یوحەنا 4 - کتاب مقدس به زبان کردی جنوبی - گویش کلهوری

عیسا و ژن سامری

¹ عیسا زانست که زانایل فرقەێ فەریسی شنەفتنه که عیسا فرەتر له یەحیا شاگرد دێرێ و خوسڵ تەعمید دەێ،

² - هەر چەن عیسا خوەێ تەعمید نیاتیاد بەڵکەم شاگردیلی تەعمید دیان -

³ وه ئی بونه عیسا له ناوچەێ یەهودیه دا دەیشت و وه دواره چیه ئەڕا ناوچەێ جەلیل.

⁴ ئەیو باێه له ناوچەێ سامرە ڕەد بویاد.

⁵ جا هاته ئەڕا شارێگ له ناوچەێ سامره که ناوێ سوخار بی، نزیک تیکه زەویێگ که یاقوب داویه یوسف کوڕێ.

⁶ چاڵاوەگەێ یاقوبیش وه ئەوره بی، جا عیسا که شەکەت ڕێ بی دانیشته لاێ چاڵاوەگه. نزیک نیمەڕو بی.

⁷ ژنێگ سامری ئەڕا ئاو هەڵکیشاین هات. عیسا وەپێ وەت: «تکێ ئاو بيه پێم،»

⁸ چوینکه شاگردیلی چوینه ناو شار تا چشتێ ئەڕا خواردن بسێنن.

⁹ ئەو ژن سامریه وەته عیسا: «تو که جویلەکەید و منیش ژنێگ سامریم، ئێ چوینه داواێ ئاو له لێم کەی؟» چوینکه جویلەکەیل وەگەرد سامریەگان هویچ هات ‎بچوێگ نێرن.

¹⁰ عیسایش جواو دا: «ئەگەر بەخشین خودا بزانستیاێ و هەر ئیجوره بزانستیاێ کیه که وه پێد ئویشێ ”تکێ ئاو بیه پێم،“ ئەوسا توی له لێ داوا کردیای ئەیویش ئاو زنەییدەر دیاده پێد.»

¹¹ ژنەگه وه عیسا وەت: «گەورەم، دوڵ نێرید تا ئاو بکیشێ و چاڵاوەگەیش قویله، جا ئاو زنەیی دەر له کورەو تیەرێ؟

¹² ئەرێ له یاقوب باپیرمان گەوراترید؟ ئەوه ئی چا داسه پێمان و خوەێ و کوڕەگانی و ریەنەگانیشێ له لێ خواردن.»

¹³ عیسا وه ژنەگە وەت: «هەر کەس له ئی ئاوه خوێد، وه دواره تیەنی بود،

¹⁴ وەلێ هەر کەس له ئاوێ که من دەمه پێ بخوێ، هەراێهەر تیەنی نیود. ئاوێگ که دەمه پێ وەناو گیانێ بوده کیەنی ئاوێگ که تا زنەیی ئەبەدی قوڵ دەێ و سەرڕێژ بود.»

¹⁵ ژنەگه وه عیسا وەت: «گەورەم، وه ئی ئاوه بيه پێم، تا دی تیەنیم نود و ئەڕا ئاو هەڵکیشاین نامه ئێرا.»

¹⁶ عیسا وەپێ وەت: «بچو، شویەگەد بچڕ و بەورەو.»

¹⁷ ژنەگه جواو دا: «شوی نێرم.» عیسا وەپێ وەت: «ڕاس ئویشێ شوی نێری،

¹⁸ چوینکه پەنج گله شوی داشتیدە و ئەوەیشه که ئێرنگه ديری، شوید نیه. ڕاس وەتی!»

¹⁹ ژنەگه وه عیسا وەت: «گەورەم، دوینم تو پەێخەمەرێگید.

²⁰ باپیریلمان وەبان ئی کویه پەرەسش خودا کردیان، وەلێ ئیوه جویلەکەیل ئویشین ئەو شونه که باێه مەردم وەناوێ پەرەسش بکەن، شار ئورشەلیمه.»

²¹ عیسا وەپێ وەت: «ژنەگه، باوەڕ بکه، زەمانێ رەسێ که باوگ ئاسمانی نه وەناو ئی کویه پەرەسش کین، نه وەناو ئورشەلیم.

²² ئەوه که ئیوه سامریەگان پەرەسینێ، نیەناسینێ، ئیمه جویلەکەیل ئەوه که ناسیمنێ، پەرەسیمنێ، چوینکه نجات له ڕێ جویلەکەوه تێ.

²³ وەلێ زەمانێگ رەسێ، هەڵبەت ئێرنگەیش ڕەسیه، که خوداپەرەسیل ڕاسەکانی، وه روح و ڕاسی باوگ ئاسمانی پەرەسش کەن، چوینکه باوگ ها شون ئیجور کەسیلێ تا پەرەسشێ بکەن.

²⁴ خودا روحه و ئەوانه که پەرەسنێ باێه وه روح و ڕاسی پەرەسش بکەن.»

²⁵ ژنەگه وەته عیسا: «زانم ماشیەح تێی؛ وەختێ باێ، گشت چشتێ ئەڕامان ئویشێد.» ماشیەح یانێ مەسیح واده دریاێ.

²⁶ عیسا وەته پێ: «من که دێرم وەگەردد قسیه کەم، هەر ئەوەمه.»

