لوقا 2 - کتاب مقدس به زبان کردی جنوبی - گویش کلهوری

وه دنیا هاتن عیسا مەسیح

¹ وه ئەو ڕوژیله، ئاگوستوس قیسەر روم، حوکمێگ دا تا گشت مەردمیلی که وه ژێر فەرمان روم بین سەرژماری بون.

² ئیه یەکم سەرژمارێگ بی که وەختێ کورینیوس، فەرماندار سوریه بی ئەنجام گرد.

³ جا، هەر کەس ئەڕا ناونویسی چیه ئەڕا شارەگەێ خوەێ.

⁴ یوسفیش له ناوچەێ جەلیل له شار ناسره کەفته ڕێ ئەڕا بەیت‌لحم له ناوچەێ یەهودیه، شار داود پادشا، چوینکه له نەتەوه و بنەماڵەێ داود پادشا بی.

⁵ ئەوه چیه ئەڕا ئەوره تا وەگەرد دەزویرانەگەێ مریەم که زگێ پڕ بی، ناونویسی بکەن.

⁶ وەختێ که وه ئەوره بین، وەخت زاین مریەمیش رەسێ.

⁷ ئەوه یەکم زگێ که کوڕێگ بی وه دنیا هاورد. مناڵەگەێ پێچاده ناو کوڵپیچگ و نادێ ناو ئاخوڕێگ و خەفانی، چوینکه وەناو مێوانخانه شونێگ ئەڕاێان پەێا نوی.

شوانەگان و فریشتەگان

⁸ وه ئەو مەنتەقه، شوانەیلێگ بین که ڕیەنەگانێان شەوه کویه بی و کیشگی کیشیان.

⁹ لەناکاوه فریشتەێ خوداوەند وه لێان نازڵ بی و نویر جەڵاڵ خوداوەند وه دەورێانەو هەڵات. شوانەگان وه ترسەو له پڕگ چوین.

¹⁰ وەلێ فریشتەگه وەپێان وەت: «مەترسن، چوینکه ئێرنگه مزگانی ئەڕادان دێرم، خەوەر فره خوەشێگ که ئەڕا گشت قەومیله.

¹¹ چوینکه ئیمڕو وەناو شار داود پادشا، نجات دەرێگ ئەڕادان هاته دنیا. ئەوه خوداوەند مەسیحه.

¹² نیشانەگەیشێ ئەڕادان ئیەسه که مناڵێگ پێچیاسه ناو کوڵپیچگ و خەفتیەسه ناو ئاخوڕێگ و پەێاێ کین.»

¹³ لەناکاوه دەسەی فره گەوراێگ له لەشکەریل ئاسمان دیار دان که وەگەرد فریشتەگەوە ستایش خودا کردیان و وەتیان:

¹⁴ «جەڵاڵ ئەڕا خودا وه ئاسمان بەرز و ئاشتی و سڵامەتی ئەڕا مەردمیلێگ که وەبان زەوی، خودا وه لێان خوەشنوده!»

¹⁵ جا وەختێ فریشتەگان هیشتنێانه جا و چینه ئاسمان، شوانەگان وه یەکترەکی وەتن: «بان بچیمنه ئەڕا بەیت‌لحم و ئی چشته که ڕوی دریاس و خوداوەند، ئیمه له لێ ئاگا کردێه، بوینیمن.»

¹⁶ جا وه پەله چین و مریەم و یوسف و مناڵەگه که وەناو ئاخوڕەگه خەفتوی دینەو.

¹⁷ وەختێ مناڵەگه دین، قسیەێ که له باوەتێ وەپێان وەتریاوی، پەخشی کردن.

¹⁸ هەر کەیش شنەفتیاد، وه قسیەێ شوانەگان سەریان سڕ مەنیاد.

¹⁹ وەلێ مریەم، ئیه گشتێ وه خاتر سپاردیا و وەناو دڵ خوەێ وه پێان فکر کردیا.

²⁰ جا شوانەگان هەر ئەوجورە که خودا جەڵاڵ دیان و حەمد و ستایشێ کردیان، هاتنەو، وەبونەێ گشت چشتیلی که دین و شنەفتن، هەر ئەو جوره بی که وەپێان وەتریاوی.

نەریت پیشکەشی عیسا ناو خانەێ خودا

²¹ وه ڕوژ هەیشتم، وەختێ مناڵەگه خەتەنه بی، ناوێ نانه عیسا. هەر ئەو ناوه که فریشتەگه، وەرجه ئەوه که مریەم زگێ پڕ بود، نایوه ملێ.

²² وەختێ که زەمان پاکەو بوین ئەوانه وه پێ شەریعەت موسا تەمام بی، یوسف و مریەم، عیسا بردنه ئەڕا ئورشەلیم تا وه خوداوەند پیشکەش بکەن،

²³ هەر ئەو جوره که وەناو شەریعەت خوداوەند نویسریاس: «هەر نەوبەر نێریگ که تێده دنیا باێه پیشکەش خوداوەند بکرێ.»؛

²⁴ قوروانیگیش پیشکەش بکەن هەر ئەو جوره که وەناو شەریعەت خوداوەند هاتێه، یانێ «یەێ جفت یاکەریم یا دو گله وەچکه کەموتەر».

²⁵ وه ئەو دەورانه، پیاێگ دیندار و سالحان، وه ئورشەلیم زنەیی کردیا که ناوێ شەمعون بی، چەوەڕێ دڵنەوایی قەوم ئێسرائیل بی و پڕ وه روح‌القودوس بی.

