لوقا 6 - کتاب مقدس به زبان کردی جنوبی - گویش کلهوری

خاون ڕوژ شەبات

¹ یەێ ڕوژ شەبات که هەر ئەو شەمەێ موقەدەس جویلەکەیله، عیسا وەناو زەویزاریل گەنم ڕەد بویا شاگردیلیشێ گوڵ گەنمەگان کەنێان و سایانەێ ناو دەس و خواردیانێ.

² وەلێ چەن گله له زانایل فرقەێ فەریسی وەتن: «ئەڕا کارێ کین که ئەنجام داینێ وه ڕوژ شەبات ڕەوا نیه؟»

³ عیسا جواو دا: «مەر نەخوەنینه داود پادشا چه کرد، وەختێ خوەێ و یارەگانێ ورسیان بی،

⁴ که چوی چیه ناو ماڵ خودا و نانێ که تەقدیس بی خوارد و داده یارەگانیشێ، هەر چەن خواردن ئەوه تەنیا ئەڕا کاهنیل ڕەواس؟»

⁵ ئمجا وەشونێ فەرمایش کرد: «کوڕ ئنسان ساێو ڕوژ شەباته.»

شەفاێ پیاێ عەلیل

⁶ یەێ شەبات تر، چیه ناو کەنیسه و شرو کرده تالیم داین. پیاێگ وه ئەوره بی که دەس ڕاسی وشک بوی.

⁷ ماموستایل تەورات و فەریسیەیل، عیسا خستوینه بێز چەو تا بوینن وه ڕوژ شەبات کەسێگ شەفا دەێ یا نه؛ چوینکه وه فکر دەسپێچکێ بین تا بخت گوناێگ بکەنه پێەو.

⁸ وەلێ عیسا که وه فکریلێان ئاگا بی، وه پیاگه که دەسێ وشک بوی وەت: «هەڵس و وه نوای گشتیەکی بوسیه.» ئەویش هەڵساد و وەناوڕاسێان وساده سەر پاوه.

⁹ عیسا وەپێان وەت: «له ئیوه پرسم، کامێان وه ڕوژ شەبات ڕەواس: خاسێ یا خراوی، نجات گیان ئنسان یا نابود کردنێ؟»

¹⁰ جا چەو خڕ دا ناو گشتێان وه پیاگه وەت: «دەسد دریژەو بکه!» ئەویش دەسێ دریژەو کرد و دەسێ ساقەو بی.

¹¹ وەلێ ئەوانه فره توڕه بین و وەگەرد یەکترەکی نیشتنه هاوفکری کردن که وەگەرد عیسا چه بکەن.

هەڵوژاردن دوانزه ڕەسول

¹² یەێ ڕوژ له ئەو ڕوژیله، عیسا چیه ئەڕا بان کویەێگ تا دوعا بکێ شەو تا شەوەکی خەریک پەرەسش کردن خودا بی.

¹³ شەوەکی شەفەق شاگردەگانێ چڕێ، وەناوێان دوانزه نەفەر له لێان دیاری کرد و وەپێان وەت ڕەسول:

¹⁴ شەمعون که ناوێ ناده پتروس، ئاندریاس براێ پتروس، یاقوب، یوحەنا، فیلیپوس، بەرتولما،

¹⁵ مەتا، توما، یاقوب کوڕ حەلفای، شەمعون ماروف وه وڵات پارێز،

¹⁶ یەهودا کوڕ یاقوب و یەهوداێ ئەسخەریوتی که وه عیسا خێانەت کرد.

’خوەش وه حاڵ ئیوه‘

¹⁷ عیسا وەگەرد شاگردیلی هاته خوار و وەشون تەختایێگ وساد. قێر فرەێگ وه شاگردیلی و یە بڕ مەردم وه سەرئانسەر یەهودیه، ئورشەلیم و شاریل دەورو وەر دەریاێ سور و سیدون، وه ئەوره بین.

¹⁸ ئیانه هاتوین تا قسیەیل عیسا بشنەفن و له نەخوەشییلیان شەفا بگرن؛ ئەوانەێ که روحیل ناپاک ئازارێان دیاد، شەفا گردیان.

