یوحەنا 8 - کتاب مقدس به زبان کردی جنوبی - گویش کلهوری

¹ وەلێ عیسا چیه ئەڕا کویەێ زیتون.

بەخشین ژن داوانپێس

² شەوەکی شەفەق، وه دواره عیسا هاتەو ئەڕا مابەد. مەردم گشتێ هاتنه ئەڕا لاێ و ئەیویش دانیشت و تالیمیان دا.

³ ماموستایل تەورات و زانایل فرقەێ فەریسی، ژنی که له وەخت داوانپێسیەو گردوینەێ، هاوردنی و نانەی ناوڕاس مەردمەگه،

⁴ وه عیسا وەتن: «ماموستا، ئی ژنه له وەخت داوانپێسی گیریاس.

⁵ موسای پەێخەمەر وەناو شەریعەت وه ئیمه حوکم کردێه که ئیجور ژنيلێگ کوچگواران بکێم. ئیسه، تو چه ئویشێ؟»

⁶ ئیه وەتن تا ئەزمونێ بکەن و چشتێ ئەڕا بخت کردن وەپێ وه دەس بارن. عیسا چەمیادەو، وه کلکێ له بان زەوی نویسیا.

⁷ وەختێ ئەوانه هەر له لێ پرسیان، عیسا هێز گرد و وەپێان وەت: «وەناو ئیوه، هەر کەس بێ گوناس، با یەکمین کوچگ بیده ئی ژنه.»

⁸ وه دواره چەمیادەو وەبان زەوی نویسیا.

⁹ وەلێ وەختێ ئیه شنەفتن، گله گله، له گەورا وه بویچگ له ئەوره چین، عیسا وەگەرد ئەو ژنه که له ڕوی‎وەڕویی وساوی، تەنیا مەن.

¹⁰ ئمجا عیسا هێز گرد و وه ئەو ژنه وەت: «ژنەگه، ئێ ئەوانه هانه کو؟ هویچکەس ماکومد نەکرد؟»

¹¹ ژنەگە وەت: «هویچکەس، گەورەم.» عیسا وەت: «منیش ماکومد نیەکەم. بچو و دیتر وه ئیەولا گونا مەکه.»

منم نویر جهان

¹² عیسا وه دواره وەگەرد مەردم قسیه کرد و فەرمایش کرد: «منم نویر جهان. هەر کەسێگ بکەفێه شونم وەناو تیەریکی ڕێ نیەکێ، بەڵکەم نویر زنەیی دێرێد.»

¹³ جا فەریسیەیل وەپێ وەتن: «تو ئەڕا خوەد شاێەتی دەی، شاێەتیەگەد درس نیه.»

¹⁴ عیسا وه جواوێانەو وەت: «تەنانەت ئەگەر خوەم ئەڕا خوەم شاێەتی بێەم، شاێەتیەگەم درسه، چوینکه زانم له کوره هاتمه و چمه ئەڕا کوره. وەلێ ئیوه نيەزانين مه له کوره هاتمه یا چمه ئەڕا کوره.

¹⁵ ئیوه وه فکریل ئنسانی داوەری کین، وەلێ مه وه مل کەسێگەو داوەری نیەکەم.

¹⁶ وەلێ تەنانەت ئەگەر داوەریش بکەم، داوەریەگەم درسه، چوینکه تەنیا مه نیم داوەری کەم، بەڵکەم منم و باوگ ئاسمانی که کلم کرد.

¹⁷ وەناو شەریعەت ئیوه نویسریاس که شاێەتی دو نەفەر درسه.

¹⁸ منم که شاێەتی ئەڕا خوەم دەم و باوگێگیش که کلم کرد شاێەتی ئەڕام دەێ.»

¹⁹ ئمجا وه عیسا وەتن: «باوگد ها کوره؟» عیسا وەت: «نه مه ناسین و نه باوگم. ئەگەر مه بناسیاین باوگمیش ناسیاین.»

²⁰ عیسا ئی قسیەیله له وەخت تالیم له ناو مابەد له شونێگ که خەزانەی مابەد له ئەوره بی، وەت. وەلێ هویچکەس نەگردێ چوینکه هێمراێ وەختێ نەرەسوی.

