یوحەنا 3 - کتاب مقدس به زبان کردی جنوبی - گویش کلهوری

عیسا و نیقودیموس

¹ پیاێگ بی له فرقەێ فەریسی، ناوێ نیقودیموس بی، ئەوه یەکی له گەورایل جویلەکە بی.

² یەێ شەو ئی پیا هاته ئەڕا لاێ عیسا و وەته پێ: «ماموستا، زانیمن تو ماموستاێگی که لەلاێ خوداوه هاتیدە، چوینکه کەس نیەتویەنی ئی نیشانه و موجزەیله بکێ که توی کەید، مەر ئیه که خودا وەگەردێەو بود.»

³ عیسا وه جواوێ وەت: «وه ڕاسی، وه ڕاسی، وەپێد ئویشم، تا کەسێ وه دواره ناێده دنیا، نیەتویەنی پادشایی خودا بوینێ.»

⁴ نیقودیموس وەپێ وەت: «ئایەمی که پیره چوی تویەنێ وه دواره باێده دنیا؟ مەر وه دواره تویەنێ بچوه ناو زگ داڵگێ و باێده دنیا؟»

⁵ عیسا جواوێ دا: «وه ڕاسی، وه ڕاسی، وەپێد ئویشم تا کەسێگ له ئاو و روح خودا ناێده دنیا، نیەتویەنی بچوه ناو پادشایی خودا.

⁶ ئەو چشته که له جەسه باێه دنیا، جەسەییه و ئەو چشته که له روح باێه دنیا، روحانیه.

⁷ ئەڵاجوید نای که وەپێد وەتم باێه له دواره باێه دنیا!

⁸ وا له هەر لاێگەو بتواێ هەڵ کەی؛ دەنگێ شنەفێ، وەلێ نیەزانێ له کورەو تێد یا وەرەو کوره چود. هەر کەیش له روح خودا باێده دنیا ئیجورەسه.»

⁹ نیقودیموس له عیسا پرسی: «ئی چشتیله چوی بود؟»

¹⁰ عیسا جواو دا: «تو ماموستاێ ئێسرائیلید و هێمراێ ئی چشتیله نیەزانێ؟

¹¹ وه ڕاسی، وه ڕاسی، وەپێد ئویشم ئەو چشته که زانیمن ئویشیمن و ئەو چشته دیمنه شاێەتی دیمن، وەلێ ئیوه شاێەتیمان قەبوڵ نیەکین.

¹² ئەگەر وەختێگ له باوەت چشتیل زەوی ئەڕادان وەتم و باوەڕ نەکردین، ئێ چوی تویەنین باوەڕ بکێن ئەگەر له باوەت چشتیل ئاسمانی ئەڕادان بویشم؟

¹³ هویچکەسێگ وه ئاسمان نەچیەسه ‎بان، مەر ئەوه که له ئاسمانەو هاته خوار، یانێ کوڕ ئنسان که ها له ئاسمان.

¹⁴ هەر ئەوجورە که موساێ پەێخەمەر وەناو بیاوان ئەو مار برنجیه دا سەر چو و بەرزیەو کرد، کوڕ ئنسانیش هەر ئەو جوره باێه بەرزەو بکرێ،

¹⁵ تا هەر کەس وەپێ ئیمان بارێ، زنەیی ئەبەدی بیاشتوید.

¹⁶ «چوینکه خودا جهان ئەوقره مابەت کرد که تەنیا کوڕەگەێ خوەێ دا تا هەر کەس وەپێ ئیمان بارێ نابود نود، بەڵکەم زنەیی ئەبەدی بیاشتوێد.

¹⁷ ئەڕا ئیه که خودا کوڕەگەێ کل نەکرده جهان تا جهان ماکوم بکێ، بەڵکەم هناردێ تا جهان وه وەسلەێ ئەیو نجات پەێا بکێ.

¹⁸ هەر کەس وەپێ ئیمان بارێ ماکوم نیود، وەلێ هەر کەس وەپێ ئیمان نارێ، هەر ئێرنگەیش ماکومه، چوینکه وه ناو تەنیا کوڕ خودا ئیمان ناوردیه.

