یوحەنا 13 - کتاب مقدس به زبان کردی جنوبی - گویش کلهوری

شوردن پاێ شاگردیل

¹ وەرجه جەشن پسەخ، عیسا زانستیا وەختێ ڕەسیه که له ئی جهانه بچوده ئەڕا لاێ باوگ ئاسمانی، جا شاگردیل خوەێ که وەناو ئی جهانه دوسیان داشت، وه تەمامی مابەتێان کرد.

² وەخت نان ئێواره بی. ئبلیس وەرجەوە ناویه دڵ یەهوداێ ئەسخەریوتی، کوڕ شەمعون، که عیسا بێیده دەس دشمەنەو.

³ عیسا که زانستیا باوگ گشت چشتێگ سپاردێەسه دەسێ و لەلاێ خودا هاتێه و چودەو ئەڕا لاێ خودا،

⁴ له سەر نان ئێواره هەڵساد و بەتیەگەێ له وه‎ڕێ درهاورد و حوڵەێگ هەڵگرد، بەساده ناوقەێەو.

⁵ ئمجا ئاو کرده ناو لەگەنێگ و شرو کرده شوردن پایل شاگردیل و وه حوڵەێگ که بەساویه ناوقەێەو پایلێان وشکەو کرد.

⁶ عیسا وەختێ ڕەسیه شەمعون پتروس، پتروس وەته پێ: «گەورەم، تو تواێ پایل مه بشوری؟»

⁷ عیسا وه جواوی وەت: «کارێ که کەم، تو ئیسه نیەفامیدێ وەلێ دویاجار حالید بود.»

⁸ پتروس وەپێ وەت: «هەراێهەر پایلم نیەشورید!» عیسا جواو دا: «ئەگەر نەشورمەد وەگەردمەو بەشێگ نێری.»

⁹ جا شەمعون پتروس وەت: «گەورەم، نه تەنیا پایلم، بەڵکەم دەسیل و سەرمیش بشور!»

¹⁰ عیسا جواو دا: «ئەوه که سەر ملێ شوردێه، سەر تا پاێ پاکه‎ و هەوەجی وه شوردن نێری، بێجگه پایلێ. ئیوه پاکین، وەلێ نه گشتدان.»

¹¹ چوینکه زانستیا کی دەێدەێ دەس دشمەنەو، وه ئی بونه وەت: «گشتدان پاک نين.»

¹² وەشون ئەوه که عیسا پایلێان شورد، بەتیەگەێ کرده وەرەو وه دواره نیشته سەر سفرەێ نان ئێواره. ئمجا له لێان پرسی: «حالیدان بی چه ئەڕادان کردم؟

¹³ ئیوه مه وه ماموستا و گەورەێ خوەدان چڕین و درسیش ئویشین، چوینکه ئیجورەمه.

¹⁴ جا ئەگەر من که گەورەێ و ماموستاێ ئیوەم پایلدان شوردمه، ئیوەیش باێه پایل یەکترەکی بشورین.

¹⁵ مه وەگەرد ئی کاره، نمونەێگ دامەسه پێدان تا ئیوەیش هەر ئیجوره بکێن که مه وەگەرددانەو کردمه.

¹⁶ وه ڕاسی، وه ڕاسی، وەپێدان ئویشم، نه خزمەتکار له ئەرواو خوەێ گەوراتره، نه ئەوه که کل کریاس له ئەوه که کلی کردێه گەوراتره.

¹⁷ ئیسه که ئیانه زانين، خوەش وه حاڵدان ئەگەر بارینێانه جا.

¹⁸ ئیه که ئویشم له باوەت گشتدان نیه. من ئەوانه که هەڵوژاردمه، ناسمێان. وەلێ ئی قسیەێ کتاو موقەدەسه باێه وه دی باێ که ئویشێ ”ئەوه که نان مه خوارد، وەگەردمەو دشمەنی کردێه.“

¹⁹ ئێرنگه ئیه وەرجه هەڵکەفتنێ وەپێدان ئویشم تا وەختێ که هەڵبکەفێ، ئیمان بارین که من هەم.

