یوحەنا 11 - کتاب مقدس به زبان کردی جنوبی - گویش کلهوری

نەخوەشێ و مردن ئیلعازەر

¹ پیاێگ ئیلعازەر ناو نەخوەش بی. ئەوه له مەردم ئاوایی بەیت‌عەنیا، ئاوایی مریەم و خویشکێ مارتا بی.

² مریەم هەر ئەو ژنەسه که پایل خوداوەند عیسا ‎ئەتر ماڵی کەێ و وەگەرد قژێ وشکێەو کەێ. ئیلعازەر براێ مریەم نەخوەش کەفتوی.

³ جا خویشگەگان ئیلعازەر ئەڕا عیسا پێخام کل کردن، وەتن: «گەورەم، ئەوه که دوسی دێرێ نەخوەشه.»

⁴ وەلێ وەختێ عیسا ئی خەوەره شنەفت، وەت: «ئی نەخوەشیه ‏نیەوده بایس مردن، بەڵکەم ئەڕا جەڵاڵ خوداس، تا کوڕ خودا وه وەسلەێ ئەوه جەڵاڵ پەێا بکێ.»

⁵ عیسا، مارتا و خویشکەگەێ و ئیلعازەر دوس داشت.

⁶ جا وەختێ شنەفت که ئیلعازەر نەخوەشه، دو ڕوژتر وه ئەوره که بی، مەن.

⁷ ئمجا وەشونێ عیسا وه شاگردیلی وەت: «بان وه دواره بچیمنه ئەڕا ناوچەێ یەهودیه.»

⁸ شاگردیل وەپێ وەتن: «ماموستا، ماوەێگ نیه که جویلەکەیل تواسن کوچگواراند بکەن، وه دواره تواێ بچیده ئەڕا ئەوره؟»

⁹ عیسا جواو دا: «مەر ڕوژ، دوانزه سات نیه؟ ئەوه که وەناو ڕوژ ڕێ بکێ، پاێ هەڵنیەکەفێ، چوینکه نویر ئی جهانه دوینی.

¹⁰ وەلێ ئەوه که وەناو شەو ڕێ بکێ، پاێ هەڵکەفێ، چوینکه نویر وه ناو ئەو ئایەمه نیه.»

¹¹ وەشون ئی قسیەیله عیسا وەپێان وەت: «ئیلعازەر ڕەفیقمان خەفتیه، وەلێ چم تا هەڵێسنم.»

¹² جا شاگردیل وەپێ وەتن: «گەورەم، ئەگەر خەفتیه، خاسەو بود.»

¹³ عیسا له باوەت مردن ئەو قسیه کردیا، وەلێ شاگردیل گومان کردیان مەبەستی ئیەسه که ئیلعازەر خەفتیه تا شەکەتی دەر بکێ.

¹⁴ ئمجا عیسا ئاشکرا وەپێان وەت: «ئیلعازەر مردگه.

¹⁵ وەبونەێ ئیوه خوەشاڵم که وه ئەوره نویم، تا ئیوه ئیمان بارین. وەلێ بان تا بچیمنه ئەڕا لاێ.»

¹⁶ جا توما، که وه لفانه ماروف بی، وه شاگردیل تر وەت: «بان ئیمەیش بچیم تا وەگەردیەو بمریم.»

مه قیامەت و زنەییم

¹⁷ وەختێ عیسا ڕەسیه ئەوره، زانست که چوار ڕوژه ئیلعازەر هیشتنەسه ناو مەقبەرە.

¹⁸ بەیت‌عەنیا نزیک شار ئورشەلیم بی تا ئەوره سێ کیلومتر ڕێ بی.

¹⁹ قێر فرەێگ له جویلەکەیل هاتوینه ئەڕا لاێ مارتا و مریەم تا ئەڕا مردن براگەێان سەر سڵامەتیێان بێەن.

²⁰ جا وەختێ مارتا شنەفت که عیسا تێدە ئەڕا ئەوره چیه پیریەو، وەلێ مریەم نیشته ماڵ.

²¹ مارتا وه عیسا وەت: «گەورەم، ئەگەر وه ئێرا بویاتیای براگەم نیەمردیا.

²² وەلێ زانم تەنانەت ئێرنگەیش هەر چی له خودا بتواێ، خودا دەێده پێد.»

²³ عیسا وەپێ وەت: «براگەد زنیەو بود.»

²⁴ مارتا وەپێ وەت: «زانم که له ڕوژ قیامەت زنیەو بود.»

²⁵ عیسا وەپێ وەت: «قیامەت و زنەیی منم. هەر کەس وه من ئیمان بارێ، تەنانەت ئەگەر بمریدیش، زنیەو بود.

²⁶ هەر کەسیش زنیه و ئیمانه من دێرێ، هویچ وەخت نیەمرێ؛ ئیه باوەڕ کەی؟»

²⁷ مارتا وه عیسا وەت: «بەڵێ، گەورەم، من ئیمان دێرم که تو مەسیح واده دریاێ، کوڕ خودای، هەر ئەوه که باێه وه ئی جهانه باێ.»

²⁸ وەختێ مارتا ئیه وەت، چی مریەم خویشکێ چڕێ و وه تەنیایی وەپێ وەت: «ماموستا ها ئێرا و چڕیدەد.»

²⁹ وەختێ مریەم ئیه شنەفت، زویزی هێز گرد و چیه ئەڕا لاێ عیسا.

³⁰ هێمراێ عیسا ناتویه ناو ئاواییەگه، بەڵکەم هێمراێ هەر له ئەو شونه بی که مارتا چویه پیریەو.

³¹ جویلەکەیلی که وەگەرد مریەم له ماڵ بین و سەرسڵامەتی دیانه پێ، وەختێ دین که مریەم زویزی هەڵساد و چیه دەیشت، وەشونیەو چین. گومان کردیان چود ئەڕا لاێ مەقبەرەگه تا له ئەوره گیره بکێ.

