لوقا 7 - کتاب مقدس به زبان کردی جنوبی - گویش کلهوری

ئیمان ئەفسەر رومی

¹ وەختێ عیسا گشت قسیەیلی وەگەرد مەردم تەمام کرد، هاته ئەڕا شار کەفەرناحوم.

² وه ئەوره ئەفسەرێگ رومی بی و خوڵامێگ داشت که فره ئەڕاێ عەزیز بی، نەخوەش کەفتوی و داشت مردیا.

³ وەختێ ئەفسەرەگه له باوەت عیسا شنەفت، چەن نەفەر له گەورایل قەوم جویلەکە کل کرده ئەڕا لاێ تا له لێ بتوان باێ و خوڵامەگەێ شەفا بێید.

⁴ ئەوانیش هاتنه ئەڕا لاێ عیسا و لاڵکیانه پێ وەتن: «ئی پیا شایسەس ئی لتفه وه حەقی بکێ،

⁵ چوینکه ملەت ئیمه دوس دێرێ و کەنیسەگەمانیش درس کردێه.»

⁶ ئمجا عیسا وەگەردێانەو چی. وەختێ ڕەسیه نزیک ماڵەگه، ئەو ئەفسەره چەن نەفەر له ڕەفیقەیلێ وەگەرد ئی پێخامه کل کرده ئەڕا لاێ عیسا که: «گەورەم، خوەد زامەت مەێه، چوینکه مه شایسه نیم باێده ژێر سەقف ماڵەگەم.

⁷ هەر ئیجوره، تەنانەت خوەمیش شایسه نەزانستم بامه ئەڕا لاد. تو تەنیا یەێ کەلیمه بویش، خوڵامەگەم شەفا پەێا کەی.

⁸ چوینکه من خوەمیش کەسێگم که هامه ژێر فەرمان. سەربازیلیگیش وه ژێر فەرمان خوەم دێرم. وه یەکی بویشم، ”بچو“، چود؛ وه یەکی تریش بویشم، ”بەو“، تێد. وه خوڵامەگە‎م بویشم، ”ئی کاره بکه“، کەید.»

⁹ عیسا وەختێ ئیه شنەفت، فره ئەڵاجوی هات ڕوی کرده مەردمێ که وەشونیەو هاتیان وەت: «وەپێدان ئویشم، ئیجور ئیمانێگ تەنانەت وەناو قەوم ئێسرائیلیش نیمه.»

¹⁰ وەختێ ئەو کل کریایەگان هاتنەو ئەڕا ماڵ دین خوڵامەگه ساق و سڵامەتەو بیه.

زنیەو کردن کوڕ بێوه ژن

¹¹ چەن ڕوژتر، عیسا چیه ئەڕا شارێگ که ناوێ نائین بی. شاگردیل و جەماێەت فرەێگیش ناو ڕێ وەگەردیەو بین.

¹² وەختێ نزیک دەروازەێ شارەگه بویا، مردگێگ دی که داشتن بردیانێ و تەنیا کوڕ بێوه ژنێگ بی. قێر فرەێگیش وه مەردم شارەگه وەگەرد ژنەگەوه بین.

¹³ وەختێ عیساێ خوداوەند چەوێ کەفته ژنەگه، دڵی ئەڕاێ سزیا و وەت: «گیره مەکه.»

¹⁴ ئمجا چیه نزیک و دەس ناده قێ تاویتەگه. کەسیلێ که تاویتەگه هەڵگردوین، وسان. عیسا وەت: «ئێ جوان، وەپێد ئویشم، هەڵس!»

¹⁵ مردگەگه ڕاسەو بی و شرو کرده قسیه کردن! عیسا کوڕەگه سپارده دەس داڵگێ.

¹⁶ مەردمەگەیش گشتێ ترس و سام گردیان و نیشتنه ستایش خودا و وەتیان: «پەێخەمەر گەوراێگ وه ناومان ئاشکرا بیه. خودا هاتیەسه مەیەت قەوم خوەێ.»

