یوحەنا 7 - کتاب مقدس به زبان کردی جنوبی - گویش کلهوری

عیسا وەناو جەشن کوڵایل

¹ وەشون ئیه، عیسا ماوەێگ له ناوچەێ جەلیلەو گەردیاد و نيەتواسیا وه ناوچەێ یەهودیه بود، چوینکه جویلەکەیل تواسیان بکوشنێ.

² جەشن کوڵایل که یەکی وه جەشنیل جویلەکەیله، نزیک بی.

³ جا برایل عیسا وەپێ وەتن: «ئێرا بیله جێ و بچو ئەڕا یەهودیه تا شاگردیلدیش کاریلێ که کەی بوینن،

⁴ چوینکه هەر کەس که بتواێ بناسنێ، وه دزیەو کار نیەکێ. تو که ئی کاريله کەی، خوەد وه جهان نیشان بێه.»

⁵ ئەڕا ئیه که تەنانەت برایلیشێ ئیمان وەپێ ناوردوین.

⁶ عیسا وەپێان وەت: «هێمراێ وەخت مه نەرەسیه، وەلێ ئەڕا ئیوه هەر وەختێگ خاسه.

⁷ جهان نیەتویەنی له ئیوه قینێ باێ، وەلێ له مه قینێ تێ، چوینکه مه له باوەتێەو شاێەتی دەم که کاریلێ گەنه.

⁸ ئیوه خوەدان بچنه ئەڕا جەشن، مه هێمراێ وه ئی جەشنه نیەتیەم، چوینکه هێمراێ وەخت مه وه تەمامی نەرەسیه.»

⁹ عیسا ئیه وەت و مەنه ناو جەلیل.

¹⁰ وەلێ وەشون ئیه که براگانێ چینه ئەڕا جەشن، خویشێ چی، وەلێ نه ئاشکرا بەڵکەم وه دزیەو.

¹¹ جویلەکەیل، له وەخت جەشن وەشونێەو گەردیان و وەتیان: «ئەو پیا ها کوره؟»

¹² جا وەناو مەردمەگه له باوەت عیسا قسیەو باس فره بی. بڕێگیان وەتیان: «ئەوه پیاێ خاسێگه.» بڕێگتر وەتیان: «نەخیر! مەردمەگه له ڕێ وه دەر کەێ.»

¹³ وەلێ ئەڕا ئیه که له جویلەکەیل رخێان چیاد، هویچکەس له باوەتێ ئاشکرا قسیه نیەکردیا.

تالیمیل عیسا

¹⁴ وەختێ یەێ کوت له ڕوژیل جەشنەگه ڕەد بی، عیسا هاته ناو مابەد‎ و شرو کرده تالیم داین.

¹⁵ جویلەکەیل سەریان سڕ مەنوی، وەتیان: «ئی پیا که هەراێهەر تالیم نێریاس، چوی ئیجور زانیاریێگ دێرێد؟»

¹⁶ جا عیسا وه جواویان وەت: «تالیمیل مه له خوەمەو نیه، بەڵکەم له ئەیوه که کلم کرد.

¹⁷ ئەگەر کەسێ بتواێ خاست خودا وه جێ بارێ، زانی که ئی تالیمیله له خوداس یا له خوەمەو ئویشم.

¹⁸ ئەوه که له خوێەو بویشی، ها شون جەڵاڵ خوەێ، وەلێ ئەو کەسه که ها شون جەڵاڵ ئەیو که کلی کردێه، ڕاس‎درسه و درودەلسه وەناوێ نیه.

¹⁹ ئێ مەر موسای پەێخەمەر، شەریعەت نیاسه پێدان؟ وەلێ هویچکامدان شەریعەت وه جا نیەتیەرێن. ئەڕا چه پشت ئەڕا کوشتنم بەساینه؟»

²⁰ جەماێەتەگه جواو دان: «توی خوو دێرێ! کی پشت ئەڕا کوشتند بەساس؟»

²¹ عیسا جواو دا: «من کارێ کردم و ئیوه گشتدان سەردان له لێ سڕ مەن.

²² موسا حوکم خەتەنه داسه پێدان - هەر چەن ئیه نه له موسا بەڵکەم له باپیریل قەوم بی - ئیوەیش وه ڕوی ئی حوکمه له ڕوژ شەبات که هەر ئەو شەمەێ موقەدەس جویلەکەیلەسه کوڕيلدان خەتەنه کین.

²³ ئەگەر کوڕێگ له ڕوژ شەبات خەتەنه کریەد تا شەریعەت موسا نەشکی، ئێ ئەڕا له مه توڕەین که وه ڕوژ شەبات سەر تا پاێ ئنسانێگ خاسەو کردمه؟

²⁴ وه ڕوی شێوه داوەری مەکەن، بەڵکەم حوکمدان داداپەروەرانه بود.»

ئێ بو ئەوه مەسیح بود؟

²⁵ جا بڕێگ له مەردم شار ئورشەلیم وەتیان: ئیه هەر ئەو پیا نیه که توان بکوشنێ؟

²⁶ ئەوەسه ها ئێره ئاشکرا قسیه کێ و هویچه پێ نیویشن! یانێ بو گەورایل قەوم وه ڕاسی پێ بردوین که ئی ئایەمه هەر ئەو مەسیح واده دریایه؟

²⁷ وەلێ ئیمه زانیم ئی پیا له کورەو تێ، وەلێ وەختێ مەسیح ئاشکرا بو، هویچکەسێگ نیەزانێ له کورەو تێ.»

