لوقا 12 - کتاب مقدس به زبان کردی جنوبی - گویش کلهوری

هەڕەشه وه هانداین

¹ وه ئی وەخته، هەزاران نەفەر گردەو بین، ئەوقره که پا نیانه مل یەکەو. عیسا یەکم جار وەگەرد شاگردیل خوەێ شرو کرده قسیه کردن وەت: «له خەویرترش فەریسیەیل که هەر ئەو دوڕوییەسه، دویری بکەن.

² هویچ چشت شاریایەو نیه ئاشکرا نود و هویچ چشت نوقومێگ نیه دیار نود.

³ جا هەر چی وەناو تیەریکی وەتینه، وەناو ڕوشنایی شنەفین و هەر چی وه پشت دەریل بەسریای پچه کردینه، له بان ماڵیل جار درێید.

⁴ «ڕەفیقیلم، وه ئیوه ئویشم له کەسیلێ که جەسه کوشن و فرەتر له ئیه نیەتویەنن کارێ بکەن، ڕخدان نەچود.

⁵ وەلێ وەپێدان نیشان دەم له کی باێه ڕخدان بچود: له ئەوه که وەشون کوشتن جەسه، دەسڵات ئیه دێرێ بخێده جەهەنم. بەڵێ، وه ئیوه ئویشم، له ئەوەسه که باێه ڕخدان بچود.

⁶ مەر پەنج مەلویچگ نیەفروشنه دو پویل سیه؟ وەلێ خو تەنانەت یەکی له ئەوانه له هویر خودا نیەچود.

⁷ تەنانەت موییل سەر ئیوه وه تەمامی ژماریاس. ڕخدان نەچود، ئیوه فرەتر له هەزاران مەلویچگ تیەرزیەن.

⁸ «وەپێدان ئویشم، هەر کەس له لاێ مەردمەو وه مه ئێقرار بکێ، کوڕ ئنسانیش وه نوای فریشتەیل خودا ئێقرارێ کەید.

⁹ وەلێ هەر کەس له لاێ مەردم من ڕەد بکێ، وه نوای فریشتەیل خودا ڕەد کریەد.

¹⁰ هەر کەس قسیەیگ وه زد کوڕ ئنسان بویشی، بەخشریەد، وەلێ ئەوه که وه روح‌القودوس کفر بکێ، نیەوەخشرێی.

¹¹ وەختێ ئیوه بردندانه ئەڕا کەنیسەیل و نوای حاکمیل و فەرمانرەوایل، نگران نەون چوی له خوەدان دەفا بکێن یا چه بویشین،

¹² چوینکه روح‌القودوس هەر ئەو وەخته یاێدان دەێ چه باێه بویشین.»

مەسلەت دەوڵەمەن نەزان

¹³ لەناکاوه یەکی وەناو مەردم وەپێ وەت: «ماموستا، وه براگەم بویش میرات باوگمان وەگەردمەو بەش بکێ.»

¹⁴ عیسا جواو دا: «پیاگه، کی مه وەناو ئیوه کردێەسه قازی یا بەشکەر؟»

¹⁵ ئمجا عیسا وه مەردم وەت: «هوشدان بود و له هەر جور حرس و تەما پارێز بکێن، چوینکه زنەیی ئنسان وه فراوانی دارایەگەێ نیه.»

¹⁶ ئمجا ئی مەسلەته ئەڕاێان هاورد: «پیاێ دەوڵەمەنێگ، زەویزارەگەی بەر فرەێگ دا دەس.

¹⁷ جا وەگەرد خوێەو فکر کرد، ”چه بکەم، چوینکه شونێگ ئەڕا ئەمبار کردن خەرمانەگەم نێرم؟“

¹⁸ ئمجا وەت: ”زانستم چه باێه بکەم! ئەمبارەگانم ڕمنم و ئەمباریل گەوراترێ درس کەم و گشت گەنم و چشتەگانم وەناو ئەوانه گردەو کەم.

¹⁹ ئەوسا وه خوەم ئویشم: کوره گیانەگەم، ئەڕا چەن ساڵیگ دارایی فرەێگ گردەو کردیده. ئێرنگه وه خیاڵ ڕەحەت زنەیی بکه؛ بخوه و بنوش و کەیف بکه.“

²⁰ وەلێ خودا وەپێ وەت: ”ئێ نەزان! هەر ئیمشەو گیاند لەلێد سێنریەێ. جا هەر چی گردەو کردیده، ئەڕا کی مینێ؟“

²¹ ئیه ئاخر کەسێگه که ئەڕا خوەێ ماڵ و دارایی گردەو کەی، وەلێ له لاێ خوداوه دەوڵەمەن نیه.»