²⁰ وه ڕاسی، وه ڕاسی، وەپێدان ئویشم، هەر کەس ئەوه که مه کلی کەم قەبوڵ بکێ، مه قەبوڵ کردێه، هەر کەیش مه قەبوڵ بکێ، ئەیو که مه کل کرد قەبوڵ کردێه.»

²¹ عیسا وەشون ئیه که ئی چشتیله وەت، وه روح خوەێ پەشێو بی و شاێەتی دا و فەرمایش کرد: «وه ڕاسی، وه ڕاسی، وەپێدان ئویشم، یەکی له لێدان مه دەێده دەس دشمەنەو.»

²² شاگردیل نوڕینه یەکترەکی و ئەڵاجویان هاتیاد که ئیه له باوەت کی ئویشێ.

²³ یەکی له شاگردیلی که عیسا دوسی داشت، له سەر سفرەگە له لاێ عیسا پاڵەو داوید.

²⁴ جا شەمعون پتروس وه ئێشاره له لێ تواس تا له عیسا بپرسێ له باوەت کامێانەو قسیه کەێ.

²⁵ جا ئەو شاگرده توزێگ چیه دویاتر و سەری پاڵەو دا سینەێ عیسا و له لێ پرسی: «گەورەم، ئەوه کیه؟»

²⁶ عیسا جواو دا: «هەر ئەوەسه که ئی تیکەێ نانه وەشون ئیه که ژەنمێ ناو جام، دەمێ پێ.» ئمجا تیکه نانەگه ژەنیه ناو جام و دادەێ یەهودا کوڕ شەمعون ئەسخەریوتی.

²⁷ جا یەهودا وەختێ تیکه نانەگە گرد، شەیتان چیه ناوێەو. عیسا وەپێ وەت: «ئەو کاره که تواێ بکی، زویتر بکه.»

²⁸ وەلێ هویچکام له کەسیلێگ که نیشتوینه سەر سفرەگە، مەبەست عیسا حالی نوین.

²⁹ بڕێگ خیاڵ کردیان چوینکه کیسەێ پویل خەرجیەگه ها لاێ یەهودا، عیسا وەپێ ئویشێ هەر چی ئەڕاێ جەشن واجوه بسێنێ یا ئیه که چشتێ بیده کەمدەسیل.

³⁰ جا یەهودایش وەشون ئیه که تیکه نانەگه گرد، زویزی چیه دەیشت. شەو بی.

حوکم تازه

³¹ وەختێ یەهودا چیه دەیشت، عیسا وەت: «ئیسه کوڕ ئنسان جەڵاڵ پەێا کرد و خودایش وەناو ئەیو جەڵاڵ پەێا کرد.

³² ئەگەر خودا وەناو ئەیو جەڵاڵ پەێا کرد، جا خودایش ئەیو وەناو خوەێ جەڵاڵی دەێ و ئەیو زویزی جەڵاڵی دەێ.

³³ ڕوڵەیل ورد، تا کەمێگ‎تر وەگەرددانەو مینم. وەشونمەو گەردین و هەر ئەوجورە که وه جویلەکەیل وەتم، ئێرنگەیش وه ئیوه ئویشم نیەتویەنین باینه ئەڕا ئەو شونه که مه چم.

³⁴ حوکم تازەێگ دەمه پێدان، که یەکترەکی مابەت بکێن. هەر ئەوجورە که مه مابەتدان کردمه، ئیوەیش باێه یەکترەکی مابەت بکێن.

³⁵ وه ئیجوره گشت مەردم زانن که شاگرد منین، ئەگەر وه یەکترەکی مابەت بکێن.»

پێشگویی حاشاێ پتروس

³⁶ شەمعون پتروس وەت: «گەورەم، ئەڕا کوره چید؟» عیسا جواو دا: «تو ئێرنگه نیەتویەنی ئەڕا ئەو شونێگ که چم وەشونمەو باێ؛ وەلێ دویاجار وەشونمەو تێی.»

³⁷ پتروس وەت: «گەورەم، ئەڕا ئێرنگه نیەتویەنم وەشوندەو بام؟ مه گیانم ئەڕا تو دەم.»

³⁸ عیسا وەت: «گیاند ئەڕا مه دەی؟ وه ڕاسی، وه ڕاسی، وەپێد ئویشم، وەرجه ئیه کەڵەشیر بقویلنێ، سێ جار مه حاشا کەی.»