لوقا 23 - کتاب مقدس به زبان کردی جنوبی - گویش کلهوری

دادگایی وه نوای پیلاتوس و هیرودیس

¹ ئمجا گشت شورا هەڵسان و عیسا هاوردنه ئەڕا لاێ پیلاتوس فەرماندار.

² بخت کردنه پێ، وەتن: «دیمنه ئی پیا ملەتەگەمان له ڕێ وه دەر کەی و نوای ئیمه وه باج داین وه قیسەر گری و ئویشێ که مەسیحه و پادشاس.»

³ ئمجا پیلاتوس له عیسا پرسی: «تو پادشاێ جویلەکەیلی؟» وه جواوی وەت: «تو خوەد ئیجوره وەتی!»

⁴ ئمجا پیلاتوس وه سەران کاهنیل و جەماێەتەگه وەت: «مدوێگ ئەڕا تاوانبار کردن ئی پیا نیوینم.»

⁵ وەلێ ئەوانه وه کوترانەو وەتن: «ئەوه وه سەرئانسەر یەهودیه وەگەرد تالیمیلی گاڵ مەردم دەێ، له جەلیل شرو کردێه تا ڕەسیەسه ئێرا.»

⁶ وەختێ پیلاتوس ئیه شنەفت، پرسی تا بزانێ ئەوه جەلیلیه.

⁷ وەختێ زانست عیسا هن ناوچەێگه که هیرودیس حوکمرانی کەی، کلی کرده ئەڕا لاێ ئەوه، چوینکه هیرودیس ئەو وەخته وه شار ئورشەلیم بی.

⁸ هیرودیس وەختێ عیسا دی، فره خوەشاڵەو بی، چوینکه وه زویەو تواسیا بوینیدێ. جا وه پێ هەر چی که له باوەت عیسا شنەفتوی، ئمید داشت موجزەێگ له لێ بوینی.

⁹ جا پرسیار فرەێگ له عیسا کرد وەلێ ئەیو هویچ جواوێگ وەپێ نیاد.

¹⁰ سەران کاهنیل و ماموستایل تەورات که وه ئەوره بین، بخت فرەێگ وه لێ کردن.

¹¹ هیرودیس و سەربازەگانیشێ بی حرمەتی و تویلەکی وەپێ کردیان. ئمجا دڵنگ ڕەنگینێگ کردنه وەرێ و وه دواره کلیەو کردنه ئەڕا لاێ پیلاتوس.

¹² ئەو ڕوژه، هیرودیس و پیلاتوس وەگەرد یەکەو دوسی کردن، چوینکه وەرجەوه دشمەن بین.

¹³ پیلاتوس مەردم و سەران کاهنیل و گەورایل قەوم چڕێ،

¹⁴ وەپێان وەت: «ئی پیا وه بخت ئیه که مەردم وه یاخیگەری هان دەێ، هاوردینه ئەڕا لام. مه وه نوای چەو ئیوه بازخوازیه لێ کردم، ئێرنگەیش هویچ مدوێگ وه ڕاس بوین بختیل ئیوه نێیمەو.

¹⁵ هیرودیسیش نەزەری ئیەسه، ئەڕا ئیه که کلیەو کردێەسه ئەڕا لاێ ئیمه. هەر ئەو جوره که دوینین، کارێ نەکردیه سزاێ مەرگ بود.

¹⁶ جا قەمچی دەم و ڕزگاری کەم.»

¹⁷ وەناو هەر جەشن پسەخ، پیلاتوس باێه یەێ زندانیێگ ئەڕاێان ڕزگار بکردیا.

¹⁸ وەلێ ئەوانه گشتێان وه یەکەو هاوار کردن: «ئیه بکوش و باراباس ئەڕامان ڕزگار بکه!»

¹⁹ باراباس وه جرم شوڕشێگ که وەناو شار خستویه ڕێ، هەر ئیجوریشه وه جرم خوین‎کردن، وەناو زندان بی.

