یوحەنا 14 - کتاب مقدس به زبان کردی جنوبی - گویش کلهوری

من ڕێ و ڕاسی و زنەییم

¹ «دڵدان پەشێو نود. وه خودا ئیمان بیاشتون؛ وه منیش ئیمان بیاشتون.

² وەناو ماڵ باوگ ئاسمانیم وتاخ فرەس. ئەگەر ئیجوره نویاد مەر وەپێدان وەتیام چم تا شونێگ ئەڕادان گورجەو کەم؟

³ ئمجا که چیم و شونێگ ئەڕادان گورجەو کردم، وەدواره تیەمەو بەمەدانه ئەڕا لاێ خوەم، تا ئەو شونه که مه هەم ئیوەیش بوین.

⁴ ئەو شونه که مه چم ڕێەگەێ زانين.»

⁵ توما وەپێ وەت: «گەورەم، ئیمه نيەزانیم ئەڕا کوره چید، جا چوی تویەنیم ڕێەگەێ بزانیم؟»

⁶ عیسا وەپێ وەت: «من ڕێ و ڕاسی و ژیانم؛ هویچکەس بێجگه له ڕێ منەو نیەتێدە لاێ باوگ ئاسمانی.

⁷ ئەگەر مه بناسیاین، باوگمیش ناسیاین؛ وه شون ئیه، ئەیو ناسین و دینەسێ.»

⁸ فیلیپوس وەپێ وەت: «گەورەم، باوگ وه ئیمه نیشان بیه، که هەر ئیه بەسمانه.»

⁹ عیسا وەپێ وەت: «فیلیپوس، قێر فرەێگه هامه گەرددانەو هێمراێ مه نەناسیده؟ کەسێگ که مه دیه، باوگ دیه؛ چوی تویەنێ بویشی ”باوگ وەپێمان نیشان بیه“؟

¹⁰ باوەڕ نیەکێ که مه هامه ناو باوگ و باوگیش ها ناو مه؟ قسیەیلی که مه وەپێدان ئویشم له خوەمەو نیویشم، بەڵکەم باوگێ که وەناو من نیشتەجێه، کاریل خوەێ کێ.

¹¹ باوەڕ وەپێم بکێن که مه هامه ناو باوگ و باوگیش ها ناو مه؛ ئەگەر نه وەبونەێ ئەو کاريله باوەڕ بکێن.

¹² «وه ڕاسی، وه ڕاسی، وەپێدان ئویشم، هەر کەس وه مه ئیمان بارێ، ئەو کاریله که مه کەم، کێ، له ئەوانه گەوراتریش کێ، چوینکه مه چمه ئەڕا لاێ باوگ.

¹³ هەر چی وه ناو منەو داوا بکێن، ئەنجامێ دەم، تا باوگ وەناو کوڕ جەڵاڵ پەێا بکێ.

¹⁴ ئەگەر چشتێ وه ناو منەو له لێم داوا بکێن، ئەنجامێ دەم.

وادەێ روح‌القودس

¹⁵ «ئەگەر دوسم بیاشتوین، حوکمەگانم پارێزنێن.

¹⁶ منیش له باوگ ئاسمانی داوا کەم و ئەیو پشتیوانێگ تر دەێده پێدان که تا ئەبەد وەگەرددان بمینێ،

¹⁷ یانێ روح ڕاسی که دنیا نیەتویەنی قەبوڵێ بکێ، چوینکه نه دوینیدێ و نه ناسێدێ؛ وەلێ ئیوه ناسینێ، چوینکه له لاێ ئیوه نیشتەجێه و وەناو ئیوه مینێ.

¹⁸ «ئیوه یەتیم نێیلم؛ تیەمەو ئەڕا لادان.

¹⁹ کەمێگ تر جهان دیتر مه نیوینێ، وەلێ ئیوه دوینینەم. چوینکه مه زنیم، ئیوەیش زنەیی کین.

²⁰ وه ئەو ڕوژه، زانین که مه هامه ناو باوگم و ئیوەیش هاینه ناو من و مه هامه ناو ئیوه.

²¹ ئەوه که حوکمەگان مه دێرێ و پارێزنێدێان، ئەوه کەسێگه که مه دوس دێرێ؛ ئەویشه که مه دوس دێرێ، باوگمیش دوسی دێرێ و منیش دوسی دێرم و خوەم وەپێ نیشان دەم.»

²² یەهودا، نه یەهوداێ ئەسخەریوتی، وه عیسا وەت: «گەورەم، چوینه که خوەد وه ئیمه نیشان دەی، وەلێ وه ئی جهانه نیشان نێید؟»

²³ عیسا جواو دا: «ئەگەر کەسێگ دوس مه بیاشتود، کەڵامم پارێزنێد و باوگم دوسی دێرێ و ئیمه تێیمنه لاێ و لەلاێ نیشتەجێ بویمن.

²⁴ ئەوه که دوس مه نێری، کەڵاممیش نیەپارێزنێد؛ ئی کەڵامیشه که شنەفین له مه نیه، بەڵکەم له باوگیگه که کلم کرد.

²⁵ «ئی چشتیله زەمانێگ وەپێدان وەتمه که هێمراێ هامه گەرددانەو.

²⁶ وەلێ ئەو پشتیوانه، یانێ روح‌القودوس، که باوگ وه ناو منەو کلی کەی، گشت چشتێگ یاێدان دی و هەر چی که وەپێدان وەتمه، وه هویردان تیەرێ.

²⁷ ئاشتی و سڵامەتی ئەڕادان هیلمه جێ؛ ئاشتی و سڵامەتی خوەم دەمه پێدان. ئەوه که مه دەمه پێدان، جور ئەوه نیه که جهان دەێده پێدان. دڵدان پەشێو نود و ڕخدان نەچود.

²⁸ شنەفتین که وەپێدان وەتم، ”مه چم، وەلێ وه دواره تیەمەو ئەڕا لادان.“ ئەگەر دوس مه بیاشتیاین، خوەشاڵەو بویاین که چمه ئەڕا لاێ باوگ، چوینکه باوگ له مه گەوراتره.

²⁹ ئێرنگه وەرجه هەڵکەفتنێ وەپێدان وەتمه، تا وەختێ هەڵکەفێ ئیمان بارین.

³⁰ وەخت فرەێگ نەمنیه که وەگەرددانەو قسیه بکەم، چوینکه سەروک ئی جهانه دێرێ تێی. ئەوه هویچ قوڕاتیگ نیەتویەنێ ئەڕام بێید؛

³¹ وەلێ ئەڕا ئیه که جهان بزانێ دوس باوگ دێرم، هەر ئەوه کەم که باوگ دەستور داسه پێم. هەڵسن، بان وه ئێرا بچیمن.