لوقا 15 - کتاب مقدس به زبان کردی جنوبی - گویش کلهوری

مەسلەت پەس گوم بی

¹ جا باجگریل و گوناکاریل گشتێان له لاێ عیسا گردەو بویان تا قسیەیلی بشنەفن.

² وەلێ زانایل فرقەێ فەریسی و ماموستایل تەورات وه خوتەخوت کردن وەتیان: «ئی پیا گوناکاریل قەبوڵ کەید و وەگەردێانەو هاوسفره بود.»

³ جا عیسا ئی مەسلەته ئەڕاێان هاورد:

⁴ «کیه له لێدان که سەد گله پەس بیاشتود و وەختێ یەکی له ئەوانه گوم بود، ئەو نەوەد و نو گله وه ئەو دەیشته نێلیده جێ و وەشون ئەو یەێ گله گوم بیه نەچود تا بوینیدیەو؟

⁵ وەختێ پەسه گوم بیەگه دیەو، وه خوەشی خیدی مل شان و

⁶ چوده ئەڕا ماڵ، ڕەفیقەیل و هاوساگانێ چڕێد و ئویشێ: ”وەگەرد منەو شادی بکەن، چوینکه پەسه گوم بیەگه پەێاێ کردمه.

⁷ وەپێدان ئویشم، هەر ئیجوره ئەڕا یەێ گوناکار که توبه کەید، جەشن و شادی گەوراترێگ وه ئاسمان بەر پا بود تا ئەڕا نەوەد و نو ئایەم سالحانه که هەوەجی وه توبه نێرن.

مەسلەت سکەێ گوم بی

⁸ «وه یا کام ژنه که ده سکەێ نقره بیاشتود و وەختێ یەکی وه ئەوانه گوم بود، چراخێگ ڕوشن نەکێد و ماڵەگه گزێ نێید و تا نوینیدیەو دەس له وشکانن هەڵنەگرێ؟

⁹ جا وەختێ دێیەو، ڕەفیقەیل و هاوساگانێ چڕێد و ئویشێ: ”وەگەردمەو شادی بکەن، چوینکه سکه گوم بویەگەم دیمەو.“

¹⁰ وەپێدان ئویشم، هەر ئیجوره وەختێ گوناکارێگ توبه بکێ فریشتەیل خودا شادی کەن.»

مەسلەت کوڕ گوم بی

¹¹ ئمجا عیسا وەشونێ فەرمایش کرد: «پیاێگ دو گله کوڕ داشت.

¹² یەێ ڕوژ کوڕه بویچگەگه وه باوگێ وەت: ”باوگه، بەشێگ له دارایەگەد که وه مه رەسێ، ئیسه بیەری پێم.“ ئمجا باوگێ دارایەگەێ وه بین ئەو دو گله بەشەو کرد.

¹³ وەشون چەنێ، کوڕ بویچگەگه هەر چی داشت گردەو کرد و چیه ئەڕا وڵات دویرێگ و دارایەگەیشێ وه ئەوره وه ئەڵواتی دادەێ واێا.

¹⁴ وەختێ هەر چی داشت خەرجی کرد، قاتوقڕی سەختی وه ئەو وڵاته هات ئەویش کەفته تەنگێ سەختێگ.

¹⁵ جا چی و بیه خزمەتکار یەکی له مەردمیل ئەو وڵاته. ئەویش کلی کرده سەر زەویەگانی تا ورازەگانێ بلەوەڕنێ.

¹⁶ کوڕەگه ئاوەختی وه دڵێ مەن که وه خوراک ورازەگان زگ خوەێ تێر بکێ، وەلێ هویچکەس چشتێ وەپێ نیاتیاد.

¹⁷ دەس ئاخر هاته خوەێ و وەت: ”ئێ خو کارکەرگان باوگم نان زیایەیش دێرن و مه له ئێرا له ورسیایەو دێرم مرم.

¹⁸ ئیەسه هەڵسم چمه ئەڕا لاێ باوگم وەپێ ئویشم: ’باوگه، وه ئاسمان و وه تو گونا کردمه.

¹⁹ دی من لایق نیم کوڕد وه حساو بام. جور یەکی له کارکەرەگاند وەگەردمەو ڕێ رەوشت بکه.“‘

²⁰ «جا هەڵساد و کەفته ڕێ وەرەو ماڵ باوگێ، وەلێ باوگێ که وه دویرەو دیەێ دڵی ئەڕاێ سزیاد و وه دو چیه ئەڕا لاێ، گردێ باوشەو تێر ماچێ کرد.

²¹ کوڕەگه وەت: ”باوگه، وه ئاسمان و وه تو گونا کردمه. دی لایق نیم کوڕد وه حساو بام.“

²² وەلێ باوگێ وه خوڵامەگانێ وەت: ”زوی بچن! خاسترین بەتیه بارن بکەنه وەرێ. کلکەوانەێگ بکەنه کلکێ و کەوشیش بکەنه پاێ.

²³ گور پەروارێگ بارن، سەری بوڕن تا بخوەیمن و جەشن بگریمن.

²⁴ چوینکه ئی کوڕ منه مردوی، وه دواره زنیەو بیه؛ گوم بوی، پەێا بی! ئمجا جەشن گردن و شادی کردن.

²⁵ «وه ئی وەخته کوره گەوراگه که وەناو زەویزار بی، وەختێ نزیک ماڵ بی و دەنگ ساز دێوڵ و هەڵپەڕگه شنەفت،

²⁶ یەکی له خزمەتکاریل چڕێ له لێ پرسی: ”چ خەوەرێگه؟“

²⁷ خزمەتکارەگه جواو دا: ”براگەد هاتێەسەو باوگد گور پەروارێگ سەر بڕیە، چوینکه کوڕەگەێ وه سڵامەت دیەسەو.

²⁸ وەلێ کوره گەوراگه، فره توڕه بی و نەتواس بچوده ئەڕا ماڵ. جا باوگێ هاته دەیشت و لاڵکیاده پێ.

²⁹ وەلێ وه جواو باوگێ وەت: ”بنوڕ، ئیه چەن ساڵه جور یەێ خوڵام خزمەت وەپێد کردمه و هەراێهەر وه ژێر فەرماند دەر نەچیمه. وەلێ تو هویچ وەخت تەنانەت یەێ گیسکه کوڕپەێگ وەپێم نیایده تا وەگەرد ڕەفیقیلم مێوانیێگ بخەمه ڕێ.

³⁰ وەلێ ئێرنگه ئی کوڕده هاتێەسەو، کوڕێگ که دارایەگەد وەگەرد لەشفروشیل داده واێا، ئەڕاێ گور پەروارێگ سەر بڕیده!

³¹ باوگێ وەت: ”کوڕەگەم، تو هەر هایده گەرد منەو، هەر چی که دێرم، هن تنه.

³² وەلێ ئێرنگه باێه جەشن بگریم و شادی بکێمن، چوینکه ئی براده مردوی، زنیەو بی؛ گوم بوی، پەێا بی!“»