لوقا 1 - کتاب مقدس به زبان کردی جنوبی - گویش کلهوری

¹ تئوفیلوس پایەبەرز، وەبونەێ ئیه که فره له کەسیل دەس وه نویساین ئەو هەڵکەفتیله دانه که له لاێ ئیمه وه دی هاتنه،

² درس هەر ئەوجورە که ئەوانه که له سەرەتاوه وه چەو خوێان شاێەت بینه و خزمەتکاریل کەڵام بینه، وه ئیمه سپاردنه،

³ منیش که له سەرەتاوه وه گشت چشتێگ وردەو بویمه، ئیجوره سەلاح دیم که ئەوانه گله وه گله ئەڕادان بنویسم تئوفیلوس پایەبەرز،

⁴ تا وه ڕاسی ئەو چشتیله که یاێ گردینه، دڵنیاوه بوین.

پێشگویی وه دنیا هاتن یەحیاێ تەعمیددەر

⁵ وه دەوران هیرودیس، پادشاێ یەهودیه، کاهنێگ زنەیی کردیا، زەکەریا ناو. کاهنیل، خزمەتکاریل مابەد خوداوەند بین. زەکەریا وه کاهنیل دەسەی ئەبیا بی. ژنەگەیشێ ئلیزابت له نەتەوەێ هارون بی.

⁶ هەر دگیان له وەرچەو خوداوه سالح بین، ڕێ رەوشتیان وه پێ گشت حوکمیل و واجویل خوداوەند بی نەخس بی.

⁷ وەلێ ئەوانه هویچ مناڵێ نیاشتن، چوینکه ئلیزابت نەزوک بی و هەر دگیان پیر بین.

⁸ یەێ جار که نوەی خزمەت دەسەی زەکەریا بی و ئەویش وه پێشگاێ خودا کاهنی کردیا،

⁹ وه پێ نەریت خزمەت کاهنیل، تیرپشک خستن و ناو زەکەریا درهات تا بچوده ناو مابەد خوداوەند و بوخور بسزنێ.

¹⁰ وه زەمان سزانن بوخور، گشت جەماێەت وه دەیشت، خەریک دوعا کردن بین.

¹¹ وه ئەوره یەێ فریشتەێ خوداوەند که وساویه دەس ڕاس ئاگردان بوخورەگه، خوەێ وه زەکەریا نیشان دا.

¹² وەختێ زەکەریا ئەوه دی، ماتێەو برد و ترس گشت گیانێ گرده وەر.

¹³ وەلێ فریشتەگه وەپێ وەت: «زەکەریا، زاورد نەچود! دوعای تو وه جێ هاتێه. ژنەگەد ئلیزابت ئەڕا تو کوڕێگ تیەرێده دنیا و تو ناوێ نێده یەحیا.

¹⁴ تو دڵد پڕ له شادی و خوەشی بود و بڕ فرەێگ له وه دنیا هاتنێ شادمانەو بون،

¹⁵ چوینکه له وەر چەو خوداوه، بوده پیاێ گەوراێگ. یەحیا نەبایه هەراێهەر دەم بیده شراو یا چشتیل مەسکەر تر. تەنانەت وه زگ داڵگ، پڕ له روح‌القودوس بود و

¹⁶ بڕ فرەێگ له قەوم ئێسرائیل وەرەو لاێ خوداوەند، خوداێ خوێان تیەرێدەو.

¹⁷ یەحیا وه روح خودا و هێز ئەلیاس پەێخەمەر، وەرجه خوداوەند تێی تا دڵ باوگیل وەرەو لاێ مناڵیل بکیشێ و ملچەفتەوکەریل وەرەو لاێ زانیاری سالحانیل هەڵوگەردنێ، تا قەومێگ گورج ئەڕا خوداوەند درس بکێ.»

¹⁸ زەکەریا له فریشتەگه پرسی: «مه ئیه چوی بزانم؟ من پیاێ پیرێگم و ژنەگەمیش پیر بیه.»

¹⁹ فریشتەگه جواوی دا: «من جبرەئیلم که له وەردەم خودا وسم. ئێرنگه کل کریامه تا وەگەرد تو قسیه بکەم و ئی مزگانیه بیەمه پێد.

²⁰ ئێرنگه، لاڵ بویدن و تا ڕوژ هەڵکەفت ئی ئەمرە، تویەناێ قسیه کردن نێری، چوینکه قسیەیل مه که وه زەمان خوەێ وه ئەنجام رەسد، باوەڕ نەکردێ.»

²¹ وه ئی ناوه، جەماێەتیش چەوەڕێ زەکەریا بین و حیران بوین له دێر هاتنێ وەناو مابەد.

²² وەختێ هاته دەیشت، نەتویەنستیا وەگەرد مەردم قسیه بکێ. جا زانستن رویایگ وەناو مابەد دیه، چوینکه تەنیا ئیما و ئێشاره کردیاد و تویەناێ قسیه کردن نیاشت.

²³ زەکەریا وەشون ئیه که نوەی خزمەتی تەمام بی، چیه ئەڕا ماڵ.

