لوقا 11 - کتاب مقدس به زبان کردی جنوبی - گویش کلهوری

تالیم له باوەت دوعا

¹ ڕوژیگ عیسا وه شونێگەو خەریک دوعا کردن بی. وەختێ دوعاگەێ تەمام بی، یەکی له شاگردیلی وەپێ وەت: «گەورەم، دوعا کردن یاێمان بیه، هەر ئەوجورە که یەحیا وه شاگردیلی یاێ دا.»

² عیسا وەپێان وەت: «هەر وەخت دوعا کین، بویشن: «”باوگه، ناود موقەدەس بود، پادشایی تو باێد،

³ نان ڕوژانەمان هەر ڕوژ بیه پێمان.

⁴ گونایلمان بوەخش، چوینکه ئیمەیش گشت قەردداریلمان بەخشیمن. مەخەرەمانه ناو ئەزمون»

⁵ ئمجا وەپێان وەت: «کیه له لێدان که دوسیگ بیاشتود و وه نیمه شەو بچوه ئەڕا لاێ و بویشی: ”ڕەفیق، سێ گله نان وه قەرد بیه پێم،

⁶ چوینکه یەکی له ڕەفیقیلم له ڕێەو ڕەسیه، چشتێ نێرم بنەمه وەر دەسێ،“

⁷ ئەویش وەناو ماڵ جواو بێی: ”زامەتم مەێه. دەرەگه قوڵفه و مناڵەگانم وەگەردمەو هانه ناو جێ. نیەتویەنم وه جیەگەم هەڵسم چشتێ بیەمه پێد؟“

⁸ وەپێدان ئویشم، هەر چەن وەبونەێ دوسی هێز نەگرێ نان نێیده پێ، وەبونەێ ئاوڕوی هەڵسێد و هەر چی که هەوەجیه دەێده پێ.

⁹ «جا وەپێدان ئویشم، داوا بکەن که درێیده پێدان؛ مینه بکەن که دوینینەو؛ دەر بکوتن، که وه ڕویدان واز بود.

¹⁰ چوینکه هەر کەس داوا بکێ، وه دەس تیەرێد؛ هەر کەیش مینه بکێ، دوینیدەو؛ هەر کەیش دەر بکوتێ، وه ڕوی واز بود.

¹¹ ئیوه باوگیل، کامدان، ئەگەر کوڕەگەێ داواێ ماسیه لێ بکێ، مارێگ دەێده پێ؟

¹² یا ئەگەر داواێ خاێگ بکێ، دمارەکوڵێگ دەێده پێ؟

¹³ جا ئەگەر ئیوه وەگەرد گشت بەێ زاتیدان زانین که باێه وه مناڵیلدان خەڵاتییل خاس بیەین، چەنێ فرەتر باوگ ئاسمانیدان، روح‌القودوس وه هەر کەس که داوا له لێ بکێ، بەخشێدن.»

عیسا وه سەروک روحیل ناپاک

¹⁴ عیسا دێو لاڵی له یەکی کردیا دەیشت. وەختێ دێوەگه چیه دەیشت، پیا لاڵەگه تویەنست قسیه بکێ و مەردم گشتێ سەریان سڕ مەن.

¹⁵ وەلێ بڕێگ وەتیان: «ئەیو دێویل، وه مەیەت بعەلزبول، سەروک دێویل، کەێده دەیشت.»

¹⁶ بڕێگتریش ئەڕا ئیه که ئەزمونێ بکەن، داواێ نیشانەێگ ئاسمانی له لێ کردن.

¹⁷ وەلێ عیسا که فکریلێان زانست وەپێان وەت: «هەر مەمڵەکەتی که وه زد خوەێ هەڵسێ، نابود بود، ناو هەر ماڵێگیش که بوده دو دەسەوه، ڕمێده یەکەو.

¹⁸ ئەگەر شەیتانیش وه زد خوەێ هەڵسێ، ئێ چوی حوکومەتەگەێ بەردەوام مینێ؟ چوینکه ئیوه ئویشین مه دێویل، وه مەیەت بعەلزبول کەمه دەیشت.

¹⁹ ئەگەر مه وه مەیەت بعەلزبول دێویل کەمه دەیشت، شاگردیل ئیوه وه مەیەت کی ئەوانه کەنه دەیشت؟ جا ئی شاگردیلدانه، بونه داوەریلدان.

