یوحەنا 5 - کتاب مقدس به زبان کردی جنوبی - گویش کلهوری

شەفاێ پیاێ شەل کوچ

¹ وەشون ماوەێگ، یەکی له جەشنیل جویلەکەیل بی و عیسا چیه ئەڕا شار ئورشەلیم.

² وەناو ئورشەلیم، له لاێ ’دەروازەێ پەس‘ حەوزێگ هەس که وه زوان ئارامی ’بەیت‌حسدا‘ وەپێ ئویشن که پەنج گله وەرتاێرمه دێرێ.

³ وه ئەوره قێر فرەێگ له عەلیلیل، جور کورەگان و شەلەگان‎ و فەلەجەگان، هەڵاژیاوین و چەوەڕێ بین تا ئاوەگه بجویلێدەو.

⁴ چوینکه ئەوانه گومان کردیان هەر چەن وەخت یەێ جار فریشتەێگ له لاێ خوداوەند تێد و ئاوەگه جویلنێدەو؛ جا وەشون جویلیان ئاوەگە یەکم کەسێ که چیاده ناو حەوزەگه، له هەر نەخوەشێ که داشت شەفا گردیاد.

⁵ پیاێگ له ئەوره بی که وه ماوەێ سی و هەیشت ساڵ عەلیل بی.

⁶ وەختێ عیسا پیاگه دی که له ئەوره هەڵاژیاس و زانست که ماوەێ فرەێگه ها ئەوره، وەپێ وەت: «تواێ شەفا بگرێ؟»

⁷ پیا شەل کوچەگه وەته عیسا: «گەورەم، وەختێ ئاو جویلێیدەو کەسێگ نێرم بخێدەمه ناو حەوزەگه، تا توام خوەم برەسنمه ئەوره، وەرجه مه یەکیگ تر چیەسه ناوێ.»

⁸ عیسا وەپێ وەت: «هەڵس، جیەگەد هەڵگر و ڕێ بکه.»

⁹ پیاگه زویزی شەفا گرد و جیەگەێ هەڵگرد و کەفته ڕێ. ئەو ڕوژه، شەبات که هەر ئەو شەمەێ موقەدەس جویلەکەیلەسه، بی.

¹⁰ جا جویلەکەیل وه پیاگه که شەفا گردوی وەتن: «ئیمڕو شەباته ئەڕا تو ڕەوا نیه جیەگەد هەڵگری بوید.»

¹¹ وەلێ ئەو پیا جواویان دا: «ئەیو که شەفام داس وەپێم وەت، ”جیەگەد هەڵگر و بکەفه ڕێ“.»

¹² له لێ پرسین: «ئەوه که وەپێد وەت، ”جیەگەد هەڵگر و بکەفه ڕێ“، کیه؟»

¹³ پیاگه که شەفا گردوی نیەزانست ئەوه کیه، چوینکه عیسا وەناو جەماێەتێگ که له ئەوره بی، نوقوم بی.

¹⁴ وەشون چەنێ، عیسا پیاگه وەناو مابەد پەێا کرد، وەپێ وەت: «بنوڕ خاسەو بیده، دی گونا مەکه تا له ئیه بەتر وه سەرد نای.»

¹⁵ پیاگه چی وه جویلەکەیل وەت کەسێگ که شەفاێ داس، عیسا بیه.

¹⁶ وەبونەێ ئیه که عیسا ئی کاریله وه ڕوژ شەبات کردیا، جویلەکەیل ئەزیەتی کردیان.

¹⁷ وەلێ جواو عیسا ئیه بی: «ئێرنگه باوگ ئاسمانیم کار کەی و منیش کار کەم.»

¹⁸ وه ئی بونه بی که جویلەکەیل فرەتر وەشون ئیه بین تا عیسا بکوشن، چوینکه نه تەنیا یاساێ شەبات شکانیاد، بەڵکەم تەنانەت خودا وه باوگ خوەێ خوەنریاد و خوەێ وەگەرد خودا کردیا یەکی.

هێز و دەسڵات کوڕ خودا

¹⁹ جا عیسا وەپێان وەت: «وه ڕاسی، وه ڕاسی، وەپێدان ئویشم: کوڕ نیەتویەنی وه خوێەو هویچ کارێگ بکێ مەر کاریلێ که دوینی باوگ ئاسمانی کەی؛ چوینکه هەر کارێگ باوگ کەی، کوڕیش هەر ئەو کاره کەی.

²⁰ چوینکه باوگ کوڕ دوس دێرێ و گشت کاریلێ که خوەێ کەی وەپێ نیشان دەێ. کاریل له ئیانه گەوراتریش نیشانی دەێ تا ئەڵاجویدان باێ.

²¹ چوینکه هەر ئەوجورە که باوگ مردگیل زنیەو کەید و زنەیی وەپێان بەخشی، کوڕیش وه هەر کەسێگ که خوەێ بتواێ، زنەیی بەخشی.

²² چوینکه باوگ هویچکەس داوەری نیەکێ، بەڵکەم گشت کار داوەری سپاردێەسه دەس کوڕ،

²³ تا گشت حرمەت کوڕ بگرن، هەر ئەوجورە که حرمەت باوگ گرن. هەر کەس حرمەت کوڕ نیەگرێ، حرمەت باوگیشێ نیەگرێ که کلی کردێه.