²⁴ وەشون ماوەێ، ژنەگەیشێ ئلیزابت زگێ پڕ بی و پەنج مانگ، خوەێ له مەردم شاردەو.

²⁵ ئلیزابت وەتیا: «خوداوەند ئەڕام ئی کاره کردێه. خوداوەند وەناو ئی ڕوژیله مه خستیەسه بێز چەو خوەێ و ئەو چشته که وەناو مەردم ئەڕا مه، نەنگ و سەرشوڕی بی، لاێ برد.

پێشگویی وه دنیا هاتن عیسا

²⁶ وەختێ ئلیزابت زگێ شەش مانگ بوی، جبرەئیل فریشته وه لاێ خوداوه کل کریاده ئەڕا شارێگ وەناو ناوچەێ جەلیل که ناسره ناوێ بی،

²⁷ تا بچوه لاێ دویەتئازەوێگ وه ناو مریەم. مریەم دەزویران پیاێگ بی، یوسف ناو، له بنەماڵەێ داود پادشا.

²⁸ فریشتەگه چیه لاێ و وەت: «سڵام وه تو، ئێ ئەو کەسه که خودا وەپێ نەزەر کردێه. خوداوەند ها گەرد تو.»

²⁹ وەلێ مریەم، وه شنەفتن ئی قسیەیله فره پەشێو بی و وەگەرد خوێەو فکر کرد ئیه چوی سڵامێ بی.

³⁰ جا فریشتەگه وەپێ وەت: «مریەم، زاوردنەچو! خودا لوتفه پێد کردێه.

³¹ ئیسه، تو ئێمڵه بویدن، کوڕێگ تیەرێده دنیا و ناوێ نێده عیسا.

³² ئەوه بوده ئایەم گەوراێگ، وەپێ ئویشن کوڕ خوداێ هەربەرز. خوداوەند خودا تەخت پادشایی باپیرێ داود دەێده پێ.

³³ تا ئەبەد وه بنەماڵەێ یاقوب سەڵتەنەت کەێد و پادشایەگەیشێ هەراێهەر تەمام نیود.»

³⁴ مریەم وه فریشتەگه پرسی: «ئیه چوی بود، ئێ خو مه وەگەرد هویچ پیاێگ نویمه؟»

³⁵ فریشته جواو دا: «روح‌القودوس تێیده سەرد و هێز خوداێ هەربەرز بوده ساێەڕ بان سەرد. وه ئی بونه، ئەو مناڵه که تێیده دنیا، موقەدەس و کوڕ خوداوەند وەپێ ئویشن.

³⁶ ئەوەسه ئلیزابتیش که له خزمیل خوەده، وه دەورەێ پیری زگێ پڕه و کوڕێگ تیەرێده دنیا. ئەوه که ئویشن نەزوکه، ئێرنگه زگێ شەش مانگانه.

³⁷ چوینکه هویچ ئەمرێگ له لاێ خوداوه مەحاڵ نیه!»

³⁸ مریەم وەت: «مه کەنیز خوداوەندم. هەر چی له باوەت مه وەتی، با بکرێ.» جا فریشتەگه لەلاێ چی.

دێن مریەم له ئلیزابت

³⁹ وه ئەو ڕوژیله، مریەم هەڵساد و وه پەله چیه ئەڕا شارێگ وەناو کەژکویەیل ناوچەێ یەهودیه،

⁴⁰ چیه ناو ماڵ زەکەریا، وه ئلیزابت سڵام کرد.

⁴¹ وەختێ ئلیزابت سڵام مریەم شنەفت، مناڵەگەێ وەناو زگێ جویلیاد و ئلیزابت له روح‌القودوس پڕ بی،

⁴² وه دەنگ بەرز وەت: «تو وەناو ژنیل بمارکی و بمارکه مناڵەگەێ ناو زگد!

⁴³ مه کیم که داڵگ خوداوەندم باێده ئەڕا لام؟

⁴⁴ بنوڕ، چوینکه وەختێ دەنگ سڵام تو ڕەسیه گوشمەو مناڵەگه له خوەشی وەناو زگم جویلیادەو.

⁴⁵ خوەش وه حاڵ ئەوه که ئیمان هاورد، هەر چی که له لاێ خوداوەند وەپێ وەتریاس، وه ئەنجام رەسێ.»

بەیت مریەم

⁴⁶ مریەم وەت: «گیانم ستایش خوداوەند کەید و

⁴⁷ روحم وەبونەێ نجات دەرم خودا، کەیف و خوەشی کەی،

⁴⁸ چوینکه نوڕیه کەنیز سوک خوەێ. جا وەیولا، گشت نەتەوەیل، بمارکم زانن،

⁴⁹ چوینکه ئەو خوداێ تویەنا که ناوێ قودوسه، کاریل فره گەوراێگ ئەڕام کردێه.

⁵⁰ بەزەیی، پشت تا پشت، ئەڕا گشت کەسیلێگه که زاورێانه لێ چود.

⁵¹ خوداوەند وه باڵ بازو خوەێ قەوەتی نیشان داس و کەسیلێ که وەناو فکریل دڵ خوێان لویتبەرزن، تویچانه یەکەو.

