یوحەنا 21 - کتاب مقدس به زبان کردی جنوبی - گویش کلهوری

ئاشکرابوین عیسا وه هەفت نەفەر له شاگردیلی

¹ وەشون ئی هەڵکەفته، عیسا یەێ جارتر له لاێ دەریاچەێ تیبریه خوەێ وه شاگردەگان نیشان دا. ئەیو ئیجوره خوەێ نیشان دا:

² شەمعون پتروس، توما ماروف وه لفانه، نتنائیل له مەردم ئاوایی قانا له ناوچەێ جەلیل، کوڕيل زبدی و دو گله تر له شاگردیلی وەگەرد یەکا بین.

³ شەمعون پتروس وه ئەوانه وەت: «مه چمه ئەڕا ماسی گردن.» ئەوانه وەتن: «ئیمەیش وەگەرددە‎و تێیم.» جا چینه دەیشت و سوار قایق بین. وەلێ وه ئەو شەوه هویچ نەگردن.

⁴ شەوەکی شەفەق، عیسا وه لیوەێ دەریاچەگه وساوید؛ وەلێ شاگردەگان نەزانستن ئەیو عیساس.

⁵ عیسا وەپێان وەت: «ڕوڵەیل، ماسی گردینه؟» جواو دان: «نه!»

⁶ وەته پێان: «توڕەگه بخەنه لاێ ڕاس قایقەگه ماسی گرين.» ئەوانیش ئی کاره کردن، ئەوقره ماسی گردن که نەتویەنستیان توڕەگه بکیشنه ناو قایقەگه.

⁷ جا ئەو شاگرده که عیسا دوسی داشت، وه پتروس وەت: «ئیه خوداوەنده!» وەختێ شەمعون پتروس شنەفت که خوداوەنده، هەر ئەو ئانه دڵنگەگەێ پێچاده دەور خوەێ، چوینکه ڕویتەو بوی، جا خوەێ خسته ناو دەریاچەگه.

⁸ شاگردیل تر وەگەرد قایق هاتن و توڕ پڕ له ماسیەگەیش وەگەرد خوێان کیشیانێ، چوینکه تەنیا سەد متر وه وشکایەگه دویر بین.

⁹ وەختێ رەسینه وشکایەگه، دین ئیەسه ئاگرێ وه سکڵ کردێەسەو ماسییش خستیەسه بانی و نانیش هەس.

¹⁰ عیسا وەپێان وەت: «چەن گله وه ماسیەیلی که تازه گردینه، بارن.»

¹¹ جا شەمعون پتروس چیه ناو قایقەگه و توڕەگه کیشاده ناو وشکای. توڕەگە پڕ له ماسیەیل گەورا بی، سەد و پەنجا و سێ گله ماسی وەناوێ بی. هەر چەن ماسیەگان فره بین وەلێ توڕەگە نەدڕیا.

¹² عیسا وەپێان وەت: «بان قاواڵتی بخوەن.» هویچکام وه شاگردەگان جرئەت نەکردن وه لێ بپرسن، «تو کید؟» چوینکه زانستیان خوداوەنده.

¹³ عیسا هات نان و ماسی هەڵگرد و دا پێان.

¹⁴ ئیه سێیەم جار بی که عیسا وەشون ئیه که له مردگیل زنیەو بوی، وه شاگردەگان ئاشکرا بی.

قسیه و باس عیسا و پتروس

¹⁵ وەشون ئیه که قاواڵتی خواردن، عیسا له شەمعون پتروس پرسی: «شەمعون، کوڕ یوحەنا، توی فرەتر له ئیانه مه دوس دێرێ؟» ئەوه جواو دا: «بەڵێ ئێ خوداوەند؛ تو زانید که دوسد دێرم.» عیسا وەپێ وەت: «وەرکەگانم بلەوەڕن.»

¹⁶ دویم جار عیسا له لێ پرسی: «شەمعون، کوڕ یوحەنا، ئێ دوسم دێرێ؟» جواو دا: «بەڵێ ئێ خوداوەند؛ زانی که دوسد دێرم.» عیسا وەته پێ: «بوه شوان پەسەگانم.»

¹⁷ سێیەم جار عیسا له لێ پرسی: «ئێ شەمعون، کوڕ یوحەنا، دوسم دێرێ؟» پتروس وەبونەێ ئیه که عیسا سێ جار له لێ پرسی، دوسم دێرێ؟» نارەحەت بی وەپێ وەت: «ئێ خوداوەند، تو له گشت چشتێگ خەوەر دێرێ؛ تو خاس زانید که دوسد دێرم.» عیسا وەپێ وەت: «وەرکەگانم بلەوەڕن.

¹⁸ وه ڕاسی، وه ڕاسی، وەپێد ئویشم، وەختێ که جوانتر بید ناوقەید بەسیاید و ئەڕا هەر کوره که تواسیاێ چیاید؛ وەلێ وەختێ پیر بوید دەسیلد وازەو کەید و یەکیگ تر ناوقەید بەسێد و بێدەده ئەڕا شونێ که نیەتواێد.»

¹⁹ عیسا ئیه وەت تا نیشان بێی که پتروس وه چ شێوەێگ مرێ و خودا جەڵاڵ دەێ. ئمجا عیسا وەته پێ: «وەشونمەو بەو.»

²⁰ پتروس هەڵوگەردیا و دی ئەو شاگرده که عیسا دوسی داشت کەفتیەسه شونێان. هەر ئەوه که له وەخت نان ئێواره پاڵەو داویه سینەێ عیسا و له لێ پرسوی، «گەورەم، ئەوه کیه که توێ دەیده دەس دشمەنەو؟»

²¹ وەختێ پتروس ئەوه دی، له عیسا پرسی: «ئی خوداوەند، چه وه سەر ئیه تێید؟»

²² عیسا وەپێ وەت: «ئەگەر خاست مه ئیەسه تا وەختێ بامەو ئەوه بمینێ، وه تو چه؟ تو وەشونمەو بەو!»

²³ جا ئی قسیه کەفته ناو برایل که ئەو شاگرده نیەمرێ، وەلێ عیسا وه پتروس نەوەت که نیەمرێ، بەڵکەم وەت: «ئەگەر خاست مه ئیەسه تا وەختێ بامەو ئەوه بمینێ، وه تو چه؟»

²⁴ ئیه هەر ئەو شاگردەسه که وه ئی چشتیله شاێەتی دەێ و ئیانه نویساس. ئیمه زانیمن که شاێەتیەگەێ ڕاسه.

دەس ئاخر

²⁵ عیسا کاریل فرەێگتریش کرد که ئەگەر گله وه گلەێان بنویسیان، گومان نیەکەم تەنانەت تەمام جهانیش بتویەنسیا ئی کتاویله وەناو خوەێ جا بێی.