²⁴ وه ڕاسی، وه ڕاسی، وەپێدان ئویشم، هەر کەس کەڵام مه بشنەفێ و وه ئەوه که کلم کرد، ئیمان بارێ زنەیی ئەبەدی دێرێ. ئەوه ماکوم نیود، بەڵکەم له مەرگ گوزیشتێه و رەسیەسه ژیان.

²⁵ وه ڕاسی، وه ڕاسی، وەپێدان ئویشم، زەمانێگ رەسێ، بەڵکەم هەر ئیسەسه که مردگیل دەنگ کوڕ خودا شنەفن و کەسیلێگیش که شنەفن، زنیەو بون.

²⁶ چوینکه هەر ئەوجورە که باوگ وەناو خوەێ زنەیی دێرێ، وه کوڕیش بەخشیه تا کوڕیش وەناو خوەێ زنەیی بیاشتود،

²⁷ ئی دەسڵاته داسه کوڕ که داوەری بکێ، چوینکه ئەیو کوڕ ئنسانه.

²⁸ له ئیه ئەڵاجویدان نای، چوینکه زەمانێگ تێ که گشت ئەوانه که هانه ناو قەور، دەنگ ئەیو شنەفن

²⁹ و تیەنه دەیشت. ئەوانەێ که کردەوەێان خاس بیه، زنیەو بون که تا ئەبەد زنەیی بکەن و ئەوانه که کردەوەێان خراو بیه، زنیەو بون تا ماکوم بون.

³⁰ من له خوەمەو نیەتویەنم کارێ بکەم، هەر ئەوجورە که شنەفم داوەری کەم، داوەریەگەم دادپەروەرانەس، چوینکه داواێ خاست خوەم نیەکەم، بەڵکەم هامه شون خاست ئەیو که کلم کردێه.

شاێەتی له باوەت عیسا

³¹ «ئەگەر تەنیا خوەم له باوەت خوەمەو شاێەتی بێەم، شاێەتیەگەم درس نیه.

³² یەکیگ تر هەس که له باوەت منەو شاێەتی دەێ و مه زانم شاێەتی که له باوەت منەو دەێ، درسه.

³³ ئیوه کەسیلێگ کل کردینه ئەڕا لاێ یەحیا و ئەو ئەڕا ڕاسی شاێەتی داس.

³⁴ نه ئیه که مه شاێەتی ئنسان قەبوڵ بکەم، بەڵکەم ئی چشتیله ئویشم تا ئیوه نجات پەێا بکێن.

³⁵ یەحیا چراخێگ گڕان بی که نویر دیاد و ئیوه تواسیاین ماوەێگ وەناو نویرەگەێ دڵخوەش بوین.

³⁶ وەلێ مه شاێەتێگ دێرم که له شاێەتی یەحیا گەوراتره، چوینکه کاریلێ که باوگ ئاسمانی وه من سپاردیه تا وه ئەنجام برەسنم، یانێ هەر ئی کاریله که کەم له باوەت مه شاێەتی دەن که باوگ کلم کردێه.

³⁷ هەر ئەو باوگێ که مه کل کردێه، خوەێ له باوەت منەو شاێەتی داس. ئیوه هەراێهەر دەنگێ نەشنەفتینه و هەراێهەر دەمچەوی نێنه

³⁸ و کەڵامەگەیشێ وەناو دڵدان نیەمینێ، چوینکه وه ئەو کەسه که ئەیو کل کردێه، ئیمان نێرین.

³⁹ ئیوه کتاویل موقەدەس دینه یەکەو، چوینکه خیاڵ کین له ڕێ ئەوانه وه زنەیی ئەبەدی دەس پەێا کین، هەر ئیانەنه که وه مه شاێەتی دەن،

⁴⁰ وەلێ نیەتواین باینه ئەڕا لاێ مه تا زنەیی بیاشتوین.

⁴¹ من جەڵاڵ له ئایەمیل قەبوڵ نیەکەم،

⁴² وەلێ زانم که مابەت خودا وەناو دڵدان نێرین.

⁴³ من وه ناو باوگ ئاسمانیم هاتمه، وەلێ قەبوڵم نیەکین. ئەگەر یەکیگ تر وه ناو خوەێ باێ، قەبوڵێ کین.

⁴⁴ چوی تویەنين ئیمان بارین وەختێ جەڵاڵ له یەکترەکی گرین و مینێ جەڵاڵێگ نیەکین که له لاێ خوداێگ که یەکیگه، تێی؟

⁴⁵ خیاڵ مەکەن که مه له لاێ باوگ ئاسمانی بخت کەمه پێدانەو؛ یەکی هەس که بخت بکەیده پێدان، ئەوه موسای پەێخەمەره، هەرئەوه که ئمید بەساینەسه پێ.

⁴⁶ چوینکه ئەگەر وه موسا باوەڕ بکردیاين وه منیش باوەڕ کردیاين، چوینکه ئەوه له باوەت مه نویساس.

⁴⁷ وەلێ ئەگەر باوەڕ وه نویسریایەگانێ نێرین، ئێ چوی قسیەیلم باوەڕ کین؟»