¹⁹ جا مدوێ ماکومیەتەگەێ ئیەسه که نویر هاتیەسه ناو جهان، وەلێ مەردم وه جێ نویر تیەریکی دوس داشتن، چوینکه کردەوەێان خراو بی.

²⁰ چوینکه هەر کەسێگ کاریل خراو کەێد له نویر فره قینێ تێ و وەرەو لاێ نویر نیەتێی، نەخواێ کردەوێ ئاشکرا بود.

²¹ وەلێ ئەوه که کار ڕاس درس کەێد وەرەو لاێ نویر تێ تا ئاشکرا دیار بێید که کارەیلێ وه مەێەت خودا کریەید.»

شاێەتی یەحیاێ تەعمیددەر له باوەت عیسا

²² جا وەشونێ، عیسا و شاگردیلی چینه ئەڕا ئاواییل ناوچەێ یەهودیه. عیسا ئەڕا ماوەێگ وەگەرد‎ شاگردیلێ مەنه ئەوره‎ و خوسڵ تەعمید مەردم دیاد.

²³ یەحیایش له ئاوایی عینون، نزیک شار سالیم، تەعمید دیاد، چوینکه له ئەوره ئاو فره بی، مەردمیش هاتیان و تەعمید گردیان.

²⁴ له ئەو وەخته هێمراێ یەحیا نەکەفتویه زندان.

²⁵ یەێ جار باسێ کەفته ناو بڕێگ له شاگردیل یەحیا و جویلەکەێگ که چوی باێه له پێسی پاکەو بون.

²⁶ جا شاگردەگانێ هاتنه ئەڕا لاێ یەحیا، وەپێ وەتن: «ماموستا، ئەو کەسه که له ئەو لاێ چەم ئوردون وەگەرددەو بی و توی ئەڕاێ شاێەتی دای، ئێرنگه خوەێ تەعمید دەێ و گشتیەکی چنه ئەڕا لاێ.»

²⁷ یەحیا جواو دا: «کەس نیەتویەنی چشتێ وه دەس بارێ، مەر ئیه که له ئاسمان دریاویده‎ پێ.

²⁸ ئیوه خوەدان شاێەتین که وەتم مه مەسیح واده دریاێ نیم، بەڵکەم وەرجه ئەوه کل کریامه.

²⁹ وەوی هن زاواس، وەلێ دوس زاوا که وسێده لاێ گوش دەیده ڵێ، له شنەفتن دەنگ زاوا فره دڵخوەشەو بود. جا ئیسه شادی منیش هەر ئیجوره کامڵەو بود.

³⁰ ئەیو باێه گەوراترەو بود وەلێ من باێه بویچگترەو بوم.

³¹ «ئەوه که له بانەو تێ، له گشت سەرتره. ئەوه که له زەویه، وه زەوی تالوق دێرێد و له چشتیل بان زەوی قسیه کەی. ئەوه که له ئاسمانەو تێ، له گشت سەرتره.

³² ئەیو له باوەت ئەو چشتێ که دیه و شنەفتیه شاێەتی دەێ، وەلێ هویچکەس شاێەتیەگەێ قەبوڵ نیەکێ.

³³ هەر کەس شاێەتیەگەێ قەبوڵ بکێ، مور وه ڕاس بوین خودا کوتێ.

³⁴ چوینکه ئەوه که خودا کلی کردێه، کەڵام خودا وه زوان تیەرێ، چوینکه خودا روح خوەێ بی ئەنازه بەخشێد.

³⁵ باوگ ئاسمانی، دوس کوڕ دێرێ و گشت چشتێ سپاردێەسه دەسێ.

³⁶ هەر کەس وه کوڕ ئیمان بارێ، زنەیی ئەبەدی دێرێ؛ هەر کەس له کوڕ گوش نەتەکنێ، چەوێ نیەکەفێدە زنەیی، بەڵکەم توڕەیی خودا له سەرێەو مێنێد.»