⁵² فەرمانرەواگان له بان تەختەگانیان هاورده خوار و بێ فیسیل سەربەرزەو کرد؛

⁵³ ورسێەگان وه چشتیل خاس تێر کردێه وەلێ دەوڵەمەنەگان، دەس خاڵی کلیان کردێه.

⁵⁴ خوداوەند رامەت خوەێ هاورده هویر و خزمەتکار خوەێ قەوم ئێسرائیل مەیەت داس،

⁵⁵ هەر ئەو جوره که وه باپیریلمان ئێبراهیم و نەتەوەێ واده داوی که تا ئەبەد ئیجوره بکێ.»

⁵⁶ مریەم نزیک سێ مانگ له لاێ ئلیزابت مەن و جا هاتەو ئەڕا ماڵ خوێان.

وه دنیا هاتن یەحیاێ تەعمیددەر

⁵⁷ دی وەخت زاین ئلیزابت رەسوی. کوڕێگ وه دنیا هاورد.

⁵⁸ هاوساگان و خزمیل وەختێ شنەفتن که خوداوەند، رامەت فرەێگ وه حەقی کردێه، وەگەردێ شادمانەو بین.

⁵⁹ وەناو ڕوژ هەیشتم، هاتنه ئەڕا خەتەنه کردن مناڵەگه و تواسیان ناو باوگێ زەکەریا بنەنه ملێ.

⁶⁰ وەلێ داڵگ مناڵەگه وەت: «نه! ناوێ باێه یەحیا بود.»

⁶¹ ئەوانه وەتن: «وه خزمیل تو کەسێ ئیجور ناوێ نیاشتیه.»

⁶² جا وه ئێشاره، له باوگ مناڵەگه پرسین، که ناو مناڵەگەێ تواێ چه بود.

⁶³ زەکەریا داواێ تەختەێگ ئەڕا نویساین کرد، وه ملێ نویسا: «ناوێ یەحیاس!» گشت ماتێانەو برد.

⁶⁴ زەکەریا زویزی، زوانی واز بی و دەم وه ستایش خودا واز کرد.

⁶⁵ ترس گشت هاوساگان گردوی وەناو مەردمیش وه سەرئانسەر کەژکویەیل ناوچەێ یەهودیه له باوەت ئی چشتیله بیه قسیەو باس.

⁶⁶ هەر کەس ئی قسیەیله شنەفتیاد، وه دڵ خوێەو وەتیا که: «ئی مناڵه بوده چ کەسێگ؟» چوینکه دەس خوداوەند وەگەردیەو بی.

زەکەریا نەبوەت کەێد

⁶⁷ جا ئەو وەخته باوگێ، زەکەریا، له روح‌القودوس پڕ بی و ئیجوره پێشگویی کرد:

⁶⁸ «پڕ بمارکه خوداوەند، خوداێ ئێسرائیل، چوینکه هاتیەسه مەیەت قەوم خوەێ و ڕزگاریان کردێه.

⁶⁹ خوداوەند شاخ نجاتیگ ئەڕا ئیمه ناو بنەماڵەێ خزمەتکار خوەێ داود، ناسه پاوه،

⁷⁰ هەر ئەو جوره که له جارانەو وه زوان پەێخەمەریل موقەدەس خوەێ وەتوی

⁷¹ که ئیمه له دەس دشمەنیل وه گشت کەسیلێ که له ئیمه قینێان تێ، نجات دەێ،

⁷² تا ئەو بەزەیێه که وه باپیریلمان واده داوی وه جێ بارێ و پەێمان موقەدەس خوەێ بارێده هویر؛

⁷³ هەر ئەو قەسەمه که ئەڕا باوگمان ئێبراهیم خوارد

⁷⁴ که ئیمه له دەس دشمەنیلمان ڕزگارمان بکێ و مەیەتمان بێی که بی هویچ ترسێگ بپەرەسیمەێ،

⁷⁵ له لاێ ئەیو، تەمام ڕوژیل عمرمان موقەدەس و سالحان بویمن.

⁷⁶ جا تو، ئێ ڕوڵەم، وەپێد ئویشن پەێخەمەر خوداێ هەربەرز؛ چوینکه کەفێده نوای خوداوەند تا ڕێ ئەڕاێ گورجەو بکێد،

⁷⁷ تا قەوم خودا ئاگادار بکێ که وەگەرد بەخشین گونایلێان، نجات پەێا کەن.

⁷⁸ چوینکه خوداێ ئیمه دڵی پڕ له رامەته، که وه ئی بونه ڕوشنایی دەم شەوەکی له بەرزایی ئاسمانەو وه ئیمه دروشێدەو.

⁷⁹ تا وه کەسیلێگ که هانه ناو تیەریکی و ژێر ساێەڕ مەرگ، نویر خوەێ بدرەوشێدەو، وه گامیلمان وه ڕێ ئاشتی و سڵامەتی ڕێنمایی بکێ.»

⁸⁰ مناڵەگەیش گەورا بویاد و وه روحەو، قەوەت گردیاد، تا ئەو ڕوژه که خوەێ وه قەوم ئێسرائیل ئاشکرا بکێ، له چوڵەوانی مەن.