یوحەنا 12 - کتاب مقدس به زبان کردی جنوبی - گویش کلهوری

ئەتر ماڵی عیسا

¹ شەش ڕوژ وەرجه جەشن پسەخ، عیسا هاته ئەڕا ئاوایی بەیت‌عەنیا هەر ئەوره که ئیلعازەر زنەیی کردیا، هەر ئەوه که عیسا وه مردگیل زنیەو کردوی.

² جا وه ئەوره ئەڕا عیسا مێوانیێگ خستنه ڕێ و نان ئێواره دان. مارتا خزمەت کردیا و ئیلعازەریش یەکی له ئەوانه بی که وەگەرد عیسا نیشتویه سەر سفره.

³ هەر ئەو وەخته مریەم یەێ شیشه ئەتر گران قیمەت که له سونبول خاڵس بی و هەڵاێه نیو لیتر بی، هاورد و ماڵیه پایل عیسا و وەگەرد قژی وشکێەو کرد جوری که ماڵەگەیش پڕ بی له بو ئەترەگه.

⁴ وەلێ یەهوداێ ئەسخەریوتی، یەکی له شاگردیل عیسا که له شونێ داده‏‎ی دەس دشمەنەو، وەت:

⁵ «ئی ئەترە که قیمەتی سێسەد دیناره ئەڕا نەفروشیا، تا پویلەگەێ بیەرێیده کەمدەسیل؟»

⁶ یەهودا ئیه نه وەبونەێ دڵسوزی ئەڕا کەمدەسیل وەت، بەڵکەم وەبونەێ ئیه که دز بی؛ کیسەێ پویل خەرجیەگەیان وه دەس ئەوه بی و له پویلێگ که هیشتیانه لاێ، دزی کردیا.

⁷ عیسا وەت: «وازه ئی ژنه بارن! چوینکه ئی ئەترە ئەڕا ڕوژ دەفنم ناویه لا.

⁸ ئیوه هەمویشه کەمدەسیل وەگەرد خوەدانەو دێرین، وەلێ مه ئەڕا هەمویشه نێرین.»

⁹ وەختێ جەماێەت فرەێگ له جویلەکەیل زانستن عیسا ها ئەوره، هاتن تا نه تەنیا عیسا، بەڵکەم ئیلعازەریش که زنیەو کردوی، بوینن.

¹⁰ جا، سەران کاهنيل نەخشه کیشان تا ئیلعازەریش بکوشن،

¹¹ چوینکه قێر فرەێگ له جویلەکەیل وەبونەێ ئەوه چیان و وه عیسا ئیمان هاوردیان.

هاتن شاهانەێ عیسا وه ئورشەلیم

¹² ئی ڕوژەگەێ، جەماێەت فرەێگ که هاتوینه ئەڕا جەشن پسەخ وەختێ شنەفتن که عیسا تێدە ئەڕا ئورشەلیم،

¹³ پەلیل دار خورما گردنه دەس و چینه پیریەو، هاوار کردیان: «نجات بیه! بمارکه ئەوه که وه ناو خوداوەندەو تێ، بمارکه پادشاێ ئێسرائیل!»

¹⁴ ئمجا عیسا خەرکوڕێگ پەێا کرد و سوارێ بی؛ هەر ئەو جوره که وەناو کتاو زەکەریاێ پەێخەمەر نویسریاس:

¹⁵ «زاورد نەچو! ئێ دویەت کویەگەێ سەهیون، بنوڕ پادشاگەد تێ، وه سوار خەرکوڕێگەو تێ!»

¹⁶ له سەرەتاوه شاگردیلێ ئی چشتیله حالی نوین، وەلێ وەختێ عیسا جەڵاڵ پەێا کرد، کەفته هویرێان که ئیانه له باوەت ئەیو نویسریاوی و ئەوانیش ئیجوره وەگەردیەو کردوین.