²⁷ هەر ئەو وەخته، شاگردیل عیسا هاتنەو. ئەڵاجویان هات که دێرێ وەگەرد ژنیگەو قسیه کەی. وەلێ کەسێگ نەوەت: «چه تواێ؟» یا «ئەڕا وەگەرد ئی ژنه قسیه کەی؟»

²⁸ ئمجا ژنەگه، کویزەگەێ هیشتەجێ و چی ئەڕا شار و وه مەردم وەت:

²⁹ «بان پیاێگ بوینین که هەر چی تا ئێرنگه کردویم، وەپێم وەت. ئەرێ بو ئی پیا مەسیح واده دریاێ بود؟»

³⁰ جا مەردمەگه له شار دانه دەیشت و چیانه ئەڕا لاێ عیسا.

³¹ وه ئی وەخته، شاگردیل له عیسا کوتران کردیان و وەتیان: «ماموستا، چشتێ بخوه.»

³² وەلێ عیسا وەپێان وەت: «من خواردمەنێگ ئەڕا خواردن دێرم که ئیوه له باوەتێەو چشتێگ نیەزانین.»

³³ جا شاگردیل وه یەکترەکی وەتن: «مەر کەسێ خواردەمەنی ئەڕاێ هاوردێه؟»

³⁴ عیسا وەپێان وەت: «خواردەمەنی مه ئیەسه که خاست ئەیو که کلم کردێه وه جا بارم و کارەگەێ تەمام بکەم.

³⁵ ئێ مەر ئیه نەشنەفتینه که: ”هێمراێ چوار مانگتر مەنیەسه درەو“؟ وەلێ مه وەپێدان ئویشم تماشا بکەن، چەویلدان واز بکەن و بوینن که زەویزاریل ئەڕا درەو گورجن.

³⁶ ئێرنگه درەوکەر حەقدەس خوەێ سێنێ و خەرمان ئەڕاێ زنەیی ئەبەدی گردەو کەێ، تا تویەم وەشن و درەوکەر وەگەرد یەکەو شادمانەو بون.

³⁷ جێ ئی قسیه ها ئێره که ئویشێ: ”یەکی تویەم خەێ و یەکیگ تر درەو کەێ“.

³⁸ من ئیوه کل کردم تا خەلەێگ درو بکێن که ئەڕاێ زامەت نەکیشاینه. کەسيل تر زامەت کیشانه و ئیوه له زامەتیل ئەوانه سود گرین.»

³⁹ قێر فرەێگ له سامریەگان ئەو شاره وه عیسا ئیمان هاوردن، وەبونەێ شاێەتی ئەو ژنه که وەتوی: «هەر چی تا ئێرنگه کردمه، وەپێم وەت.»

⁴⁰ جا وەختێ سامریەگان هاتنه ئەڕا لاێ عیسا، له لێ تواسن له لاێان بمینێ. جا عیسا دو ڕوژ وه ئەوره مەن.

⁴¹ قێر فرەێگ‎تریش وەبونەێ شنەفتن قسیەیل عیسا ئیمان هاوردن.

⁴² ئەوانه وه ژنەگه وەتن: «دیتر تەنیا وەبونەێ قسیەێ تو ئیمان نیەتیەریم، چوینکه خوەمان شنەفتیمنه و زانیمن ئی پیا وه ڕاسی نجات دەر دنیاس.»

عیسا وەناو جەلیل

⁴³ جا وەشون ئەو دو ڕوژه، عیسا له ئەورە چیه ئەڕا جەلیل،

⁴⁴ چوینکه عیسا خوەێ شاێەتی داوید که یەێ پەێخەمەر له شارەگەی خوەێ حرمەتی نێرید.

⁴⁵ جا وەختێ عیسا هاته ئەڕا جەلیل، جەلیلیەگان چینه پیریەو، چوینکه ئەوانیش ئەڕا جەشن پسەخ چوینه ئورشەلیم و گشت ئەو کاریله که عیسا له جەشن پسەخ وه ئورشەلیم کردوی، دوین.

شەفاێ کوڕ دەربارێگ

⁴⁶ جا عیسا وه دواره هاتەو ئەڕا ئاوایی قاناێ جەلیل، هەر ئەو شونه که ئاوەگه کردویه شراو. له شار کەفەرناحوم یەکی له دەربارییل بی که کوڕەگەێ نەخوەش بی.

⁴⁷ وەختێ پیاگه شنەفت عیسا له یەهودیه هاتیەسه ئەڕا جەلیل، چی ئەڕا لاێ و له لێ تواس تا بچود و کوڕەگەێ شەفا بێی، چوینکه کوڕەگەێ داشتیا مردیا.

⁴⁸ جا عیسا وەپێ وەت: «تا نیشانه و موجزەیل و کاریل سەرسڕهاوەر نوینین، ئیمان نیەتێەرین.»

⁴⁹ ئەو پیاێ دەرباریه وه عیسا وەت: «گەورەم، وەرجەوە که مناڵەگەم بمرێ، بەو.»

⁵⁰ عیسا وەپێ وەت: «بچو؛ کوڕەگەد زنی مینێ.» پیاگه قسیەێ عیسا باوەڕ کرد و کەفته ڕێ و چی.

⁵¹ ئەو پیا هێمراێ وەناو ڕێ بی که خزمەتکاریلێ چینه پیریەو وەپێ وەتن که کوڕەگەێ دێرێ خاسەو بود.

⁵² جا له لێان پرسی که له چ ساتێگ ڕوی ناسه خاسێ؟ وەتن: «دویەکه سات یەک نیمەڕو تەوەگەێ بڕیا.»

⁵³ جا باوگێ زانست که ئیه هەر ئەو ساته بی که عیسا وەپێ وەتوی: «کوڕەگەد زنی مینێ.» جا خوەێ و گشت خاوخێزانەگەی ئیمان هاوردن.

⁵⁴ ئیه دویمین نیشانه و موجزەێگ بی که عیسا وەختێ له یەهودیەوه هاتویه ئەڕا جەلیل، ئەنجام داوید.