²⁸ ئمجا عیسا وەختێ وەناو مابەد تالیم دیا، وه دەنگ بەرز وەت: «مه ناسین و زانين له کورەو تیەم. وەلێ وه خاست خوەم ناتمه. ئەیو که کلم کردێه، حەقه؛ ئیوه نیەناسینێ.

²⁹ وەلێ مه ناسمێ، چوینکه مه له لاێ ئەیو تیەم و ئەیویش مه کل کرد.»

³⁰ جا تواسن بگرنەێ، وەلێ هویچکەس دەس ئەڕاێ دریژەو نەکرد، چوینکه هێمراێ وەختێ نەرەسوی.

³¹ وەلێ، قێر فرەێگ له مەردمەگە وەپێ ئیمان هاوردن. ئەوانه وەتیان: «ئێ مەگەر وەختێ مەسیح ئاشکرا بود، نیشانه و موجزەیل فرەترێگ وه ئی پیا، کەید؟»

³² زانایل فرقەێ فەریسی شنەفتن جەماێەت له باوەت عیسا ئیجوره قسیه و باسیلێگ کەن. جا گەورایل کاهنیل و فەریسیەیل، نگابانیل مابەد کل کردن تا بگرنەێ.

³³ ئمجا عیسا وەت: «ماوەێ کەمێگ تر هامه گەرددانە‎و، ئمجا چمه ئەڕا لاێ ئەو کەسه که کلم کرد.

³⁴ مینێ مه کین، وەلێ نیینوینەمەو؛ ئیوه نیەتویەنین باینه ئەڕا ئەو شونێگ که مه هەم.»

³⁵ جویلەکەیل وه یەکترەکی وەتیان: «ئی پیا تواێ بچوده ئەڕا کوره که ئیمه پەێاێ نیەکیم؟ یانێ تواێ بچوه ئەڕا لاێ جویلەکەیلێگ که وەناو یونانیەگان تەفرتویناوه بینه و یونانیەگان تالیم بێی؟

³⁶ مەبەستی چەس که ئویشێ، ”مینێ مه کین، وەلێ نیینوینەمەو و ئیوه نیەتویەنین باینه ئەڕا ئەو شونه که مه هەم“؟»

قسیەیل عیسا وه ئاخرین ڕوژ جەشن

³⁷ ڕوژ ئاخر هەفت ڕوژ جەشنەگه که گەوراترین ڕوژ جەشن بی، عیسا هەڵساده سەرپا و وه دەنگ بەرز هاوار کرد: «ئەگەر کەسێ تیەنیه، باێه ئەڕا لاێ من و بنوشێ.

³⁸ هەر کەسێگ وه من ئیمان بارێ، هەر ئەوجورە که کتاو موقەدەس وەتێه: له ناخێەو چەمیل ئاو زنەیی‌دەر کەفێه ڕێ.»

³⁹ عیسا ئی قسیه له باوەت روح خودا وەت، که ئەوانه که ئیمان وەپێ تیەرن، گرنەێ وەر؛ چوینکه هێمراێ روح خودا نێریاوی، ئەڕا ئیه که عیسا هێمراێ جەڵاڵ پەێا نەکردوی.

دو دەسەی وەناو مەردم له باوەت عیسا

⁴⁰ بڕێگ له مەردم وەختێ ئی قسیەیله شنەفتن، وەتن: «وه ڕاسی ئیه هەر ئەو پەێخەمەرەسه که باێه باێ.»

⁴¹ بڕێگ تر وەتن: «ئی پیا مەسیحه.» وەلێ بڕێگ تر وەتن: «مەر مەسیح له جەلیلەو تێ؟

⁴² مەر کتاو موقەدەس نەوەتیه که مەسیح له نەتەوەێ داود پادشاس و له بەیت‌لحم تێ، هەر ئەو ئاواییه که داود وه ئەوره زنەیی کردیا؟»

⁴³ جا وەناو مەردم وه سەر عیسا بیه دو دەسەی.

⁴⁴ بڕێگ له لێان تواسن بگرنەێ، وەلێ هویچکەس دەس ئەڕاێ دریژەو نەکرد.

بی ئیمانی گەورایل جویلەکە

⁴⁵ ئمجا نگابانیل مابەد هاتنەو ئەڕا لاێ گەورایل کاهنیل و فەریسیەیل. ئەوانه له نگابانەگان پرسین: «ئەڕا عیسا ناوردين؟»

⁴⁶ نگابانیل جواو دان: «تا ئێرنگه، هویچکەس جور ئی پیا قسیه نەکردیه!»

⁴⁷ فەریسیەیل وەتن: «ئێ ئیوەیش گول خواردینه؟

⁴⁸ مەر کەسێگ له گەورایل قەوم یا فەریسیەیل وەپێ ئیمان هاوردێه؟

⁴⁹ وەلێ ئی جەماێەته که چشتێ له شەریعەت نیەزانن، لانەت کریاێن.»

⁵⁰ نیقودیموس، که وەرجه ئەوه چوی ئەڕا لاێ عیسا و یەکیگ له فەریسیەگان بی، وەته پێان:

⁵¹ «مەر شەریعەت ئیمه کەسێگ ماکوم کێ بی ئەوه که یەکم جار گوش بگرێه قسیەیلی و بزانێ چه کردیه؟»

⁵² ئەوانه جواو دان: «مەر تنیش جەلیلید؟ بنێ بگر و بزان که له جەلیلەو هویچ پەێخەمەرێگ ئاشکرا نویه.»

⁵³ له شونێ هەر کامیان چینەو ئەڕا ماڵ خوێان،