نگران نەو

²² ئمجا عیسا وه شاگردیل خوەێ وەت: «جا وه ئیوه ئویشم، نه نگران زنەییدان بون که چه بخوین و نه نگران جەسەدان که چه بکێنه وەر.

²³ چوینکه زنەیی وه خواردن و جەسه وه دڵنگ، گرنگتره.

²⁴ بنوڕنه غەڵایل: نەکاڵن و نه درەو کەن، نه کەێان دێرن و نه ئەمبار؛ وەلێ خودا روزیێان دێ. جا ئیوه چەنێ فرەتر له باڵەندەیل تیەرزیەن!

²⁵ کیه له ئیوه که بتویەنێ وەگەرد نگرانی، ساتێگ وه عومر خوەێ فرەترەو بکێ؟

²⁶ جا، ئەگەر ئیوه نیەتویەنین ئیجور کار بویچگی بکێن، وەبونەێ چه نگران باقیێن؟

²⁷ بنوڕنه گوڵیل سوسەن چوی گەورا بون؛ نه زامەت کیشن و نه تەشی ڕسن. وه ئیوه ئویشم تەنانەت سڵێمان پادشایش وەگەرد تەمام شکو و جەڵاڵیەو جور یەکی له ئەوانه ڕەنگین نوی.

²⁸ جا ئەگەر خودا گژگیای دەیشت که ئیمڕو هەس و سو فڕه دریده ناو تەنویر، ئیجور دایپوشنی، چەنێ فرەتر ئیوه داپوشنێ، ئێ کەم ئیمانیل!

²⁹ جا وەشون ئیه نەون که چه بخوین یا چه بنوشین؛ نگرانیش نەون.

³⁰ چوینکه گشت ملەتیل دنیا وەشون ئیجور چشتیلێگن، وەلێ باوگ ئاسمانیدان زانی که وه ئی هەمگه چشته هەوەجیدان کەفێ.

³¹ بەڵکەم ئیوه، وەشون پادشایی ئەوه بون، که ئیانیشه گشتێ درێیده پێدان.

³² «ئێ ریەن بویچگ، زاوردان نەچود، چوینکه خوەشنودی باوگ ئیوه ئیەسه که ئی پادشایه بێیده پێدان.

³³ هەر چی دێرین بفروشن و بێەنه دەستەنگیل؛ ئەڕا خوەدان کیسەیلێگ گورجەو بکەن که نیەپویترکێید و گەنجێ که بنێ نیەتێید وەناو ئاسمان گردەو بکەن، شونێگ که نه دز تێد وه نه بید دەێەڵێ.

³⁴ چوینکه گەنجدان وه هەر کوره بود، دڵدانیش ها ئەوره.

گورجەو بوین ئەڕا وه دواره هاتن مەسیح

³⁵ «ناوقه ئەڕا خزمەت بوەسن و چراخیلدان ڕوشن بیلن.

³⁶ جور کەسیلێ بون که چەوەڕێن تا گەورەێان له سویر باێدەو، تا وەختێ له ڕێەو رەسی و دەر کوتا، زویزی دەر ئەڕاێ واز بکەن.

³⁷ خوەش وه حاڵ خوڵامیلێگ که وەختێ گەورەێان باێدەو، ئەوانه وه خەوەر و هوشیار دوینید. وه ڕاسی، وەپێدان ئویشم، خوەێ ناوقه ئەڕا خزمەت کردنێان بەسێد؛ بەڵێ، تیەرێ نێدیانه سەر سفره و تێدە نوا، له لێان مێواندارێ کەی.

³⁸ خوەش وه حاڵ خوڵامیلێگ که وەختێ گەورەێان له ڕێەو رەسی، چ وه نیمه شەو، چ شەوەکی شەفەق، ئەوانه وه خەوەر و هوشیار دوینید.

³⁹ «وەلێ ئیه بزانن ئەگەر خاون ماڵ بزانستیا دز وه چ ساتێگ تێد، نەێشتیاد وه ماڵەگەێ دزی بکێ.

⁴⁰ ئمجا ئیوەیش گورجەو بون، چوینکه کوڕ ئنسان وه یەێ ساتێگ تێ که فکریشێ نیەکین.»