²⁰ پیلاتوس که تواسیا عیسا ڕزگار بکێ، یەێ جارتر وەگەرد ئەوانه قسیه کرد.

²¹ وەلێ ئەوان یەێ‌سەر هاوار کردیان و وەتیان: «بکوتێ بان سەلیب! بکوتێ بان سەلیب!»

²² پیلاتوس ئەڕا سێیەم جار وەپێان وەت: «ئەڕا چه؟ چ کار گەنێگ کردێه؟ مه که هویچ مدوێگ ئەڕا کوشتنێ نێیمەو. جا قەمچی دەم و ڕزگاری کەم.»

²³ وەلێ ئەوانه وه دەنگ بەرز، وه کوترانەو تواسیان تا عیسا بکوتێدە بان سەلیب. دەس ئاخر هاواریان قەبوڵ کریاد.

²⁴ پیلاتوسیش حوکمێگ که تواسن، ئەڕاێ بڕی.

²⁵ ئەوه پیاێگ که وه جرم شوڕش و خوینکردن وەناو زندان بی و جەماێەتەگه داواێ ڕزگاریی کردیان، ڕزگاری کرد و عیسا دا دەسێان تا هەر جوری دڵیان تواس وەگەردیەو ڕێ رەوشت بکەن.

وه سەلیب بوین عیسا

²⁶ وەختێ داشتن بردیانێ، پیاێگ شەمعون ناو له مەردم قیرەوان که له سەر زەویزارەو هاتیاد، گردنەێ و سەلیبەگه نانه مل شانێ، وادارێ کردن وه پشت سەر عیسا بویدەێ.

²⁷ قێر فرەێگ له مەردم کەفتوینه شونێ، هەر ئیجوره ژنیلێگ که شین و ئازیەتباری کردیان.

²⁸ عیسا سەر هەڵگەردان و وەپێان وەت: «ئێ دویەتیل ئورشەلیم، ئەڕا مه گیره مەکەن؛ ئەڕا خوەدان و مناڵەگاندان گیره بکەن.

²⁹ چوینکه ڕوژیلی تێی که ئویشین: ”خوەش وه حاڵ ژنیل نەزوک، خوەش وه حاڵ زگیلێ که هەراێهەر نەزاینه و مەمگیلیگ که هەراێهەر شیر نیانه!“

³⁰ وه ئەو وەخته، وه کویەگان ئویشن: ”بڕمێنه ملمانا!“ وه چیاگانیش ئویشن: ”ئیمه، دامان پوشنن!“

³¹ چوینکه ئەگەر وەگەرد چو تەر ئی کاره کردن، وەگەرد چو وشک چه کەن؟»

³² دو پیاتریش که هەردوانێان جنایەتکار بین، بردیانێان تا وەگەردیەو بکوشنێان.

³³ وەختێ ڕەسینه ئەو شونه که کاسەێ سەر ناوێ بی، عیسا وەگەرد ئەو دو پیاێ جنایەتکاره کوتانه بان سەلیب و یەکیگێان له لاێ ڕاسی و ئەواکەیش له لاێ چەپیەو.

³⁴ عیسا وەت: «باوگه، ئیانه بوەخش، چوینکه نیەزانن چه کەن.» ئمجا ئەڕا بەشەو کردن دڵنگەگان عیسا وەناو خوێان تیرپشک خستن.

³⁵ مەردم وساوینه تماشا کردن و گەورایل قەومیش تویلەکی کردیان و وەتیان: «مەردم نجات دا! ئەگەر ئیه مەسیحه و هەڵوژاردەێ خوداس، بیل خوەێ نجات بێی.»

³⁶ سەربازەگانیش تویلەکی وەپێ کردیان. نزیکیەو بویان، شراو ترشیای دیانه پێ و

³⁷ وەتیان: «ئەگەر پادشاێ جویلەکەیلی، خوەد ڕزگار بکه.»