قسیەیل عیسا له باوەت مەرگ خوەێ

²¹ ئمجا وه دواره عیسا وەپێان وەت: «مه چم و ئیوه مینێ مه کین و وەناو گونادان مرین. ئیوه نیەتویەنین باین ئەڕا ئەو شونه که مه چم.»

²² جا جویلەکەیل وەتن: «ئێ بو بتواێ خوەێ بکوشێ، که ئویشێ: ”ئیوه نیەتویەنین باینه ئەڕا ئەو شونه که مه چم“؟»

²³ عیسا وەپێان وەت: «ئیوه هن خوارین، مه هن بانم. ئیوه هن ئی جهانینه، مه هن ئی جهانه نیم.

²⁴ وەپێدان وەتم که وەناو گونایلدان مرین، چوینکه ئەگەر ئیمان نارین که من ئەوەم، وەناو گونایلدان مرین.»

²⁵ جا وەپێ وەتن: «تو کید؟» عیسا وەت: «مه هەر ئەوەمه که له سەرەتاوه وەپێدان وەتم.

²⁶ چشتیل فرەێگ دێرم که له باوەت ئیوه بویشم و ماکومدان بکەم. وەلێ ئەیو که کلم کرد، وه حەقه و مه ئەو چشته که له لێ شنەفتمه، وه جهان جار دەم.»

²⁷ ئەوانه حالی نوین که عیسا له باوەت باوگ ئاسمانی وەگەردێان قسیه کەی.

²⁸ جا عیسا وەپێان وەت: «وەختێ کوڕ ئنسان بەرزەو کردین، ئەوسا زانین که من ئەوەمه و له خوەمەو هویچ نیەکەم، بەڵکەم هەر ئەو جوره قسیه کەم که باوگ ئاسمانیم نیشانم داس.

²⁹ ئەیو که کلم کرد ها گەردمەو. ئەیو تەنیام نەێشتیه، چوینکه مه هەمویشه ئەو کارەیله کەم که خوەشنودێەو کەێد.»

³⁰ وه ئی قسیەیل عیسا، قێر فرەێگ وەپێ ئیمان هاوردن.

ڕاسی ڕزگاردان کەی

³¹ ئمجا عیسا وه جویلەکەیلی که وەپێ ئیمان هاوردوین، وەت: «ئەگەر وەناو کەڵام مه نیشتەجێ بین، وەڕاسی شاگردیل منین و

³² ڕاسی ناسین و ڕاسیش ڕزگاردان کەی.»

³³ ئەوانه وه عیسا جواو دان: «ئیمه وه نەتەوەێ ئێبراهیمیم و هەراێهەر خوڵام کەسێگ نویمنه. جا چوینه که ئویشێ: ”ئیوه ڕزگار بوین“؟»

³⁴ عیسا جواویان دا: «وه ڕاسی، وه ڕاسی، وەپێدان ئویشم، هەر کەسێگ گونا کەێ، خوڵام گوناس.

³⁵ خوڵام ئەڕا هەمویشه وەناو ماڵ نیەمینێد، وەلێ کوڕ ئەڕا هەمویشه مینێد.

³⁶ جا ئەگەر کوڕ ڕزگاردان بکێ، وه ڕاسی ڕزگارین.

³⁷ زانم که وه نەتەوەێ ئێبراهیمین، وەلێ هاینه شون کوشتن منەو، چوینکه کەڵام مه وەناو ئیوه شونێگ نێری.

³⁸ مه له ئەو چشته قسیه کەم که له لاێ باوگ ئاسمانیم دیمه، ئیوەیش ئەو کاره کین که له باوگدان شنەفتینه.»

³⁹ ئەوانه وه عیسا جواو دان: «باوگ ئیمه ئێبراهیمه.» عیسا وەت: «ئەگەر مناڵیل ئێبراهیم بویاین، رێ رەوشتدان جور ئێبراهیم بی.

⁴⁰ وەلێ ئیوه ئێرنگه هاینه شون کوشتن منەو؛ مه که ئەو ڕاسیه له خودا شنەفتم وەپێدان وەتمه. ئێبراهیم ئی کاره نەکرد.

⁴¹ ئیوه کردەوێ باوگدان کین.» ئەوانه وه عیسا وەتن: «ئیمه زوڵەزا نیمن! یەێ باوگ دێریم ئەیویش خوداس.»