¹⁹ مەردم گشتێ زور دیان دەس بێەنه قێ عیسا، چوینکه هێزێگ وەلێ هاتیاده دەیشت که گشتێ شەفا دیاد.

²⁰ ئمجا عیسا ڕوی کرده شاگردەگانێ و وەت: «خوەش وه حاڵ ئیوه که دەستەنگین، چوینکه پادشایی خودا ئەڕا ئیوەس.

²¹ خوەش وه حاڵ ئیوه که ئێرنگه ورسین، چوینکه تێر بوین. خوەش وه حاڵ ئیوه که ئێرنگه گیره کین، چوینکه کەفینه خەنه.

²² «خوەش وه حاڵ ئیوه ئەو وەخته که مەردم وەبونەێ کوڕ ئنسان، قینێانه لێدان تێد و وەناو جەم خوێان کەنەدانه دەیشت و خراو دەنه پێدان و بەدناودان کەن.

²³ ئەو ڕوژه، شایی و هەڵپەڕگه بکەن، چوینکه پاداشدان وەناو ئاسمان گەوراس. ئەڕا ئیه که باپیرێلێانیش وەگەرد پەێخەمەریل هەر ئی کاره کردن.

²⁴ «وەلێ وای وه حاڵ ئیوه که دەوڵەمەنین، چوینکه ڕوژەیل خوەش خوەدان گوزەرانینه.

²⁵ وای وه حاڵ ئیوه که ئێرنگه تێرین، چوینکه ورسێدان بود. وای وه حاڵ ئیوه که ئێرنگه دەمه خەنین، چوینکه ئازیەتبار بوین و کەفینه گیره.

²⁶ «وای وه حاڵ ئیوه وەختێ مەردم گشتێ تاریفه لێدان بکەن، چوینکه باپیرێلێانیش وەگەرد پەێخەمەریل دروەکانیه هەر ئی کاره کردن.

دوس داشتن دشمەنیل

²⁷ «وەلێ ئێ کەسیلێ که گوش دینه لێم، وەپێدان ئویشم دشمەنیل خوەدانیش دوس بیاشتون و وه ئەوانه که قینێانه لێدان تێ، خاسێ بکەن.

²⁸ ئەڕا هەر کەس که نووڕدان کرد بەەرکەت بتوان و هەر کەس که ئازاردان دا ئەڕاێ دوعای خیر بکەن.

²⁹ ئەگەر کەسێ چەپاڵەی دا ناو گوش ڕاسد، ئەولادیش ئەڕاێ بگر. ئەگەر کەسێ بەتیەگەد له وەرد دەر هاورد، شەویەگەدیش بیه پێ.

³⁰ ئەگەر کەسێگ داواێ چشتێ له لێد کرد، بیه پێ، ئەگەریش وه زور ماڵد برد، له لێ داواێ مەکه.

³¹ ڕێ رەوشتدان وەگەرد مەردم هەر ئەوجورە بود که تواین وەگەرددانەو بکرێد.

³² «ئەگەر تەنیا دوس ئەو کەسیله بیاشتوین که دوسدان دێرن، چ نەفێ ئەڕادان دێرێ؟ تەنانەت گوناکاریلیش وه ئەوانه که دوسیان دێرن، مابەت کەن.

³³ ئەگەر تەنیا وه کەسیلێ خاسێ بکێن که وەپێدان خاسێ کەن. ئێ چ نەفێ ئەڕادان دێرێ؟ تەنانەت گوناکاریلیش ئی کاره کەن.

³⁴ ئەگەریش تەنیا وه کەسیلێ قەرد بێین وه ئمید ئیه که له لێ بسینینێەو، چ نەفێ ئەڕادان دێرێ؟ تەنانەت گوناکاریلیش وه گوناکاریل قەرد دەن تا ڕوژی که قەردەگه له لێان بسیننێەو.