³⁸ تەختەێگیش که وه ملێ نویسریاوی: ”ئیەسه پادشاێ جویلەکە،“ کوتانه بان سەری.

³⁹ یەکی له دو جنایەتکارەگه که کوتریاویه بان سەلیب، وه تانەێ گەنێ وەپێ وەت: «مەر تو مەسیح نید؟ خو ئیمه و خوەد نجات بیه!»

⁴⁰ وەلێ ئەواکه سەرزەنشتێ کرد وەت: «زاورد له خودا نیەچود؟ تنیش هایده ژێر هەر ئەو حوکمه!

⁴¹ سزاێ ئیمه وه حەقه، چوینکه تاوان کردەوەمانه. وەلێ ئی پیا هویچ خەتاێگ نەکردیه.»

⁴² ئمجا وەت: «ئێ عیسا، وەختێ رەسیده پادشایی خوەد، منیش باره هویرد.»

⁴³ عیسا وەپێ وەت: «وه ڕاسی، وەپێد ئویشم، هەر ئیمڕو وەناو بەهیشت هایده گەردمەو.»

مردن عیسا

⁴⁴ نزیک سات دوانزەێ نیمەڕو بی که تیەریکی گشت ئەو وڵاته گرده وەر و تا سات سێ دویای نیمەڕو بەردەوام بی،

⁴⁵ چوینکه خوەر گیریا. وه ئی وەخته، پەردەێ مابەد له ناوڕاسەو بیه دو کوتەو.

⁴⁶ ئمجا عیسا وه دەنگ بەرز هاوار کرد: «باوگه، روحم سپارمه دەسیل تو.» ئیه وەت و هەناس ئاخرێ هەڵکیشا.

⁴⁷ وەختێ فەرماندەێ سەربازەگان ئی چشتیله که هەڵکەفتوی دی، ستایش خودا کرد و وەت: «بێ گومان ئی پیا بێ گونا بی.»

⁴⁸ مەردمیش که ئەڕا تماشا کردن گردەو بوین، وەختێ ئەوه که هەڵکەفتوی دین، هەر ئەو جوره که سینه کوتیان، وه ئەوره چین.

⁴⁹ وەلێ گشت کەسیلێگ که عیسا ناسیان و ژنیلی که له جەلیل وەشونیەو کەفتوینه ڕێ، هاتوین وه ئەو دویرەو وساین و نوڕیانه ئی هەڵکەفتیله.

دەفن کردن عیسا

⁵⁰ وه ئەوره پیاێگ بی یوسف ناو، که ئایەم خاس و سالحانێگ بی. ئەوه هەر چەن وەناو شوراێ جویلەکە بی،

⁵¹ وەلێ وەگەرد کار و کردەوەێ شەورا یەکی نوی. یوسف وه مەردمیل رامه، یەکی وه شاریل جویلەکەیل بی که چەوەڕێ هاتن پادشایی خودا بی.

⁵² یوسف چیه ئەڕا لاێ پیلاتوس و داواێ جنازەێ عیسا کرد.

⁵³ جا وەبان سەلیب هاوردی خوار و وەناو کفن کەتانیگ پێچادی و بردێ نادێ ناو مەقبەرەیگ که له کوچگ تاشیاوی که تا ئەو وەخته کەسێ وەناوێ نەناوین.

⁵⁴ ئەو ڕوژه، ’ڕوژ گورجەو بین ئەڕا جەشن بی و چشتێ وه شرو شەبات که هەر ئەو شەمەێ موقەدەس جویلەکەیله نەمنوی.

⁵⁵ ژنیلی که له جەلیلەو وەشون عیسا هاتوین، کەفتنه شون یوسف و مەقبەرەگه و جنازەگه دین که چوی نانەێ ناوێ.

⁵⁶ ئمجا هاتنه ئەڕا ماڵ، روین و چشتیل خوەش بو گورجەو کردن و وه ڕوژ شەبات وه پێ حوکم شەریعەت، شەکەتی دەر کردن.