²⁶ روح‌القودوس ئەڕاێ ئاشکرا کردوی تا مەسیح خوداوەند نوینی، نیەمرێ.

²⁷ جا شەمعون وه ڕێنمایی روح خودا چیه ناو مابەد، وەختێ که یوسف و مریەم، عیساێ کوڕپه هاوردن تا نەریت شەریعەت ئەڕاێ وه جا بارن،

²⁸ شەمعون گردێ باوش و ستایش خودا کرد و وەت:

²⁹ «خوداوەندا، ئێرنگه وه پێ وادەێ خوەد، خزمەتکارەگەد وه سڵامەت مرەخەسێ کەی.

³⁰ چوینکه چەویلم نجات تو دی،

³¹ نجاتیگ که وه نوای چەو گشت ملەتیل گورجەو کردیده،

³² نویریگ ئەڕا ئاشکرا کردن ڕاسی وه باقی قەومیل و جەڵاڵی ئەڕا قەوم تو ئێسرائیل.»

³³ داڵگ و باوگ عیسا وه قسیەیلی که له باوەت ئەو وەتریاد، سەریان سڕ مەن.

³⁴ ئمجا شەمعون بەەرکەتێان داد و وه مریەم، داڵگ عیسا وەت: «بنوڕ، ئی مناڵه بوده بایس کەفتن و هەڵساین فرەێگ له قەوم ئێسرائیل، هەر ئیجوره بوده نیشانەێگ که وه نوای وسن،

³⁵ وه ئیجوره، فکریل دڵ فره له کەسیلێگ ئاشکرا بود. شمشێرێگیش جەرگ تو بڕێ.»

³⁶ وه ئەوره پەێخەمەرێگ زنەیی کردیا، ناوێ حەنا بی، دویەت فەنوئیل له هوز ئەشیر، که فره پیر بوی. حەنا وەشون هەفت ساڵ که شوی کردوی، شویەگەێ وه دەس داوی،

³⁷ جا تا هەیشتا و چوار ساڵگی بێوه ژن مەنوی. حەنا هەراێهەر مابەدەگه نێشتویه جێ بەڵکەم شەو و ڕوژ، وه ڕوژه و دوعا خەریک پەرەسش بی.

³⁸ هەر ئەو وەخته حەنایش هاته نواو سپاس خودا کرد، وەگەرد گشت کەسیلێ که چەوەڕێ ڕزگاری ئورشەلیم بین، له باوەت عیسا قسیه کرد.

³⁹ وەختێ یوسف و مریەم نەریت شەریعەت خوداوەند کامڵ وه جا هاوردن، چینه ئەڕا شارەگەێ خوێان ناسره له ناوچەێ جەلیل.

⁴⁰ هەر ئیجوره، ئەو مناڵه گەورا بویاد و قەوەت گردیا. ئەوه پڕ له زانیاری بی و فیز خودا وەگەردیەو بی.

عیساێ نوجوان ناو خانەێ خودا

⁴¹ داڵگ و باوگ عیسا هەر ساڵ ئەڕا جەشن پسەخ چیانه ئەڕا ئورشەلیم.

⁴² وەختێ عیسا بیه دوانزه ساڵی وه نەریت جەشن، چینه ئەڕا ئورشەلیم.

⁴³ وەشون ئیه که جەشن تەمام بی، وەختێ کەفتنه ڕێ بچنەو، عیسا که نوجوانیگ بی وەناو ئورشەلیم مەن. وەلێ داڵگ و باوگێ وه ئی ئەمرە ئاگا نوین،

⁴⁴ چوینکه خیاڵ کردیان ها ناو کاروان، یەێ ڕوژ تەمام وەناو ڕێ بین. جا وەشونێ چینه مینێ عیسا وەناو خزم و ڕەفیقەیلێان.

⁴⁵ وەختێ پەێاێ نەکردن، هەڵوگەردیانه ئەڕا ئورشەلیم، وه مینێەو.

⁴⁶ دەس ئاخر وەشون سێ ڕوژ، وەناو مابەد دینیەو. له لای مەلاگان دینەێ نیشتوی و گوش دیاده قسیەیلیان و له لێان پرسیار کردیاد.

⁴⁷ هەر کەس قسیەیلی شنەفتیاد، له فامێ و جواویلی که دیاد، سەری سڕ مەنیاد.

⁴⁸ وەختێ داڵگ و باوگێ دین عیسا ها ئەوره، تاجو کردن. داڵگێ وەپێ وەت: «کوڕم، ئەڕا ئیجوره وەگەردمان کردی؟ من و باوگد وه نگرانی فرەێگەو وەشوندەو گەردیایمن.»

⁴⁹ وەلێ عیسا وەت: «ئەڕا وەشون منەو گەردیاین: مەر نیەزانستیاین که من باێه وەناو ماڵ باوگم بوم؟»

⁵⁰ وەلێ ئەوان ماناێ ئی قسیه که وەپێان وەت حالی نوین.

⁵¹ ئمجا وەگەردێان کەفته ڕێ و چینه ئەڕا ناسره و قسیەیان گرده گوش. وەلێ داڵگێ گشت ئی چشتیله وه دڵ خوێەو هیشتیاد.

⁵² عیسا هەر ڕوژ وه قامەت و زانیاری گەورا بویاد، له لاێ خودا و مەردمەو عەزیزتر بویاد.