:

¹⁸ «ئیەسه خزمەتکارەگەم که هەڵیوژاردمه، ئەیو عەزیزمه که گیانم له لێ خوەشنوده. روح خوەم نەمه ملێەو، ئەیویش دادپەروەری وه قەومیل جار دەێ.

¹⁹ شەڕ نیەکێ و هاوار نیەکیشێ، کەسێگیش دەنگێ وەناو کویچەگان نیەشنەفێ.

²⁰ زەل تومێاێ نیەشکنید و پلیتەی پڕتەپڕتکەر نیەکوشنێدەو، تا وەختێگ که دادپەروەرێ وه سەرکەفتن برەسنێ.

²¹ ناو ئەیو بوده ئمید گشت قەومیل.»

عیسا و بعەلزبول

²² ئمجا پیاێ خوودارێگ که کور و لاڵ بی هاوردنه ئەڕا لاێ عیسا و ئەیویش شەفاێ دا، جوری که تویەنست قسیه بکێ و بوینی.

²³ مەردمەگه گشتێان سەریان سڕ مەن و وەتن: «ئێ بو ئی پیا کوڕ داود پادشا بود؟»

²⁴ وەلێ وەختێ فەریسیەیل ئیه شنەفتن، وەتن: «ئی پیا تەنیا وه مەیەت بعەلزبول، سەروک دێویل، دێوەگان کەێده دەیشت.»

²⁵ عیسا که فکریلێان زانستیاد وەپێان وەت: «هەر مەمڵەکەتێگ که وه زد خوەێ هەڵسێ، له بین چود، هەر شار یا ماڵێگیش وه زد خوەێ هەڵسێ، بەردەوام نیەمینێ.

²⁶ ئەگەریش شەیتان، شەیتان بکێده دەیشت، وه زد خوەێ هەڵساس. جا چوی حوکومەتەگەێ بەردەوام مینێ؟

²⁷ ئەگەر مه وه مەیەت بعەلزبول دێویل کەمه دەیشت، شاگردیل ئیوه وه مەیەت کی ئەوانه کەنه دەیشت؟ جا ئی شاگردیلدانه، بونه داوەریلدان.

²⁸ وەلێ ئەگەر مه وەگەرد روح خودا دێویل دەر کەم، دڵنیا بون که پادشایی خودا هاتیەسه ملدانەو.

²⁹ یا چوی کەسێگ تویەنێ بچوه ناو ماڵ پیاێگ هێزدار و دارایەگەێ چەپاو بکێ، مەر ئیه که یەکم جار ئەو پیاێ هێزداره بوەسیدەو. ئمجا وه ڕاسی تویەنێ ماڵەگەێ چەپاو بکێ.

³⁰ هەر کەس وەگەرد مه نیه وه زد منه و هەر کەس وەگەرد مه گردەو نەکێ، تویچنێده یەکەو.

³¹ جا وەپێدان ئویشم هەر گونا و هەر کفرێگ که ئایەم بکێ بەخشریەد؛ وەلێ کفر کردن وه روح خودا، نیەوەخشرێی.

³² هەر کەس وه زد کوڕ ئنسان قسیەیگ بویشی، بەخشریەد، وەلێ هەرکەس وه زد روح‌القودوس قسیەیگ بویشی، نه وه ئی دەوره و نه وه دەورەی وەرەڕوی، نیەوەخشرێی.

³³ «ئەگەر میوەێ خاس تواین، دارەگدان باێه خاس بود، چوینکه دار خراو میوەێ خراو دەێده دەس. دار له میوەگەێ بود بناسێ.

³⁴ ئێ هەفی زادەیل، ئیوه که شەڕئاشوین، چوی تویەنین قسیەێ خاس بکێن، چوینکه زوان له ئەو چشته ئویشێ که دڵ له لێ نیقەڵتوزه.

³⁵ ئایەم خاس وه خەزانەی خاس دڵی، خاسێ وه بار تیەرێ، ئایەم خراویش وه خەزانەی خراو دڵی، خراوی وه بار تیەرێ.

³⁶ وەپێدان ئویشم: هەر کەڵام پویچێگ که مەردم وه زوان بارن، وه ڕوژ داوەری حساوێ دەنەو.

³⁷ چوینکه وه قسیەگان خوەد بیتاوان وه حساو تێید و وه قسیەگان خوەدیش ماکوم کرێید.»

داواێ نیشانەێگ له عیسا

³⁸ ئمجا قێرێ وه ماموستایل تەورات و فەریسیەیل وەتنه عیسا: «ماموستا، توایم نیشانەێگ له لێد بوینیمن.»

³⁹ وەلێ عیسا جواویان دا: «نەتەوەێ شەڕئاشو و داوانپێس داواێ نیشانەێگ کەن. وەلێ نیشانەێگ نێرێیده پێان، بێجگه نیشانەێ یونس پەێخەمەر.

⁴⁰ چوینکه هەر ئەوجورە که یونس پەێخەمەر سێ ڕوژ و سێ شەو لەناو زگ ماسی گەوراێگ بی، کوڕ ئنسانیش سێ ڕوژ و سێ شەو وه ناخ زەوی مینێد.

⁴¹ مەردم شار نەینەوا وه ڕوژ داوەری وەگەرد ئی نەتەوه زنیەو بون و ماکومێان کەن، چوینکه ئەوانه وەبونەێ بانگەوازی یونس توبه کردن، بنوڕن، کەسێگ گەوراتر له یونس ها ئێرا.

⁴² وه ڕوژ داوەری، مەلەکەێ باشور وەگەرد ئی نەتەوه زنیەو بود و ماکومێان کەێد، چوینکه ئەوه وه ئەو سەر دنیا هات تا زانیاری سڵێمان پادشا بشنەفێ، بنوڕن، کەسێگ گەوراتر له سڵێمان ها ئێرا.

⁴³ «وەختێ روح ناپاک وه کەسێ تێدە دەیشت، چود وەر‎و جایل وشک و بی ئاو تا شونێگ ئەڕا مەنن بوینیدەو، وەلێ پەێا نیەکێ.

⁴⁴ جا ئویشێ: ”دواره چمه ئەڕا مالەگەێ خوم که لەلێ هاتمه دەیشت.“ وەلێ وەختێ رەسده ئەوره ماڵەگه چوڵ و گزێ دریاێ و ترک تەمیس دوینی،

⁴⁵ جا چود و هەفت روح شەڕئاشوتر له خوەێ تیەرێ و گشتێان چنه ناوێ نیشتەجێ بون. ئاخر ئەو ئایەمه خراوتر له ڕوژ یەکمێ بود. ئاخر ئی نەتەوەێ شەڕئاشوه ئیجوره بود.»

داڵگ و برایل عیسا

⁴⁶ وه ئەو وەخته که هێمراێ عیسا وەگەرد مەردمەو قسیه کردیا، داڵگ و برایلێ وه دەیشت وساوین و تواسیان وەگەردێ قسیه بکەن.

⁴⁷ جا یەکی هات وه عیسا وەت: «داڵگ و برایلد وه دەیشت وسانه و توان وەگەردد قسیه بکەن.»

⁴⁸ وەلێ عیسا وه ئەوه که ئی قسیه وەپێ وەتوی، جواو دا: «داڵگم کیه؟ برایلم کین؟»

⁴⁹ ئمجا دەس کیشا ئەڕا شاگردیلی و وەت: «ئیانەنه داڵگ و برایلم!

⁵⁰ چوینکه هەر کەس خاست باوگم که ها ناو ئاسمان وه جێ بارێ، برا و خویشگ و داڵگ منه.»