¹⁷ خەوەر ئی کار عیسا وه گشت یەهودیه و مەنتەقەیل دەوروەرێ پێچیا.

شک کردن یەحیا وه عیسا

¹⁸ شاگردیل یەحیا وه تەمام ئی هەڵکەفتیله، ئاگادارێ کردن. ئمجا ئەویش دو گله له لێان چڕێ و

¹⁹ وەگەرد ئی پێخامه کلیان کرده ئەڕا لاێ عیساێ خوداوەند تا له لێ بپرسن: «تو هەر ئەوەیده که باێه باێد، یا چەوەڕێ یەکیگ تر بویمن؟»

²⁰ جا ئەو دو نەفەره هاتنه لاێ عیسا، وەتن: «یەحیاێ تەعمیددەر ئیمه کل کردێه تا پرسیاره لێد بکێم تو هەر ئەوەیده که باێه باێد، یا چەوەڕێ یەکیگ تر بویمن؟»

²¹ هەر ئەو ساته، عیسا قێر فرەێگ که تویش نەخوەشییل و ژانیل و روحیل شەڕئاشو بین، شەفا دا و کوریل فرەێگ بیناوه کرد.

²² ئمجا وه جواو ئەوانه که هاتوین فەرمایش کرد: «بچن و هەرچێ که دینه و شنەفتینه وه یەحیا بویشن، کوریل دوینن، شەلەگان‎ ڕێ کەن، جوزامیەگان شەفا گرن، کەڕیل شنەفن، مردگیل زنیەو بون و وه کەمدەسیل خەوەر خوەش درێید.

²³ خوەش وه حاڵ کەسێ که وه من شک نەکێ.»

²⁴ وەختێ شاگردیل یەحیا چین، عیسا له باوەت یەحیا شرو کرده قسیه، وه جەماێەت وەت: «ئیوه چینه ناو بیاوان تا چ چشتێگ بوینین؟ چین تا زەلێگ بوینین که وا شەکنێدەوەێ؟

²⁵ جا ئەڕا دین چ چشتێگ چین؟ ئەڕا دین پیاێگ که دڵنگ گران قیمەت کردێەسه وەر؟ ئەوانه که دڵنگیل گران قیمەت کەنه وەر و لەناو تەشریفات زنەیی کەن، هانه ناو قەسریل پادشایل.

²⁶ جا ئێ ئەڕا دین چه چین؟ ئەڕا دین پەێخەمەرێگ؟ بەڵێ، وەپێدان ئویشم ئەوه کەسێگه که له پەێخەمەریش سەرتره.

²⁷ ئەوه هەر ئەوەسه که کتاو موقەدەس له باوەتی نویساس: «”ئێرنگه مه پێخام هاوەر خوەم وەرجه تو کل کەم تا ڕێەگەد وه نوای پاد گورجەو بکێ.“

²⁸ وەپێدان ئویشم کەسێ گەوراتر له یەحیا له داڵگ نەزایه؛ وەلێ بویچگترین وەناو پادشایی خودا، وه ئەوه گەوراتره.»

²⁹ گشت مەردمیلێگ که ئی قسیەیله شنەفتن، تەنانەت باجگریلیش وەتن که خودا دادپەروەره، چوینکه وه دەس یەحیا تەعمید گردوین.

³⁰ وەلێ زانایل فرقەێ فەریسی و قازییل شەریعەت که قەبوڵ نەکردن وه دەس یەحیا تەعمید بگرن، خاست خودا ئەڕا خوێان ڕەد کردن.

