یوحەنا 17 - کتاب مقدس به زبان کردی جنوبی - گویش کلهوری

دوعای عیسا

¹ وەختێ عیسا ئی قسیەیله کرد نوڕیه ئاسمان و وەت: «باوگه، وەختێ ڕەسیه. کوڕەگەد جەڵاڵ بیه تا کوڕەگەدیش جەڵاڵد بێید.

² چوینکه تو دەسڵات گشت ئنسانیل سپاردێەسه دەسێ تا وه گشت کەسیلێ که تو وەپێ بەخشایده زنەیی ئەبەدی بێی.

³ زنەیی ئەبەدی ئیەسه، ئەوانه توی که تەنیا خوداێ ڕاسەکانید و عیسا مەسیح که کلی کردیده، بناسن.

⁴ کارێگ که وەپێم سپاردی تا وه جێ بارم، وه کەماڵ رەسانم و ئیجوره مه تو وەبان زەوی جەڵاڵد دام،

⁵ ئێرنگەیش باوگه، مه له لاێ خوەد جەڵاڵ بیه، هەر ئەو جەڵاڵه که وەرجه وه دی هاتن جهان له لاێ تو داشتم.

⁶ «من ناو تو ئەڕا مەردمێگ که وه ئی جهانه وەپێم بەخشیده، ئاشکرا کردمه. ئەوانه هن تو بین و تو وەپێم بەخشایده، ئەوانیش کەڵامد پارێزاننه.

⁷ ئێرنگه زانن که هەر چی وەپێم بەخشایده، وه لاێ تنه.

⁸ چوینکه کەڵامێگ که وه مه سپاردی، وەپێان سپاردمه، ئەوانیش قەبوڵ کردنه و وه ڕاسی زانستنه که له لاێ تنەو هاتم و ئیمان هاوردنه که تو کلم کردی.

⁹ مه ئەڕا ئەوانه دوعا کەم؛ ئەڕا ئی جهانه دوعا نیەکەم، بەڵکەم ئەڕا ئەوانه دوعا کەم که تو بەخشایدەسه پێم، چوینکه هن تنن.

¹⁰ هەر چی که هن منه، هن تنه، هەر چیگیش هن تنه، هن منه و مه وەناو ئەوانه جەڵاڵ پەێا کردمه.

¹¹ مه دی وەناو جهان نیەمینم، وەلێ ئەوانه هانه ناو جهان، منیش تیەمه‎ ئەڕا لاێ توی؛ ئێ باوگ موقەدەس، ئەوانه وه ناو خوەد که وه مه بەخشایده، بپارێزن تا یەکی بون هەر ئەوجورە که ئیمه یەکیگیم.

¹² تا وەختێگ که وەگەردێانەو بیم، ئەوانه وه ئەو ناوده که تو بەخشایده پێم، پارێزانمێان و پاسەوانیان کردم. کەسێگیان نابود نوینه بێجگه کوڕ نابودی، تا قسیەێ کتاو موقەدەس باێه دی.

¹³ وەلێ ئێرنگه تیەمه ئەڕا لاێ تو، ئی قسیەیلیشه وەختێ دێرم کەم که هێمراێ هامه ناو جهان، تا شادی مه وه تەمامی وەناو دڵیانەو بود.

¹⁴ مه کەڵام تو دامەسه پێان، وەلێ جهان قینێه لێان هاتێه، چوینکه هن ئی جهانه نین، هەر ئەوجورە که مه هن ئی جهانه نیم.

¹⁵ داوا نیەکەم له جهان بویدێان بەڵکەم توام له ئەو شەڕئاشوه بپارێزنێدێان.

¹⁶ ئەوانه هن ئی جهانه نین، هەر ئەوجورە که منیش هن ئی جهانه نیم.

¹⁷ وەناو ڕاسی تەقدیسان بکه؛ کەڵام تو ڕاسیه.

¹⁸ هەر ئەوجورە که تو مه کل کردی ئەڕا جهان، منیش ئەوانه کل کردمەسه جهان.

¹⁹ وەبونەێ ئەوانه خوەم تەقدیس کەم، تا ئەوانیش وەناو ڕاسی تەقدیس بون.

²⁰ «تەنیا ئەڕا ئیانه داوا نیەکەم، بەڵکەم هەر ئیجوره ئەڕا ئەوانه که وه بونەێ کەڵامیانەو ئیمان وەپێم تیەرن،

²¹ تا ئەوانه گشتێان یەکی بون، ئێ باوگه، هەر ئەوجورە که تو هایده ناو مه منیش هامه ناو توی. با ئەوانیش وەناو ئیمه بون، تا جهان ئیمان بارێ تو مه کل کردیده.

²² جەڵاڵێگ که دایدەسه پێم، دامەسه پێان تا بونه یەکی، هەر ئەوجورە که ئیمه یەکیگیم؛

²³ من هامه ناو ئەوانه و تو هایده ناو من. تا که وه تەمامی بونه یەکی تا جهان بزانێ تو مه کل کردی و ئەوانیش هەر ئەوجورە دوس داشتی که مه دوس داشتی.

²⁴ باوگه، توام ئەوانه که دایدەسه پێم له هەر کوره بوم وەگەردمەو بون، تا جەڵاڵ مه بوینن، هەر ئەو جەڵاڵێگ که دایدەسه پێم؛ چوینکه وەرجه دامەزرانن جهان دوسم داشتی.

²⁵ «ئێ باوگ داداپەروەر، هەر چه‎ن جهان تو نیەناسێ، وەلێ مه ناسمەد، ئیانەیش زانن تو مه کل کردیده.

²⁶ مه ناو تو وەپێان ناسانم و وەپێان ناسنم، تا مابەتێ که وه مه داشتیدە، وەناو ئەوانه بود و منیش وەناو ئەوانه بوم.»