ئنجیل مەتا 11 - کتاب مقدس به زبان کردی جنوبی - گویش کلهوری

قسیەیل عیسا له باوەت یەحیاێ تەعمیددەر

¹ وەشون ئیه که عیسا ئی فەرمانیله وه دوانزه شاگردەگەێ دا، وه ئەوره چی تا وەناو شارەگانێان تالیم بیێد و بانگەوازی بکێ.

² وەختێ یەحیا وەناو زندان، له کاریل مەسیح واده دریاێ شنەفت، شاگردەگانێ کل کرد

³ تا وه عیسا بپرسن: «توی هەر ئەویده که باێه باێد، یا چەوەڕێ یەکیگ تر بویمن؟»

⁴ عیسا وه جواویان وەت: «بچن و ئەوه که شنەفین و دوینین وه یەحیا بویشن که،

⁵ کوریل دوینن، شەلەگان‎ ڕێ کەن، جوزامیەگان شەفا گرن، کەڕیل شنەفن، مردگیل زنیەو بون و وه کەمدەسیل خەوەر خوەش دریەد.

⁶ خوەش وه حاڵ کەسێگ که وه من شک نەکەی.»

⁷ وەختێ شاگردیل یەحیا چین، عیسا له باوەت یەحیا شرو کرده قسیەو وه جەماێەت وەت: «ئیوه چینه ناو بیاوان تا چ چشتێگ بوینین؟ چین تا زەلێگ بوینین که وا شەکنێدەوێ؟

⁸ جا ئەڕا دین چ چشتێگ چین؟ ئەڕا دین پیاێگ که دڵنگ گران قیمەت کردێەسه وەر؟ ئەوانه که دڵنگیل گران قیمەت کەنه وەر هانه ناو قەسریل پادشایل.

⁹ جا ئێ ئەڕا دین چه چین؟ ئەڕا دین پەێخەمەرێگ؟ بەڵێ، وەپێدان ئویشم ئەوه کەسێگه که وه پەێخەمەریش سەرتره.

¹⁰ یەحیا هەر ئەوەسه که له کتاو ‎مەلاکی پەێخەمەر له باوەتێەو نویسریاس: «”ئێرنگه مه پێخام هاوەر خوەم وەرجه تو کل کەم تا ڕێەگەد وه نوای پاد گورجەو بکێ.“

¹¹ وه ڕاسی، وەپێدان ئویشم، کەسێگ گەوراتر له یەحیاێ تەعمیددەر له داڵگ نەزایه؛ وەلێ بویچگترین وەناو پادشایی ئاسمان، وه ئەوه گەوراتره.

¹² وه ڕوژگار یەحیاێ تەعمیددەر تا ئیسه، سەخت هویژم بردنەسه پادشایی ئاسمان، هێزداریلیش تەقالا کەن داگیرێ بکەن.

¹³ چوینکه گشت پەێخەمەریل و هەرئیجوره تەوراتیش تا هاتن یەحیا له باوەت پادشایی خودا پێشگویی کردیان.

¹⁴ ئەگەریش بتواین قەبوڵ بکێن، یەحیا هەر ئەلیاس پەێخەمەره که باێه باێد.

¹⁵ هەر کەس گوش شنەوا دێرێ بشنەفێ.

¹⁶ «وەلێ ئی نەتەوه وه چه وێنه بکەم؟ هەر مەننه مناڵیلێگ که وەناو بازار نیشن و هاو بازییلێان چڕن و ئویشن:

¹⁷ «”ئەڕادان دوزەڵه ژەنیمن، هەڵپەڕگه نەکردین؛ مور هاوردیم، شین نەکردین.“

¹⁸ چوینکه یەحیا هات نه خوەێ و نه نوشی؛ ئویشن، ”خوو دێرێ.“

¹⁹ کوڕ ئنسان هات، خوێد و نوشید؛ ئویشن، ”بنوڕنه ‎پێەو پیاێگه نوسن و شراو خوەر، دوس باجگریل و گوناکاریل.“ وەلێ ڕاسی و درسی زانیاری، وه کردەوەیلێەو کەفێده دەیشت.»

شاریلێگ که ئیمان ناوردن

²⁰ ئەو وەخته عیسا شرو کرده سەرزەنشت شاریلێگ که فرەتر موجزەیلێ وه ئەوره ئەنجام گردوی، چوینکه ئەوانه توبه نەکردوین.

²¹ عیسا فەرمایش کرد: «وای وه حاڵد، ئێ شار خورەزین! وای وه حاڵد، ئێ شار بەیت‌سیدا! چوینکه ئەگەر موجزەیلێگ که وەناو ئیوه کریا وەناو شاریل سور و سیدون بکریاد، مەردم ئەوره هەر وه زویەو جل و پەڵاس ئازیەتی کردیانه وەر و لەناو خوڵەکەو و توبه کردیان.

²² وەلێ ئویشمه پێدان که وه ڕوژ داوەری، تاموڵ موجازات ئەڕا شاریل سور و سیدون ئاسانترە تا ئەڕا ئیوه.

²³ تنیش ئێ شار کەفەرناحوم، تواسیاێ تا وه فەڵەک سەر بەرزەو کەی؟ هەراێهەر، بەڵکەم کەفێده بن جهان مردگیل. چوینکه ئەگەر موجزەیلێ که وەناو تو کریاس وەناو سودوم بکریا، ئەو شاره تا ئیمڕو مەنیادێ.

²⁴ وەلێ وەپێدان ئویشم وه ڕوژ داوەری، تاموڵ موجازات ئەڕا سودوم ئاسانترە تا ئەڕا توی.»

بان ئەڕا لاێ مه، مه ئاشاسێگ دەمه پێدان

²⁵ هەر ئەو وەخته، عیسا جار دا: «ئێ باوگه، خاون ئاسمان و زەوی، سپاسد کەم که ئی چشتەیله، وه زانیاریل و ئایەمیلێگ که فام دێرین شاردیدەسەو ئەڕا مناڵیل بویچگ ئاشکراێ کردیده.

²⁶ بەڵێ، باوگه، چوینکه خوەشنودی تو وه ئیه بی.

²⁷ باوگم گشت چشتێگ وه مه سپاردیه. هویچکەس کوڕ نیەناسێ بێجگه باوگ، هویچکەیش باوگ نیەناسێ بێجگه کوڕ و ئەوانه که کوڕ بتواێ باوگ ئەڕاێان ئاشکراێ بکێ.

²⁸ «بانه ئەڕا لاێ مه ئێ گشت زامەت کیشیل و گرانباریل، که مه ئاشاسێگ دەمه پێدان.

²⁹ هویەێ مه بخەنه ملدانەو له مه تالیم بگرن، چوینکه مه ئارام و دڵنەرمم و ئیوه وەناو گیان خوەدان ئاشاسێگ پەێا کەین،

³⁰ چوینکه هویەێ مه رەحەته‎ و بارم سوکه.»