³¹ عیسا بەردەوام بی وەت: «جا، مەردم ئی دەوره زەمانه وه چه وێنه بکەم؟ مەننه چه؟

³² مەننه مناڵیلێگ که وەناو بازار نیشن و یەکترەکی چڕن: «”ئەڕادان دوزەڵه ژەنیمن، هەڵپەڕگه نەکردین؛ مور هاوردیم، شین نەکردین.“

³³ چوینکه یەحیاێ تەعمیددەر هات که نه نان خواردیا و نه شراو نوشیا؛ وەتین، ”خووداره.“

³⁴ کوڕ ئنسان هاتێه، خوێد و نوشید؛ ئویشین، ”بنوڕنه پێەو، پیاێگه نوسن و شراو خوەر، دوس باجگریل و گوناکاریل.“

³⁵ وەلێ ڕاسی و درسی زانیاری، له بەریلێەو کەفێه دەیشت.»

بەخشین ژن بەێکاره

³⁶ یەێ ڕوژ یەکی له فەریسیەیل عیسا دەنگ کرد تا وەگەردێ نان بخوێ. ئەویش چیه ئەڕا ماڵ فەریسیەگه و نیشته سەر سفره.

³⁷ وەناو ئەو شاره، ژن بەێکارەێگ زنەیی کردیا وەختێ شنەفت عیسا وەناو ماڵ ئەو فەریسیه مێوانه، قاو مەرمەریگ، پڕ له روین خوەش بو، وەگەرد خوێەو هاورد،

³⁸ وه گیره کردن له پشت سەر عیسا له لاێ پاێ وساد. وەختێ ئەسر چەوێ ڕشیاده مل پایل عیسا وەگەرد گیسێ وشکێانەو کرد. وەشونێ پایلێ ماچ کرد و روینەگه ماڵیه پایلێەو.

³⁹ وەختێ فەریسی خاون مێوانی ئیه دی، وەگەرد خوێەو وەت: «ئەگەر ئی پیا وه ڕاسی پەێخەمەر بویاد، زانستیا ئی ژنه که دەس دا قەێەو کیه و چجور ژنیگه بی خەڵاف زانستیا که بەێکارەس.»

⁴⁰ عیسا وەپێ وەت: «ئێ شەمعون، توام چشتێ بویشمه پێد.» وەت: «فەرمایش بکه، ماموستا!»

⁴¹ عیسا وەت: «کەسێگ وه دو نەفەر قەرد داوید: وه یەکی پانسەد دینار، وه یەکیگ تر پەنجا دینار.

⁴² وەلێ وەختێ چشتێ نیاشتن بێەنه پێ، قەرد هەر دوانیان بەخشی. ئێرنگه وه گومان تو کامێان فرەتر دوس داشت؟»

⁴³ شەمعون جواو دا: «وه گومانم ئەوه که قەرد فرەترێگ داشت و بەخشیا.» عیسا وەت: «درس وەتی.»

⁴⁴ جا ئەو وەخته ئێشاره وه ژنەگه کرد و وه شەمعون وەت: «ئی ژنه دوینید؟ مه هاتمه ماڵد و تو ئەڕا شوردن پایلم ئاو ناوردی، وەلێ ئی ژنه وەگەرد ئەسر چەویلی پایلم شورد و وەگەرد گیسێ وشکێانەو کرد!

⁴⁵ تو ماچم نەکردێ، وەلێ ئی ژنه له وەختێگەو هاتمه ناو، وه ماچ کردن پایلم دەس هەڵنەگرد.

⁴⁶ تو روین نەماڵیده سەرم، وەلێ ئەوه روین خوەش بو ماڵیه پایلم.

⁴⁷ جا وه تو ئویشم، مابەت فرەێ ئەوه وەبونەێ ئیەسه که گونایل فرەێگێ بەخشیا. وەلێ ئەوه که کەمتر بەخشیا، کەمتریش مابەت کەی.»

⁴⁸ ئمجا عیسا ڕوی کرده ئەو ژنه و وەت: «گونایلد بەخشیا!»

⁴⁹ مێوانیل وه یەکترەکی وەتن: «ئیه کیه که گوناێلیش بەخشێد؟»

⁵⁰ عیسا وه ئەو ژنه وەت: «ئیماند نجاتد دا، وه سڵامەت بچو!»