³² وەختێ مریەم ڕەسیه ئەوره که عیسا بی و ئەیو دی، کەفته مل پاێ و وەت: «گەورەم، ئەگەر وه ئێرا بویاتیای براگەم نیەمردیا.»

³³ وەختێ عیسا دی مریەم و جویلەکەیلی که وەگەردێ هاتوین و گیره کردیان، وه روح خویەو خەمبار و پەشێو بی.

³⁴ عیسا وەت: «ئەوه ناینەسێ کوره؟» وەپێ وەتن: «گەورەم، بەو بوین.»

³⁵ عیسا بیه گیرەوه.

³⁶ جا جویلەکەیل وەتن: «بنوڕ چەنێ دوسی داشت!»

³⁷ وەلێ بڕێگ له ئەوانه وەتن: «کەسێ که چەویل ئەو پیاێ کوره خاسەو کرد، نیەتویەنستیا نێلی ئیلعازەريش بمرێ؟»

زنیەو کردن ئیلعازەر

³⁸ ئمجا عیسا، وەدواره خەمبارەو بی و هاته ئەڕا مەقبەره. مەقبەرەگەیش ئشکەفتێ بی که کوچگ گەوراێگ ناوینه نوای دەمی.

³⁹ عیسا وەت: «کوچگەگه پل بێەن.» مارتا خویشک مردگەگه وه عیسا وەت: «گەورەم، ئیسه دی بو کردێه، چوینکه چوار ڕوژه مردگه.»

⁴⁰ عیسا وەپێ وەت: «مەر وەپێد نەوەتم ئەگەر ئیمان بارێ، جەڵاڵ خودا دوینی؟»

⁴¹ جا کوچگەگه پل دان. عیسا نوڕیه ئاسمان و وەت: «باوگه، سپاس ئەڕا ئیه که دەنگم شنەفتیدە.

⁴² زانستیام که هەمویشه مه شنەفێ. وەلێ ئیه وەبونەێ مەردمیگ وەتم که وه ئێرا وسانه، تا ئیمان بارن که تو کلم کردی.»

⁴³ وەختێ عیسا ئی قسیەیله کرد وه دەنگ بەرز هاوار کرد: «ئیلعازەر، بەوه دەیشت!»

⁴⁴ ئمجا مردگەگه، هەر ئەوجورە که دەس و پاێ وەگەرد کفنەگه پێچیاوی و دەم چەویشێ وەگەرد دەسرێگ پێچیاوی، هاته دەیشت. عیسا وەپێان وەت: «وازێ بکەن و بیلن با بچود.»

دەس وه یەکی ئەڕا کوشتن عیسا

⁴⁵ جا قێر فرەێگ له جویلەکەیل که وەگەرد مریەم هاتوین و کار عیسا دوین، وەپێ ئیمان هاوردن.

⁴⁶ وەلێ قێرێگ له لێان چینه ئەڕا لاێ زانایل فرقەێ فەریسی و ئەوه که عیسا کردوی، وەپێان وەتن.

⁴⁷ جا سەران کاهنیل و فەریسیەیل گردەو بوین، وەتن: «باێه چه بکێم؟ ئەڕا ئیه که ئی پیا نیشانه و موجزەیل فرەێگ کەی.

⁴⁸ ئەگەر بیلیم هەر ئیجوره بچوده‎ نوا، گشتێ وەپێ ئیمان تیەرن و رومیەگان تیەن، هەم مابەدەگەمان و هەم ملەتەگەمان له دەسمان دەر تیەرن.»

⁴⁹ وەلێ یەکی له ئەوانه، که قیافا ناوێ بی و ئەو ساڵه کاهن گەورا بی، وەپێان وەت: «ئیوه هویچ نيەزانين.

⁵⁰ نیەفامین که ئیه ئەڕادان خاستره که یەێ نەفەر ئەڕا قەوم بمرێ، تا ئیه که گشت ملەتەگه نابود بون.»

⁵¹ قیافا ئی قسیه له خوێەو نەوەت، بەڵکەم وه بونەێ ئیه که ئەو ساڵه کاهن گەورا بی، نەبوەت کرد که عیسا ئەڕا ملەت مرێ،

⁵² نه تەنیا ئەڕا ملەت، بەڵکەم ئەڕاێ جەم کردن و یەکی کردن ڕوڵەیل خودا که تەفرتوینان.

⁵³ جا، هەر وه ئەو ڕوژه دەس وه یەکی کردن تا عیسا بکوشن.

⁵⁴ وه ئی بونه عیسا دی ئاشکرا وەناو جویلەکەیل هات بچو نەکردیا، بەڵکەم وه ئەوره له مەنتەقەیگ نزیک بیاوان، چیه ئەڕا شارێگ وه ناو ئێفرایم، وه ئەوره وەگەرد شاگردیلی مەن.

⁵⁵ جەشن پسەخ جویلەکەیل نزیک بی، قێر فرەێگ وه ئەو مەنتەقەیل دەوروەره چینه ئەڕا ئورشەلیم تا وەرجه جەشن نەریت پاکەو بوین ئەڕا خوێان وه جێ بارن.

⁵⁶ ئەوانه وەشون عیسا گەردیان و هەر ئەو جوره که وەناو مابەد وساوین، وه یەکترەکی وەتیان: «چه فکر کین؟ ئێ هەر هویچ ئەڕا جەشن نیەتێی؟»

⁵⁷ وەلێ سەران کاهنیل و فەریسیەیل دەستور داوین که ئەگەر کەسێ بزانێ عیسا ها کوره، باێه خەوەر بێەنه پێان تا بگرنەێ.