⁴¹ پتروس پرسی: «گەورەم، ئی مەسلەته ئەڕا ئیمه هاوردی یا ئەڕا گشت؟»

⁴² عیسا خوداوەند وه جواوی وەت: «ئێ ئەو کاروەدەس ئەمین و زانا کیه که ئەرواوەگەێ ئەوه ناسه بان سەر خزمەتکاریل ماڵەگەێ خوەێ تا بەش نان ئەوانه وه وەخت خوەێ بێی؟

⁴³ خوەش وه حاڵ ئەو خوڵامه که وەختێ ئەرواوەگەێ باێدەو، دوینی خەریک کار کردنه.

⁴⁴ وه ڕاسی وەپێدان ئویشم، ئەوه دا نێده بان سەر گشت دارایەگەێ خوەێ.

⁴⁵ وەلێ ئەگەر ئەو خوڵامه وه خوەێەو بویشی که ”ئەرواو وه هاتنێ دێر کردێه،“ شرو بکێده کوتاین خوڵامیل و کەنیزیل و بنیشێده خواردن و نوشاین و سەرخوەش کردن،

⁴⁶ ئەوسا ئەرواوەگەێ وه ڕوژی که خوڵامەگه فکریشێ نیەکێ وه یەێ ساتێگ که له لێ ئاگا نیه تێد و هەر وه ئەوره له ناوڕاسەو کەێدەێ دو کوتەو، خێدەێ شونێ که خێانەتکاریل خەن.

⁴⁷ «خوڵامێگ که خاست ئەرواوەگەێ زانید وەلێ خوەێ ئەڕا ئەنجامێ گورجەو نیەکێ، قەمچی فرەێگ خوەێ.

⁴⁸ وەلێ ئەوه که خاست ئەرواوەگەێ نیەزانێ و کارێ کەی که لایق قەمچیه، قەمچی کەمتری خوەێ. وە هەر کەیش فرەتر بێریەێد، داواێ فرەتریش له لێ کەن؛ هەر کەیش کار فرەترێگ بسپارنه دەسێ، فرەتریش جواوگو بود.

هەڕەشه له باوەت ناکوکی و جیایی

⁴⁹ «من هاتمه تا ئاگر وەبان زەوی بکەمەو، خوزگه تا ئێرنگه کریایدەو!

⁵⁰ وەلێ مه خوسڵ تەعمیدێگ دێرم که باێه بگرم و تا وه ئەنجام برەسێ چەنێ هامه ژێر فشار.

⁵¹ ئێ گومان کین هاتمه تا ئاشتی و سڵامەتی وه زەوی بارم؟ نه، بەڵکەم هاتمه تا جیایی بخەمه ناودان.

⁵² چوینکه له ئیەولا، له ماڵێگ که پەنج نەفەر وەناوێ بود جیایی کەفێ؛ سێ وه زد دو بون و دو وه زد سێ.

⁵³ باوگ وه زد کوڕ و کوڕ وه زد باوگ، داڵگ وه زد دویەت و دویەت وه زد داڵگ، خەسویره وه زد وەوی و وەوی وه زد خەسویره.»

ناسین زەمانیل

⁵⁴ عیسا ئیەیشه وه جەماێەت وەت: «وەختێ دوینین هەوریگ وه ڕوژئاوا دەر هات، زویزی ئویشین: ”واران وارێد،“ وارانیش واری.

⁵⁵ وەختێ وا له باشور هەڵ کەی، ئویشین: ”هەوا گەرمەو بود،“ هەر ئیجوریشه بود.

⁵⁶ ئێ دوڕوییل! ئیوه که خاس زانین چوی شێوەێ زەوی و ئاسمان بخوەنین، ئێ چوی نیەتویەنین زەمانێ که هاینه ناوێ بخوەنین؟

⁵⁷ «ئەڕا نیەتویەنین ئەو چشته که درسه ئەڕا خوەدان داوەری بکێن؟

⁵⁸ وەختێ وەگەرد شاکیەگەد چیده ئەڕا لاێ قازی، تەقالا بکه تا وەناو ڕێ وەگەردێ دوسی بکێ، نەخواێ بکیشێدەده لاێ قازی و قازی تو وه مامور بسپارێ و بکەفێه زندان.

⁵⁹ وەپێد ئویشم که تا قروش ئاخرێ نێید، هەراێهەر وه زندان نیەتێدە دەیشت.»