یوحەنا 16 - کتاب مقدس به زبان کردی جنوبی - گویش کلهوری

¹ «ئی هەمگه چشتیله وەپێدان وەتم تا له ئیماندان نەکەفین.

² له کەنیسەگان دەردان کەن و تەنانەت زەمانێگ رەسێ که هەر کەس بکوشێدەدان، خیاڵ کێ که وه خودا خزمەت کێ.

³ ئی کاريله کەن، چوینکه نه باوگ ئاسمانی ناسینه و نه مه.

⁴ وەلێ ئیانه وەپێدان وەتمه تا ئەوسا که وەخت هەڵکەفتنێان رەسێ، بارینه هویردان که مه ئاگاداردان کردم. مه له سەرەتاوه ئی چشتیله وەپێدان نەوەتم، چوینکه خوەم وەگەرددانەو بیم.

کار روح‌القودوس

⁵ «وەلێ ئێرنگه چمه ئەڕا لاێ ئەیو که کلم کرد و هویچکامدانیش له لێم نیەپرسین، ”ئەڕا کوره چید؟“

⁶ وەلێ چوینکه ئی چشتیله وەپێدان وەتمه، دڵدان پڕ بیەسه خەم و خوسه.

⁷ وی حاڵەو ڕاسێه پێدان ئویشم که چیێنم وه نەفدانه. چوینکه ئەگەر نەچم، ئەو پشتیوانه نیەتێدە ئەڕا لادان؛ وەلێ ئەگەر بچم کلی کەمه ئەڕا لادان.

⁸ وەختێ ئەیو باێد، جهان دڵنیا کەید که له باوەت گونا و سالح بوین و داوەری، تاوانباره.

⁹ له باوەت گونا، چوینکه وه من ئیمان نیەتیەرن.

¹⁰ له باوەت سالح بوین، چوینکه چمه ئەڕا لاێ باوگ و دی مه نیوینین.

¹¹ له باوەت داوەری، چوینکه سەروک ئی جهانه ماکوم کریاس.

¹² «مه هێمراێ چشتیل فرەێگ دێرم تا وەپێدان بویشم، وەلێ ئێرنگه بەرگەێ شنەفتنیان نێرین.

¹³ وەختێ که روح ڕاسی تێد، وه تەمام ڕاسی ڕێنمایدان کێ؛ چوینکه وه خوێەو هویچ نیویشی، بەڵکەم هەر چی بشنەفێ ئویشێ وه ئەو چشتیله که باێه ڕوی بێید وه پێدان جار دەید.

¹⁴ ئەیو جەڵاڵم دی، چوینکه ئەو چشته که هن منه‎ گرێد و وەپێدان جار دەێ.

¹⁵ هەر چی هن باوگه، هن منه. جا وه ئی بونه وەتم ئەو چشته که هن منه گرێد و وەپێدان جار دەێ.

عیسا دڵ شاگردەگانێ دەێدەو

¹⁶ «وەشون ماوەێ کەمێگ، دی مه نیوینین، وه دواره وەشون ماوەێ کەمێگ، مه دوینین.»

¹⁷ ئمجا بڕێگ له شاگردیلێ وه یەکترەکی وەتن: «ئیه چەس که وەپێمان ئویشێ، ”وەشون ماوەێ کەمێگ، مه نیوینین، جا وه دواره وەشون ماوەێ کەمێگ، مه دوینین“؟ یا ئیه که ئویشێد ”چوینکه چمه ئەڕا لاێ باوگ“؟»

¹⁸ جا وه یەکترەکی وەتیان: «مەبەستی له ئی ’ماوەێ کەمێگ‘ که ئویشێ چەس؟ نیەزانیم باس چه کەی؟»

¹⁹ عیسا زانستیا که توان له لێ بپرسن؛ جا وەپێان وەت: وەبونەێ ئیه له یەکترەکی پرسین، که مەبەستم چەس وەتم، ”وەشون ماوەێ کەمێگ، مه نیوینین، جا وه دواره وەشون ماوەێ کەمێگ، مه دوینین“؟

²⁰ وه ڕاسی، وه ڕاسی، وەپێدان ئویشم، ئیوه گیره و شین کین، وەلێ جهان شادمانەو بود؛ ئیوه خەمبارەو بوین، وەلێ خەمەگەدان بوده شادی.

²¹ ژن وەخت زایێن ژان گرێدەێ، چوینکه وەختێ ڕەسیه؛ وەلێ وەختێ مناڵەگەێ هاته دنیا، له خوەشی ئیه که ئایەمی وەناو ئی جهانه هاتیەسه دنیا دی ژانەگەێ وه هویر نیەتیەرێ.

²² هەر ئیجوره ئیوەیش ئێرنگه خەمبارین؛ وەلێ وه دواره دوینمەدان و دڵشادەو بوین، هویچکەیش خوەشیەگە‎دان له لێدان نیەسینێد.

²³ وه ئەو ڕوژه، هویچه لێم نیەتواین. وه ڕاسی، وه ڕاسی، وەپێدان ئویشم، هەر چی که وه ناو منەو له باوگ داوا بکێن دەیده پێدان.

²⁴ تا ئێرنگه وه ناو منەو داواێ هویچ نەکردینه؛ داوا بکەن تا وه دەس بارین و خوەشیەگەدان کامڵ بود.

²⁵ «ئی قسیەیله وه مەسلەتەو وەپێدان وەتم؛ وەختێگ تێ که دی وه مەسلەتەو وەگەرددان قسیه نیەکەم، بەڵکەم ئاشکرا باس باوگ ئەڕادان کەم.

²⁶ وه ئەو ڕوژه، ئیوه وه ناو منەو داوا کین. وەپێدان نیویشم که مه ئەڕا ئیوه له باوگ داوا کەم،

²⁷ چوینکه باوگ خوەێ دوسدان دێرێ، ئەڕا ئیه که ئیوه دوسم داشتینه و باوەڕ کردینه که له لاێ خوداوه هاتمه.

²⁸ مه له لاێ باوگ هاتم و هاتمەسه ناو ئی جهانه؛ ئێرنگەیش ئی جهانه هیلمه جێ و چمه ئەڕا لاێ باوگ.»

²⁹ ئمجا شاگردیلی وەتن: «ئەوەسه ئێرنگه ئاشکرا قسیه کەێد، نه وه مەسلەتەو.

³⁰ ئێرنگه زانیم که تو له گشت چشتێگ ئاگاداری و هەوەجید نیه کەس پرسیارێ له لێد بکێ. له ئی باوەتەسه که ئیمان دێریم له لاێ خوداوه هاتیدە.»

³¹ عیسا وەپێان وەت: «ئێرنگه ئیمان دێرین؟

³² بنوڕن وەختێ دێرێ رەسێ، وه ڕاسی هەر ئیرنگه رەسیه که تەفرتویناوه بوین و هەر کامدانیش چوده ئەڕا ماڵ خوەێ و مه تەنیا هیلین؛ وەلێ من تەنیا نیم، چوینکه باوگ ها گەرد مه.

³³ ئیانه وەپێدان وەتمه تا وەناو مه ئاشتی و سڵامەتی بیاشتوین. وەناو جهان تویش بەرد تێین؛ وەلێ دڵدان قورس بو، مه وه مل ئی جهانه زاڵەو بیمه.»