⁴² عیسا وەپێان وەت: «ئەگەر خودا باوگدان بویاد، دوسم داشتیاین، چوینکه مه له لاێ خوداوه هاتمه و هامه ئێره. مه له خوەمەو ناتمه، بەڵکەم ئەیو کلم کرد.

⁴³ ئەڕا ئەو چشته که ئویشم حالیدان نیود؟ وەبونەێ ئیه که تاموڵ شنەفتن قسیەی مه نێرین.

⁴⁴ ئیوه وه باوگدان ئبلیس تالوق دێرین و تواین خاستەیل باوگدان وەجێ بارین. ئەوه له سەرەتاوه خوینکەر بی و وەگەرد ڕاسیەو میانەێگ نێرید، چوینکه هویچ ڕاسی وەناوێ نیه. هەر وەخت درو ئویشێ، له زات خوەێ ئویشێ؛ ئەڕا ئیه که دروزنه و باوگ گشت درویله.

⁴⁵ وەلێ وەبونەێ ئیه که مه ڕاسەگەی ئویشم باوەڕه ‎پێم نیەکین.

⁴⁶ کامدان تویەنین مه وه گوناێگ ماکوم بکێن؟ ئەگەر ڕاسەگەی ئویشم، ئەڕا باوەڕم نیەکین؟

⁴⁷ کەسێ که له خوداس، گوشە کەڵام خودا گری؛ مدوێ ئیه که ئیوه گوشە کەڵام خودا نیەگرین ئیەسه که له خودا نین.»

وەرجه ئەوه که ئێبراهیم بود، ‎مه هەم

⁴⁸ جویلەکەیل وه عیسا جواو دان: «ئێ درس نەوەتیم که سامرید و خوو ديری؟»

⁴⁹ عیسا وەت: «مه خوو نێرم، بەڵکەم حرمەت باوگ ئاسمانیم گرم، وەلێ ئیوه وه مه بی حرمەتی کین.

⁵⁰ هەر چەن مه وەشون جەڵاڵ خوەم نیم. یەکیگ هەس که ها شون جەڵاڵ منەو، ئەیوه که داوەری کەی.

⁵¹ وه ڕاسی، وه ڕاسی، وەپێدان ئویشم، ئەگەر کەسێگ قسیەی مه بپارێزنێ، هەراێهەر مەرگ وه چەو نیوینی.»

⁵² جویلەکەیل وەپێ وەتن: «ئێرنگه دی خاس زانستیم خوو دێرێ! ئێبراهیم مرد و ئەو باقی پەێخەمەریلیش مردن، ئێرنگه تو ئویشێ، ”ئەگەر کەسێ وه قەوڵم بکێ، هەراێهەر تام مردن نیەکێ!“

⁵³ ئێ تو له باپیرمان ئێبراهیم گەوراترێ؟ ئەو مرد و پەێخەمەریلیش مردن. خوەد وه کی زانید؟»

⁵⁴ عیسا وەت: «ئەگەر مه خوەم جەڵاڵ بێەم، جەڵاڵ مه هویچه. ئەوه که جەڵاڵم دەێ، باوگ منه، هەر ئەوه که ئویشین خوداێ ئیمەس.

⁵⁵ ئیوه نیەناسینێ، وەلێ مه ناسمێ. ئەگەر بویشم نیەناسمێ، جور ئیوه دروزنم. وەلێ مه ناسمێ و کەڵامەگەێ پارێزنم.

⁵⁶ باپیردان ئێبراهیم خوەشاڵەو بویاد که ڕوژ مه بوینێد؛ جا ئەوه دی و دڵخوەشەو بی.»

⁵⁷ جا جویلەکەیل وه عیسا وەتن: «هێمراێ تو پەنجا ساڵد نویه و ئێبراهیم دیده؟»

⁵⁸ عیسا وەپێان وەت: «وه ڕاسی، وه ڕاسی، وەپێدان ئویشم، وەرجه ئەوه که ئێبراهیم بود، من هەم!»

⁵⁹ جا کوچگ هەڵگردن تا کوچگوارانی بکەن، وەلێ عیسا خوەێ شاردەو و لەناو مابەدەگه چیه دەیشت.