یوحەنا 15 - کتاب مقدس به زبان کردی جنوبی - گویش کلهوری

مه مەیو ڕاسەکانیم

¹ «مه مەیو ڕاسەکانیم و باوگ ئاسمانیمیش باخەوانه.

² هەر پەلێگ له منا که بەر نارێ، ئەیو بڕیدێ و هەر پەلێگیش که بەر بارێ، ئەیو هەرەسێ کەێ تا فرەتر بەر بێی.

³ ئیوه ئێرنگه وەبونەێ کەڵامێگ که وەپێدان وەتمه، پاکین.

⁴ وەناو مه نیشتەجێ بون و منیش وەناو ئیوه نیشتەجێ بوم. ئەوجورە که پەل نیەتویەنی له خوێەو بەر بارێ ئەگەر وەناو مەیو نیشتەجێ نود، ئیوەیش نیەتویەنین بەر بارین ئەگەر وەناو مه نیشتەجێ نوین.

⁵ «مه مەیوم و ئیوه پەلەگانێ. ئەوه که وەناو من نیشتەجێ بود و مه وەناو ئەوه، بەر فرەێگ دەێده دەسەو؛ چوینکه جیا له مه، هویچه دەسدان نیەتێد.

⁶ ئەگەر کەسێگ وەناو مه نیشتەجێ نود، جور پەلێگ فڕەێ دەن و وشکەو بود. پەلیل وشک گردێانەو کەن و فڕەێان دەنه ناو ئاگر و سزننەێان.

⁷ ئەگەر وەناو مه نیشتەجێ بوین و کەڵامم وەناو ئیوه نیشتەجێ بود، هەر چی تواین، داوا بکێن که درێیده پێدان.

⁸ جەڵاڵ باوگم ها ناو ئیه که ئیوه بەر فرەێگ بارین؛ وه ئیجوره بوینه شاگردیل مه.

⁹ «هەر ئەوجورە که باوگ دوس مه داشتیه، منیش دوس ئیوه داشتمه؛ وەناو مابەت من نیشتەجێ بون.

¹⁰ ئەگەر حوکمەگان مه بپارێزنین، لەناو مابەت من نیشتەجێ بوین؛ هەر ئەوجورە که من حوکمەگان باوگم پارێزانمه و لەناو مابەتێ نیشتەجێیم.

¹¹ ئی قسیەیله وەپێدان وەتمه تا شادی مه وەناودان بود و شادی ئیوه کامڵەو بود.

¹² «حوکم مه ئیەسه که یەکترەکی مابەت بکێن، هەر ئەوجورە که مه مابەتدان کردمه.

¹³ مابەتێگ گەوراتر له ئیه نیه که کەسێگ گیان خوەێ ئەڕا ڕەفیقەیلێ فەدا بکێ.

¹⁴ ئیوه ڕەفیقەیل منین، ئەگەر ئەوه که وەپێدان حوکم کەم، وه جێ بارين.

¹⁵ دی وەپێدان نیویشم خزمەتکار، چوینکه خزمەتکار له کاریل ئەرواوەگەێ خەوەر نێری. بەڵکەم ئیوه وه ڕەفیقەیل خوەم خوەنیمه، چوینکه له هەر چی له باوگم شنەفتمه، ئاگاداردان کردمه.

¹⁶ ئیوه مه هەڵنەوژاردین، بەڵکەم مه ئیوه هەڵوژاردم و دەس نیشاندان کردم تا بچین و بەر بارین و بەرەگاندان بمینێ، تا هەر چی له باوگ وه ناو منەو داوا بکێن، بێیده پێدان.

¹⁷ حوکم من وه ئیوه ئیەسه که یەکترەکی مابەت بکێن.

قین جهان

¹⁸ «ئەگەر جهان قینێه لێدان تێ، ئیه بزانن وەرجه ئیه که له ئیوه قینێ باێ، له من قینێ هاتیاد.

¹⁹ ئەگەر ئیوه هن جهان بویاتیاین، جهان ئیوه جور ئەوانه که هن خوەێن، دوسدان داشت. وەلێ ئیوه هن جهان نین، بەڵکەم من ئیوه له جهان هەڵوژاردمه، وه ئی بونه جهان قینێ له لێدان تێ.

²⁰ کەڵامی که وەپێدان وەتم بارینه هویردان: ”خزمەتکار له ئەرواو خوەێ گەوراتر نیه.“ ئەگەر مه عەزاو دانه، ئیوەیش عەزاو دەن؛ ئەگەر کەڵام مه پارێزانن، کەڵام ئیوەیش پارێزنن.

²¹ وەلێ گشت ئیانه وەبونەێ ناو منەو وەگەرددان کەن، چوینکه ئەیو که مه کل کرد نیەناسن.

²² ئەگەر ناتیام و ئەڕاێان قسیه نەکردیام، گوناێگ نیاشتن؛ وەلێ ئێرنگه دیتر دەسپێچکێگ ئەڕا گونایلێان نێرن.

²³ هەر کەس قینێ له لێم باێ، له باوگمیش قینێ تێ.

²⁴ ئەگەر وەناوێان ئەو کاریله نەکردیام که کەسێگ بێجگه مه نەکردیه، گوناێگ نیاشتن؛ وەلێ ئێرنگه، هەر چەن ئەو کاریله دینه، هەم له من و هەم له باوگم قینێان تێ.

²⁵ وەلێ کەڵامێگ که وەناو تەوراتەگەێان نویسریاس، باێه وه دی باێ: ”بێ سەوەو قینێان له لێم هات.“

²⁶ «وەلێ وەختێ ئەو پشتیوانێگ که له لاێ باوگ ئەڕادان کلی کەم، باێد، یانێ روح ڕاسی که له لاێ باوگەو تێد، ئەیو خوەێ له باوەت من شاێەتی دەێ،

²⁷ ئیوەیش خوەدان شاێەتی دێن، چوینکه له سەرەتاوه وەگەردمەو بینه.