²⁰ وەلێ ئەگەر من وەگەرد کلک خودا دێویل دەر کەم، دڵنیا بون پادشایی خودا هاتیەسه ملدانەو.

²¹ هەر وەخت پیاێگ وه هێز که وه تەمامی چەکداره، له ماڵەگەێ پاسەوانی بکێ، دارایەگەێ ها ئەمانا.

²² وەلێ وەختێ کەسێ وه هێزتر وه ئەوه هویژم بارێده پێ و زور بگرێه ملێ، ئەو چەکەگەیشه که پشت وەپێ بەساس له لێ سێنێدەێ و غەنیمەتەگەێ بەش بەشەو کێ.

²³ هەر کەس وەگەرد مه نیه، وه زد منه و هەر کەس وەگەرد مه گردەو نەکێ، تویچنێده یەکەو.

²⁴ «وەختێ روح ناپاک وه کەسێ تێدە دەیشت، وەرەو جایل وشک و بی ئاو چود تا شونێگ ئەڕا مەنن بوینیدەو. وەلێ وەختێ پەێا نەکرد وه خوەێ ئویشێ: ”ماڵەگە‎م که له لێ هاتمه دەیشت، وه دواره چمه ناوێ.“

²⁵ وەلێ وەختێ رەسده ئەوره ماڵەگه گزێ دریاێ و ترکتەمیس دوینی،

²⁶ جا چود و هەفت روح شەڕئاشوتر له خوەێ تیەرێ و گشتێان چنه ناوێ نیشتەجێ بون. ئاخر ئەو ئایەمه خراوتر له ڕوژ یەکمێ بود.»

²⁷ وەختێ عیسا ئی قسیەیله کردیا، ژنێگ وەناو مەردمەو وه دەنگ بەرز وەت: «خوەش وه حاڵ ژنێگ که تو زایه و شیر داسه پێد.»

²⁸ وەلێ عیسا وەت: «نه، بەڵکەم خوەش وه حاڵ ئەوانه که کەڵام خودا شنەفن و وه جێ تیەرن.»

داوا کردن نیشانەێگ وه عیسا

²⁹ وەختێ جەماێەت داشت فرەترەو بویا عیسا وەت: «ئی نەتەوه، نەتەوەێ فره شەڕئاشوێگن. داواێ نیشانەێگ کەن! وەلێ نیشانەێگ نیرێیده پێان بێجگه نیشانەێ یونس پەێخەمەر.

³⁰ چوینکه هەر ئەوجورە که یونس پەێخەمەر نیشانەێگ بی ئەڕا مەردم شار نێنەوا، کوڕ ئنسانیش ئەڕا ئی نەتەوه بوده نیشانەێگ.

³¹ له ڕوژ داوەری، مەلەکەێ باشور وەگەرد ئی نەتەوه زنیەو بود و ماکومێان کەێد، چوینکه ئەوه وه ئەو سەر دنیا هات تا زانیاری سڵێمان پادشا بشنەفێ، بنوڕن، کەسێگ گەوراتر وه سڵێمان پادشا ها ئێرا.

³² مەردم شار نێنەوا له ڕوژ داوەری وەگەرد ئی نەتەوه زنیەو بون و ماکومێان کەن، چوینکه ئەوانه وەبونەێ بانگەوازی یونس توبه کردن، بنوڕن، کەسێگ گەوراتر له یونس ها ئێرا.

چراخ جەسه

³³ «هویچکەس چراخێگ ڕوشن نیەکێ تا بشاریدێەو یا بنێدەێ ژێر سەوەتەێگ، بەڵکەم چراخەگه وەبان چراخدان نێدێ تا هەر کەس باێده ناو نویرەگه بوینی.

³⁴ چەو تو، چراخ جەسەێ تنه. ئەگەر چەود ساق بود، گیاند گشتێ ڕوشناو بود. وەلێ ئەگەر چەود ساق نود، گیاند گشتێ پڕ وه تیەریکی بود.

³⁵ ئمجا هوشد بو نەخواێ نویریگ که ها ناو تو، تیەریکی بود.

³⁶ ئەگەر گیاند گشتێ پڕ له ڕوشنایی بود و یەێ توزیش له لێ تیەریک نود، گیاند گشتێ بریقه دەێ، جور وەختێ که نویر چراخێگ کەفتیەسه ملدەو.»

