لوقا 21 - کتاب مقدس به زبان کردی جنوبی - گویش کلهوری

خەڵات بێوه ژن کەمدەس

¹ عیسا نوڕیاده دەوروەرێ و دەوڵەمەنیلێگ دی، خەڵاتییل خوێان خستیانه ناو سنویق خەڵاتییل مابەد.

² وه ئەو ناوه بێوه ژن دەستەنگێگ دی، دو گله سکەێ مسی بویچگ که بویا یەێ قروش خسته ناو سنویقەگه.

³ عیسا وەت: «وه ڕاسی وەپێدان ئویشم، ئی بێوه ژن کەمدەسه له گشت ئەوانه فرەتر داس.

⁴ چوینکه ئەوانه گشتێان له سەر زیایەێ دارایی خوێان دانه، وەلێ ئی ژنه وه کەمدەسێ خوەێ، تەمام رسقەگەێ داس.»

پێشگویی عیسا له باوەت ڕمانن مابەد

⁵ وەختێ بڕێگ له باوەت مابەد خوداوەند باس کردیان که چوی وەگەرد کوچگیل ڕەنگین و خەڵاتییل پیشکەشی ڕەژیاس، عیسا وەت:

⁶ «زەمانێگ تێ که هەر چی وه ئێرا دوینین، کوچگی وه مل کوچگی تر نیەمینێ بەڵکەم گشتێ ڕمێده خوار.»

⁷ پرسین: «ماموستا، ئی هەڵکەفتیله کەی ڕوی دەید و نیشانەێ نزیکەو بینێان چەس؟»

⁸ عیسا جواو دا: «هوشدان بود گومڕا نوین؛ چوینکه فره له کەسیل وه ناو منەو تیەن و ئویشن: ”مه هەر ئەوه مه“ و ”وەختێ ڕەسیه“. مەکەفنه شونێان.

⁹ «وەختێ خەوەر شەڕیل و ئاژاوەیل شنەفین، ڕخدان نەچود. چوینکه باێه یەکم جار ئیجور هەڵکەفتیلێ باێه دی، وەلێ ئاخر کار وی زویه نیەرەسێ.»

¹⁰ ئمجا وه ئەوانه وەت: «ملەتێگ ئەڕا ملەتێگتر و مەمڵەکەتیگ ئەڕا مەمڵەکەتی تر هەڵسێ.

¹¹ وه جایل جورواجور زەویەلەرزیل گەورا و قاتوقڕی و تاعون تیەن و هەڵکەفتیل ترسناک کەفن، نیشانەیل گەوراێگ له ئاسمانەو کەفێده دەیشت.

¹² «وەلێ وەرجه ئی هەمگه، گرنەدان، ئازاردان دەن و دەنەدانه دەس کەنیسەیل و زندانیل، وەبونەێ ناو من، کیشنەدانه لاێ پادشایل و فەرمانداریل.

¹³ ئیه بوده دەرفەتێگ ئەڕادان تا شاێەتی بیەین.

¹⁴ ئیه خاس وه هویردان بود که وەرجه چشتێگ نگران نەون ئەڕا دەفا له خوەدان چه بویشین.

¹⁵ چوینکه کەڵام و زانیاریگ دەمه پێدان که هویچ کام له دشمەنیلدان تویەناێ ئیه نێرن که وەگەردێ موخالفەت بکەن و ڕوی وه ڕویی بوسن.

¹⁶ تەنانەت داڵگ و باوگ و برایلدان، خزمیل و دوسیلدان، ئیوه دەنه دەس دشمەن و بڕێگ له لێدان کوشن.

¹⁷ مەردم گشتێ وەبونەێ ناو مه قینێانه لێدان تێد.

¹⁸ وەلێ یەێ تاڵ موی له سەردان کەم نیود.

¹⁹ تاقەت بارن، که گیان خوەدان نجات دین.

²⁰ «وەلێ وەختێ دوینین لەشکەریل دەوره دانەسه ئورشەلیم، بزانن که وێرانی ئەوه، نزیکەو بیه.

²¹ ئەوسا ئەوانه که هانه یەهودیه دەر بچنه ئەڕا ناو کویەگان و ئەوانه که هانه ناو شار، له شار بچنه دەیشت، ئەوانیشە هانه دەردەیشت وەرەو شار نان.

²² چوینکه ئەو ڕوژیله، ڕوژەیل موکافاته ئەوسا هەر چی که وەناو کتاو موقەدەس نویسریاس وه ئەنجام رەسد.

²³ وه ئەو ڕوژیله وای وه ژنیلێگ که زگێان پڕه و داڵگیلێگ که شیر دەن! چوینکه بەردەڵبەرد فره گەوراێگ تویش ئی زەویه بود و ئی قەومه تویش خەزەو خودایی بون.

²⁴ ئەوانه کەفنه نوای دەم شمشێر و وەناو گشت ملەتیل تر وه گیرودەێ بریەن، ئورشەلیمیش پاوڵای ناجویلەکەیل بود تا ئەو وەخته که دەوران ناجویلەکەیل تەمام بود.

²⁵ «نیشانەیلێگ وەناو خوەر و مانگ و هەسارەیل کەفێده دەیشت. وەبان زەوی، ملەتیل وه گرمەگرم دەریا و خروش تافیل هەراسان و نگران بون.

²⁶ مەردم وەبونەێ ترس و سام، وه ئەو چشته که قەراره وه سەر دنیا باێد بی هوش کەفن، چوینکه هێزیل ئاسمانی، تیەنه لەرزه.

²⁷ ئمجا کوڕ ئنسان دوینن که وه هێز و جەڵاڵ فره گەوراێگ وەناو هەوریگ تێد.

²⁸ وەختێ ئی کاریله شرو بود، ڕاس بوسن و سەردان بگرنه بان، چوینکه ڕزگاریدان نزیکەو بیه!»

²⁹ عیسا ئی مەسلەته ئەڕا ئەوانه هاورد: «بنوڕنه دار هەنجیر و داریلیگ تر.

³⁰ وەختێ گڵا دەر تیەرن، تویەنین بوینین و بزانین که تاوسان نزیکەو بیه.

³¹ هەر ئیجوره هەر وەخت دوینین ئی چشتیله هەڵکەفێ، بزانین که پادشایی خودا نزیکەو بیه.

³² وه ڕاسی، وەپێدان ئویشم، تا ئی هەڵکەفتیله گشتێ نەکەفێ، ئی نەتەوه له بین نیەچود.

³³ ئاسمان و زەوی له بین چود، وەلێ قسیەیل مه هەراێهەر له بین نیەچود.

³⁴ «هوشدان بود، نەخواێ عیش و نوش و سەرخوەشی و نگرانییل زنەیی دڵدان ڕەقەو بکێ و ئەو ڕوژه جور تەڵەیگ وه ناکاوه بگرێدەدان.

³⁵ چوینکه وه سەر گشتێ کەسیلێ تێد که نیشتەجێ دنیان.

³⁶ جا هەمویشه هوشدان بود و دوعا بکەن تا بتویەنێن وه گشت ئی چشتیله که وی زوی هەڵکەفێ، له ئەمان بمینێن و له وەردەم کوڕ ئنسان بوسین.»

³⁷ عیسا هەر ڕوژ وەناو مابەد تالیم دیاد، وەلێ هەر شەو له شار دیاده دەیشت و چیاده ئەڕا بان کویەێ زیتون، شەو تا شەوەکی مەنیاد.

³⁸ شەوەکیان مەردم ئەڕا شنەفتن قسیەیلی وەناو مابەد گردەو بویان.