لوقا 8 - کتاب مقدس به زبان کردی جنوبی - گویش کلهوری

مەسلەت جفتیار

¹ وەشون ئەوه، عیسا شار وه شار و ئاوایی وه ئاوایی گەردیاد و مزگانی پادشایی خودا رەسانیاد و بانگەوازی کردیا. ئەو دوانزه شاگردیشه وەگەردیەو بین،

² هەر ئیجوریشه قێرێ له ژنیل که وه روحیل شەڕئاشو و نەخوەشێ شەفا پەێا کردوین وەگەردیەو بین: مریەم ماروف وه مەجدەلیه که هەفت دێو له لێ دەر چوین،

³ یوئانا ژن خوزا، کار وه دەس هیرودیس، سوسەن و قێرێ ژنیل تر. ئی ژنیله وه دارایی خوێان، مەیەت عیسا و شاگردیلی دیان.

⁴ وەختێ مەردم وه شاریل فرەێگەو هاتیان تا عیسا بوینن، جەماێەت فرەێگ گردەو بی، عیسا ئی مەسلەته هاورد:

⁵ «ڕوژی جفتیارێ ئەڕا تویەم خستن چیه دەیشت. وەختێ تویەم خستیا، قێرێ له لێ کەفتنه ناو ڕێ و پاوڵا بی باڵەندەیل ئاسمان خواردنێان.

⁶ قێرێ تر کەفتنه ناو زەوی کوچگین وەختێ جویق دا، چوینکه نم نیاشت وشکەو بی.

⁷ قێرێتریش کەفتنه ناو دڕگەگان و دڕگەگان وەگەرد تویەمەگان گەورا بویان، تویەمەگان خنکانن.

⁸ وەلێ قێرێ وه تویەمەگان کەفتنه ناو زەوی خاسێگ و گەورا بی و سەد بەرابەر بەر هاورد.» وەختێ ئیانه وەت، وه دەنگ بەرز وەت: «هەر کەس گوش شنەوا دێرێ، بشنەفێ!»

⁹ وەختێ شاگردەگانێ ماناێ ئی مەسلەته له لێ پرسین.

¹⁰ وەت: «دەرک رازیل پادشایی خودا دریاسه ئیوه، وەلێ وەگەرد کەسیلێ تر وه شکل مەسلەت قسیه کەم، تا: «”بنوڕن، وەلێ نوینن؛ بشنەفن، وەلێ نەفامن.“

¹¹ «ماناێ مەسلەتەگه ئیەسه: تویەم، کەڵام خوداس.

¹² تویەمیلی که کەفنه ناو ڕێ، کەسیلێگن کەڵام شنەفن، وەلێ ئبلیس تێد و له دڵیان دەرێ تیەرێ بێدێ، تا نەتویەنن ئیمان بارن و نجات پەێا بکەن.

¹³ تویەمیلی که کەفنه ناو زەوی کوچگین کەسیلێگن وەختێ کەڵام شنەفن، وه شادی قەبوڵێ کەن وەلێ کەڵام وەناوێان ریشه نیەکوتێ. ئیانه زەمان کەمێ ئیمان دێرن، وەلێ له وەخت ئەزمون، له ئیمان کەفن.

¹⁴ تویەمیلی که کەفنه ناو دڕگیل، کەسیلێگن که کەڵام خودا شنەفن، وەلێ وەختێ ڕێ خوێان چن، نگرانییل و دەوڵەمەنی و خوەشییل زنەیی خنکنێدیان و بەر نیەتیەرن.

¹⁵ وەلێ تویەمیلی که کەفنه ناو زەوی خاس، کەسیلێگن کەڵام خودا وەگەرد دڵ پاک و خاس شنەفن و خوێان پارێزنن، بەردەوام مینن و بەر تیەرن.

مەسلەت چراخ

¹⁶ «هویچکەس چراخێگ ڕوشن نیەکێ تا سەوەته بنێده بانی یا بنێدەێ ژێر تەختێگ! بەڵکەم چراخەگه وەبان چراخدان نێدێ تا هەر کەس باێده ناو، نویرەگه بوینی.

¹⁷ چوینکه هویچ چشتێ شاریایەو نیه ئاشکرا نود و هویچ چشتێ نقوم نیه مالوم و دیار نود.

¹⁸ جا هوشدان بود چوی شنەفین، چوینکه وه ئەو کەسه که دێرێ فرەتر درێید و وه ئەو کەسه که نێری، هەر ئەوەیشه گومان کەی دێرێ، له لێ سێنرێەدەو.»