³⁵ وەلێ ئیوه، دشمەنیلدان دوس بیاشتون و وەپێان خاسێ بکەن و قەرد بێەنه پێان و ئی ئمیده نیاشتون که له لێان بسینینێەو، چوینکه پاداشدان فره گەوراس و بوینه ڕوڵەێ خوداێ هەربەرز، چوینکه ئەوه وەگەرد ناسپاسیل و بەدکارەیل، مێرەبانه.

³⁶ جا وه بەزەیی بون، هەر ئەوجورە که باوگدان وه بەزەیێه.

داوەری کردن مەردم

³⁷ «داوەری نەکەن تا داوەری نەکرێین. ماکوم نەکەن تا ماکوم نوین. بوەخشن تا بوەخشرێن.

³⁸ بێین تا وەپێدان بیەرێید. پەێمانەێگ پڕ، تەپیاێ، تەکان دریاێ و سەرڕێژ ڕشێیده داواندان! چوینکه وەگەرد هەر پەێمانەێگ که بێین، وەگەرد هەر ئەو پەێمانه درێیده پێدان.»

³⁹ عیسا مەسلەتیگیش ئەڕاێان هاورد: «کور تویەنێ دەس کوریگ تر بگرێد؟ هەر دو گیان نیەکەفنه ناو چاڵ؟

⁴⁰ شاگرد، وه ماموستاگەێ خوەێ سەرتر نیه، وەلێ هەر کەس تالیم و تەربیەتی وه کەماڵ برەسێ، بوده جور ماموستاگەێ خوەێ.

⁴¹ «ئەڕا پەر کەیێگ وەناو چەو براگەد دوینید، وەلێ هوشده کوته دارێگ که ها ناو چەو خوەد، نیه؟

⁴² چوی تویەنێد وه براگەد بویشی: ”براگەم، بیل تا ئەو پەر کیه وەناو چەود دەرێ بارم، وەلێ کوتەدارەگەێ ناو چەو خوەد نیوینید؟ ئێ ئایەم دوڕوی، یەکم جار کوتەدارەگەێ ناو چەو خوەد دەر بار، ئمجا خاستر دوینید تا پەر کەیەگه وەناو چەو براگەد دەر باری.

دار و میوەگەێ

⁴³ «هویچ دار خاسێگ، میوەێ خراو نێده دەس و هویچ دار خراوێگ، میوەێ خاس نێده دەس.

⁴⁴ هەر دارێگ وه میوەگەێ تویەنێ بناسێ. نه له دڕگ تویەنێ هەنجیر بچنی و نه له تویڕگ، تویەنێ ئەنگویر بچنی!

⁴⁵ ئایەم خاس وه خەزانەی خاس دڵی، خاسێ وه بار تیەرێ و ئایەم خراو وه خەزانەی خراو دڵی، خراوی. چوینکه زوان له ئەو چشته ئویشێ که دڵ له لێ نیقەڵتوزه.

ماڵەگەد له بان کوچگ درس بکه

⁴⁶ «ئیه چوینه که وەپێم ئویشین گەورەم، گەورەم، وەلێ وه ئەو چشته که ئویشم گوش نیەتەکنین؟

⁴⁷ ئەوه که تێدە لاێ من و قسیەیلم شنەفێد و گوش تەکنێ، وەپێدان نیشان دەم مینێده چ کەسێگ.

⁴⁸ ئەوه مینێده کەسێ که تواێ ماڵی بسازێ، زەویێگ هەڵکەنید و قویلێ کەی و بنەواێ ماڵەگه وەبان کوچگ درسی کەی. تا وەختێ سەیل باێد و لافاو باێده مل ئەو ماڵه، نەتویەنێ تەکانی بێید، چوینکه قایم درس کریاس.

⁴⁹ وەلێ ئەوه که قسیەیلم شنەفێد و گوش نیەتەکنێ، مینێده کەسێ که ماڵێگ بی بنەوا وەبان زەوی خاڵی سازیه. وەختێ لافاو باێده مل ئەو ماڵه، زویزی ڕمیا و وێرانی فره گەوراێگ وه جێ هیشت.»