سەرزەنشت ڕابەریل دینی

³⁷ وەختێ عیسا قسیەگانی تەمام بی، یەکی وه زانایل فرقەێ فەریسی، ئەڕا نان خواردن دەنگێ کرد. ئەیویش چیه ئەڕا ماڵی و دانیشت.

³⁸ وەلێ فەریسیەگه وەختێ دی، عیسا وەرجه نان خواردن دەسیلێ نەشورد، ئەڵاجوی هات.

³⁹ ئمجا عیسا خوداوەند وەپێ وەت: «ئیوه فەریسیەیل دەیشت پیاڵه و پێشقاو پاکەو کین، وەلێ وه ناخەو پڕ وه تەما و ناپاکیین!

⁴⁰ ئێ نەفامیل، ئەوه که دەیشتێ درس کردێه، ناویشێ درس نەکردیه؟

⁴¹ جا له ئەو چشتیله که وەناو پیاڵه و پێشقاو دێرین سەدەقه بێەن، تا گشت چشتێگ ئەڕادان پاکەو بود.

⁴² «وای وه حاڵ ئیوه فەریسیەیل! ئیوه له نەعناع و سوداب و هەر جور سەوزێگ ده یەک دین، وەلێ دادپەروەری خودا نادیده گرین و مابەت له هویردان چیه. ئیانه باێه وه جا باوردیاین و ئەوانیشە نەخستیاینه پشت گوش.

⁴³ وای وه حاڵ ئیوه ئی فەریسیەیل! چوینکه خوەشدان تێ له خاسترین شون کەنیسەیل بنیشین و مەردم وەناو کویچه و بازار سڵامدان بکەن.

⁴⁴ وای وه حاڵ ئیوه! چوینکه جور قەوریلێگین که نوقمەو بینه، مەردمیش نەزانسته له بانیان ڕێ کەن.»

⁴⁵ یەکی له قازییل شەریعەت وه جواو عیسا وەت: «ماموستا، تو وەگەرد ئی قسیەیله دێرێ وه پێمانیش خراو دەێ.»

⁴⁶ عیسا وەت: «وای وه حاڵ ئیوەیش، ئێ قازییل شەریعەت، چوینکه باریل قورسیگ نینه بان شان مەردم، وەلێ خوەدان نیەتواین تەنانەت کلکێگ ئەڕا مەیەت داین تەکان بێین.

⁴⁷ وای وه حاڵ ئیوه، چوینکه ئەڕا پەێخەمەریلی که وه دەس باوگیلدان کوشریانه، مەقبره سازین!

⁴⁸ وه ڕاسی که هەر ئیجوره وه کار ئەوانه مور کوتین. ئەوانه پەێخەمەریل کوشتن و ئیوه مەقبەره ئەڕاێان درس کین.

⁴⁹ وه ئی بونه زانیاری خودا فەرمایش کردێه که ”مه ئەڕا ئەوانه پەێخەمەریل و ڕەسولەیل کل کەم. وەلێ بڕێگیان کوشن و بڕێگیان عەزاو دەن.“

⁵⁰ جا، خوین گشت پەێخەمەریلی که خوینێان له دامەزرانن جهان تا ئێرنگه ڕشیاس ها مل ئی نەتەوه،

⁵¹ له خوین هابیل گردێه تا خوین زەکەریا که وه بین قوروانگا و شون موقەدەس مابەد کوشیا. بەڵێ، وەپێدان ئویشم که ئی نەتەوه ئەڕا خوین ئی هەمگه حساو دەێدەو.

⁵² وای وه حاڵ ئیوه ئێ قازییل شەریعەت! چوینکه کلیل ماریفەت هەڵگردینه، نه خوەدان چینه ناو، نه هیلین کەسیل تر بچنه ناو.»

⁵³ وەختێ عیسا چیاده دەیشت، ماموستایل تەورات و فەریسیەیل سەخت وەگەرد ئەوه وه موخالفەت هەڵسان و له باوەت چشتیل فرەێگ پرسیاره لێ کردن،

⁵⁴ جا کوڵه لێ گردوین و له فتراقا بین تا قسیەیگ له دەمێ دەر باێ و بخەنێ دام.