داڵگ و برایل عیسا

¹⁹ وه ئی وەخته، داڵگ و برایل عیسا هاتن تا بویننێ، وەلێ ئەوقره مەردم شلخ بین، نەتویەنستن وەپێ نزیکەو بون.

²⁰ ئمجا وەپێ خەوەر دان: «داڵگ و برایلد وه دەیشت وسانه توان بویننەد.»

²¹ وه جواویان وەت: «داڵگ و برایلم کەسیلێگن که کەڵام خودا شنەفن و وه جێ تیەرنێ.»

ئارام کردن توفان دەریا

²² ڕوژی عیسا وه شاگردەگانێ وەت: «بچیمنه ئەڕا ئەو لاێ دەریاچەگه.» جا سوار قایق بین و کەفتنه ڕێ.

²³ وەختێ داشتن چیان، عیسا خەویەو برد. لەناکاوا دەریاچەگه بیه واهێڵان خراوی جورێ که پڕ ناو قایقەگه بیه ئاو، گیانێان کەفته خەتەر.

²⁴ شاگردیل چینه ئەڕا لاێ عیسا و هەڵێسانن. وەتن: «ماموستا، ماموستا، دێریم له بین چیمن!» عیسا هەڵساد و تەشەری داده وا و تافیل دەریاچەگه. توفان تەمام بی و ئاشاسێگ بەرقرار بی.

²⁵ ئمجا وەپێان وەت: «ئیماندان ها کو؟» شاگردیل وه ترسەو سەریان سڕ مەنوی و وه یەکترەکی پرسیان: «ئیه کیه که تەنانەت وه وا و ئاو فەرمان دێ و له لێ فەرمان بەن.»

شەفاێ پیاێ خوودار

²⁶ ئمجا ڕەسینه مەنتەقەێ جەراسیان وه ڕوی وه ڕوی جەلیل، که وه ئەو لاێ دەریاچەگه بی.

²⁷ وەختێ عیسا پا ناده ناو ساحل، بەرخوارده پیاێگ که هن ئەو شاره بی و تویش دێو بی که ماوەێ فرەێگ دڵنگ نەکردویه وەر و وەناو ماڵ زنەیی نەکردوی، بەڵکەم وەناو قەوریل مەنیاد.

²⁸ وەختێ ئەوه، عیسا دی، قیڕان و کەفته مل پاێ و وه دەنگ بەرز هاوار کرد: «ئێ عیسا، کوڕ خوداێ هەربەرز، تو چ کارێ وه مه دێرێ؟ لاڵکیەمەو عەزاوم نیەی!»

²⁹ چوینکه عیسا وه روح ناپاک دەستور داوید له لێ باێه دەیشت. چوینکه ئەو روحه چەن جار گردویەێ، هەر چەن دەس و پاێ وه زنجیر بەسیان و چەویانیش وەپێەو بی، زنجیرەگان بڕیاد و دێو پیاگه بردیاده ئەڕا جایل چوڵێگ.

³⁰ عیسا له لێ پرسی: «ناود چەس؟» جواو دا: «لەشکەر،» چوینکه دێویل فرەێگ چوینه ناوێەو.

³¹ دێوەگان لاڵکیانه عیسا و تواسن دەستور نێده پێان تا بچنه جهان مردگیل.

³² وه ئەو نزیکیه، ریەن گەوراێگ وراز وه پاێ چیاێگ خەریک خواردن بین. دێوەگان لاڵکیانه عیسا تا بیلێد بچنه ناو ورازەگان، ئەیویش هیشت.

³³ ئمجا دێوەگان وه پیاگه هاتنه دەیشت و چینه ناو ورازەگان، ورازەگانیش وه سەرەوخوارکی چیاگەوه هویژه کردنه ناو دەریاچەگه و خنکیان.

³⁴ وەختێ ورازوانەگان ئیه دین، دەر چین و ئی خەوەره وەناو شار و ئاوایی، پەخش کردن.

³⁵ ئمجا مەردم هاتنه دەیشت تا هەر چی که هەڵکەفتوی بوینن، وەختێ رەسینه لاێ عیسا و چەویان کەفته ئەو پیا که دێوەگان له لێ هاتوینه دەیشت، دڵنگ کردێەسه وەر و جور ئایەم عاقڵ وه نوای پاێ عیسا نیشته، زاورێان چی.

³⁶ کەسیلێ که ئی ڕویداوه وه چەو دوین، ئەڕا مەردم باسێ کردن که پیا خوودارەگه چوی شەفا پەێا کرد.