¹⁷ ئەو جەماێەتیشه که وەختێگ عیسا، ئیلعازەر وەناو مەقبەرەگه چڕێ و وەناو مردگیل زنیەو کرد وەگەردیەو بین، هەر وەئیجوره وه ئی هەڵکەفته شاێەتی دیان.

¹⁸ جەماێەتەگه وه ئی بونه چینه پیریەو، چوینکه شنەفتوین ئیجور نیشانه و موجزەێگ کردێه.

¹⁹ جا زانایل فرقەێ فەریسی وه یەکترەکی وەتن: «دوینین که هویچ کارێگ له دەسدان نیەتێی؛ بنوڕ گشت دنیا کەفتنەسه شونێ.»

یونانیەگان وەشون ئیه بین عیسا بوینن

²⁰ وەناو کەسیلێ که ئەڕا پەرەسین خودا وەناو جەشن پسەخ هاتوینه ئەڕا ئورشەلیم، بڕێگ یونانی بین.

²¹ ئەوانه هاتنه ئەڕا لاێ فیلیپوس، که له مەردم شار بەیت‌سیدا له ناوچەێ جەلیل بی، وەپێ وەتن: «گەورەم، توایم عیسا بوینیم.»

²² فیلیپوس چی وه ئاندریاس وەت، جا ئاندریاس و فیلیپوس چین وه عیسا وەتن.

²³ عیسا وەپێان وەت: «وەخت جەڵاڵ پەێا کردن کوڕ ئنسان ڕەسیه.

²⁴ وه ڕاسی، وه ڕاسی، وەپێدان ئویشم، ئەگەر دەنگ گەنم نەکەفیه ناو خاک و نەمرێ، تەنیا مینێ؛ وەلێ ئەگەر بمرێ، بەر فرەێگ تیەرێ.

²⁵ کەسێگ گیان خوەێ دوس بیاشتود، ئەوه له دەس دەێ. وەلێ کەسێگ وەناو ئی دنیا له گیان خوەێ قینێ باێ، ئەوه ئەڕا زنەیی ئەبەدی پارێزنێد.

²⁶ ئەگەر کەسێگ خزمەتم کەی، باێه بکەفێه شونم؛ مه له هەر کوره بوم، خزمەتکارەگەمیش ها ئەوره. ئەگەر کەسێگ خزمەتم بکێ، باوگ ئاسمانی سەربەرزێەو کەێ.

عیسا باس مردن خوەێ کەی

²⁷ «ئێرنگه گیانم خەمباره. چه بویشم؟ ئێ بویشم، ”باوگه! مه وه ئی ساته نجات بیه“؟ وەلێ هەر وه بونەێ ئی کاره وه ئی ساتە ڕەسیمه.

²⁸ باوگه، ناو خود جەڵاڵ بیه!» ئمجا دەنگێ وه ئاسمانەو هات: «جەڵاڵ دامه و دوارەیش جەڵاڵ دەم.»

²⁹ جا جەماێەتێگ که له ئەوره وساوین و ئی دەنگه شنەفتن، وەتن: «هەورەتریقه بی.» بڕێگ تر وەتن: «فریشتەێگ وەگەردیەو قسیه کرد.»

³⁰ عیسا وەت: «ئی دەنگه ئەڕا ئیوه بی، نه ئەڕا مه.

³¹ ئێرنگه وەخت داوەری ئی جهانەسه؛ ئێرنگه سەروک ئی جهانه دەر کریەد.

³² وەختێ مه له بان زەوی بەرزەو کریەم، گشت مەردم کیشمه ئەڕا لاێ خوەم.»

³³ عیسا ئیه وەت، تا شێوەێ مردنێ نیشان بێید.

³⁴ جەماێەت وەتن: «له تەورات شنەفتیمنه، مەسیح واده دریاێ تا ئەبەد مینێدی، ئێ چوی ئویشێ کوڕ ئنسان باێه بەرزەو بکرێ؟ ئی کوڕ ئنسانه کیه؟»

³⁵ جا عیسا وەپێان وەت: «نویر ئەڕا قێرێگ‎تر ها گەرددانەو. تا نویر ها گەرددانەو، ڕێ بکەن نەخواێ تیەریکی ئیوە بگرێده وەر. هەر کەس وەناو تیەریکی ڕێ کێ، نیەزانێ ئەڕا کوره چود.

³⁶ تا وەختێ نویر ها گەرددانەو، وه نویر ئیمان بارن تا بوینه ڕوڵەێ نویر.» وەختێ عیسا ئی قسیەیله کرد، چی و خوەێ له لێان شاردەو.

بی ئیمانی مەردم

³⁷ هەر چەن عیسا نیشانه و موجزەیل فرەێگ وه نوای چەویان کردوی، وەلێ هێمراێ ئەوانه وەپێ ئیمان ناوردن.

³⁸ تا کەڵام ئەشعەیاێ پەێخەمەر باێه دی که وەتوی: «ئێ خوداوەند، کی پێخامەگەمان باوەڕ کردێه و هێز خوداوەند ئەڕا کی ئاشکرا بیه؟»

³⁹ جا ئەوانه نەتویەنستن ئیمان بارن، چوینکه له شونێگ تر ئەشعەیا وەتیه:

⁴⁰ «ئەیو چەویلیان کور و دڵیان ڕەقەو کردێه، تا نەخواێ وه چەویلیان بوینن و وه دڵیان بفامن و هەڵوگەردیەن و شەفاێان بێەم.»

⁴¹ ئەشعەیا وه ئی بونه ئی چشتیله وەت چوینکه جەڵاڵ عیسا دی و له باوەتێەو قسیه کرد.

⁴² وە ئی هەمگه، قێر فرەێگ وه گەورایل قەوم جویلەکیش‎ ئیمان هاوردنه عیسا، وەلێ وه بونەێ ئیه که له فەریسیەیل رخێان چیا، وه ئیمان خوێان ئێقرار نەکردن، نەخواێ له کەنیسه دەرێان بکەن.

⁴³ چوینکه جەڵاڵێگ که له لاێ مەردمەو هاتیاد فرەتر له جەڵاڵێگ دوس داشتن که له لاێ خوداوەو هاتیاد.

⁴⁴ ئمجا عیسا وه دەنگ بەرز وەت: «هەر کەس وه مه ئیمان بارێ، نه وه مه، بەڵکەم وه ئەیو که مه کل کرد ئیمان هاوردێه.

⁴⁵ هەر کەس مه دوینی، ئەیو که کلم کرد دیه.

⁴⁶ مه جور نویریگ هاتمەسه ئی جهانه تا هەر کەس وه مه ئیمان بارێ، وەناو تیەریکی نەمینێ.

⁴⁷ ئەگەر یەکیگ قسیەیلم بشنەفێ وەلێ گوشه ‎لێان نەتەکنێ، مه داوەریێ نیەکەم؛ چوینکه ناتمه تا داوەری جهان بکەم، بەڵکەم هاتمه تا جهان نجات بێەم.

⁴⁸ ئەوه که ڕەدم بکێ و قسیەیلم قەبوڵ نەکێ، داوەرێگ تر ئەڕاێ هەس؛ هەر ئەو قسیەیلی که وەتم، له ڕوژ ئاخر داوەڕێ کەی.

⁴⁹ چوینکه مه له خوەمەو قسیه نەکردمه، بەڵکەم باوگێ که کلم کرد خوەێ حوکمه پێم کرد که چه بویشم و له چه قسیه بکەم.

⁵⁰ منیش زانم که حوکمەگەێ زنەیی ئەبەدیه. جا هەر چی که مه ئویشم هەر ئەو چشتەسه که باوگ وەپێم وەتیه.»