³⁷ ئمجا گشت مەردم مەنتەقەێ جەراسیان وه عیسا تواسن له لاێان بچود، چوینکه ترس فرەێگ گردوەێان. ئەیویش سوار قایق بی و هاتەو.

³⁸ پیاێگ که دێوەگان له لێ هاتوینه دەیشت، لاڵکیه عیسا بیلێ وەگەردیەو بچود، وەلێ عیسا رەوانەێ کرد وەت:

³⁹ «بچوه ئەڕا ماڵ خوەدان و ئەوه که خودا ئەڕاد کردێه، بویشەو.» ئمجا چی و وه سەرئانسەر شارەگه خەوەر دا که عیسا ئەڕاێ چه کردێه.

شەفاێ ژن نەخوەش و زنیەو کردن دویەت یایروس

⁴⁰ وەختێ عیسا هاتەو، مەردم وه گەرمی چینه پیریەو، چوینکه گشتیەکی چەوەڕێ بین.

⁴¹ وه ئی وەخته، پیاێگ یایروس ناو، که سەروک کەنیسه بی، هات و کەفته مل پاێ عیسا، لاڵکیاده پێ تا باێه ئەڕا ماڵی،

⁴² چوینکه تەنیا دویەتەگەی که نزیک دوانزه ساڵی بی، داشتیا مردیا. وەختێ عیسا وەناو ڕێ بی، جەماێەت فرەێگ دەوری گردوین.

⁴³ وه ئەو ناوه، ژنێگ بی دوانزه ساڵ تویش خوینریژی بی و هەر چەن گشت دارایەگەێ خەرج تەبیبیل کردوی، وەلێ کەسێگ نەتویەنستوی خاسیەو بکێ.

⁴⁴ ژنەگه له پشت سەر عیسا نزیکەو بی و دەس دا لیوەێ بەتیەگەێ. زویزی خوینریژیەگەێ بڕیا.

⁴⁵ عیسا پرسی: «کی دەس دا قێمەو؟» وەختێ هویچکەس نەچیه ژێرێ، پتروس وەت: «ماموستا، مەردم دەورد گردنه و له هەر لاێگەو زور تیەرنه ملدەو!»

⁴⁶ وەلێ عیسا وەت: «یەکی دەس داسه قێمەو! چوینکه زانستم هێزێگ له لێم هاته دەیشت!

⁴⁷ ئەو ژنه وەختێ دی نیەتویەنی بشاریدێەو، وه ترس و لەرزەو هاته نوای و کەفته مل پاێ، وه نوای گشتیەکی وەت وه چ بونەێ دەس داسه قێ و چوی زویزی شەفا پەێا کردێه.

⁴⁸ عیسا وەپێ وەت: «دویەتەگەم، ئیماند شەفاد داس. وه سڵامەت بچو.»

⁴⁹ عیسا هێمراێ قسیه کردیا که یەکی له ماڵ یایروس، سەروک کەنیسەگه، هات و وەت: «دویەتەگەد مرد، دی ماموستا مەخه زامەت.»

⁵⁰ عیسا وەختێ ئیه شنەفت، وه یایروس وەت: «ڕخد نەچو! تەنیا ئیمان بیاشتوی! دویەتەگەد شەفا پەێا کەی.»

⁵¹ وەختێ رەسیه ماڵ یایروس، نەێشت کەسێ بێجگه پتروس و یوحەنا و یاقوب و داڵگ و باوگ دویەتەگه وەگەردێ بچنه ماڵ.

⁵² گشت مەردم ئەڕا دویەتەگه گیرستیان و شین کردیان. عیسا وەت: «گیره مەکەن، چوینکه نەمردیه بەڵکەم خەفتیه.»

⁵³ ئەوانیش وه عیسا تویلەکی کردیان، وەبونەێ ئیه که زانستیان دویەتەگه مردگه.

⁵⁴ وەلێ عیسا دەس دویەتەگه گرد وەت: «دویەتەگەم، هەڵس!»

⁵⁵ روحێ هاتەو زویزی وه جاگەێ هەڵسا. عیسا فەرمایش کرد تا چشتێ ئەڕا خواردن بێەنه پێ.

⁵⁶ داڵگ و باوگ دویەتەگه سەریان سڕ مەنوی، وەلێ ئەیو وەپێان ئەمر کرد که ئی هەڵکەفته له لاێ کەسێگەو باسێ نەکەن.