یاقوب 5 - کتاب مقدس به زبان کردی جنوبی - گویش کلهوری

هەڕەشه وه دەوڵەمەنیل ستەمکەر

¹ جا ئیوه ئێ دەوڵەمەنیل، وەبونەێ بەرد‎لەبەردیلێگ که تێدە ملدانەو، گیره و شین بکەن.

² ماڵ و داراییدان فەنا بیه و موریانه داسه دڵنگیلدان!

³ تەڵا و نقرەگەدان ژەنگ داس و ژەنگەگەیان وه ئیوه شاێەتی دەێ و جور ئاگر، گوشت جەسەدان خوێد. ئیوه وه ئی ڕوژیل ئاخره ماڵ گردەو کردینه!

⁴ ئێرنگه حەقدەس کارکەریلێ که وەناو زەویزاریلدان درو کردنه، هەر ئەو حەقدەسه که ئیوه وه لیلاجیەو ئەڕا خوەدان ناینەسێ لا، وه زد ئیوه هاوار کەن و هاوار درەوکەرەیل وه گوش خوداوەند لەشکەریل ڕەسیه.

⁵ ئیوه له بان زەوی وەناو دەوڵەمەنی و عیش و نوش زنەیی کردینه و دڵیلدان ئەڕاێ ڕوژ سەر بڕین پەروار کردينه!

⁶ ئیوه ئەیو ئایەم سالحانه که وه ڕویدانەو نیەوسد، ماکوم کردینه و کوشتینه.

سەور له وەخت عەزاو کیشاین

⁷ جا ئێ برایل، تا هاتن خوداوەند سەور بکەن. بنوڕن چوی جفتیار چەوەڕێه تا زەوی خەڵەێگ که تیەرزێ بیێده دەس؛ چوی سەور کێ تا وەختێگ که وارانیل یەکم جار و ئاخرجار یانێ وارانیل پاێیزی و وەهاری وه مل زەوی بوارێد.

⁸ جا ئیوەیش سەور بیاشتوین و دڵدان قورس بود، چوینکه هاتن خوداوەند نزیکه!

⁹ برایل، له یەکترەکی شکایەت مەکەنن، تا وه ئیوەیش داوەری نود، بنوڕن ’داوەر‘ له دەم دەرەگه وساس.

¹⁰ ئێ برایل، وەناو زەجر کیشان و سەور کردن، له پەێخەمەریلێگ که وه ناو خوداوەند قسیه کردیان، نمونه بگرن.

¹¹ ئیمه کەسیلێگ که بەردەوامن، بەختەوەر زانیم. ئیوه له باوەت بەردەوامی ئەیوب شنەفتینه و دەس ئاخر کار خوداوەند دینه، که خوداوەند چەنێ مێرەبان و بەزەیکەره.

¹² وەلێ گرنگتر له گشتێ، ئێ برایلم، قەسەم مەخوەن؛ نه وه ئاسمان، نه وه زەوی و نه وه هویچ چشتێگ تر. بەڵکەم بیلێن ’بەڵێ‘ ئیوه هەر ئەو بەڵێ بود و ’نەی‘ ئیوه هەر ئەو نه، نەخواێ ماکوم بوین.

دوعای وه ڕوی ئیمان

¹³ وەناودان کەسێگ هەس که زەجر کیشێ؟ ئەوه دوعا بکێد؛ کەسێگ هەس که خوەشاڵ بود؟ گورانی ستایش بچڕێد.

¹⁴ وەناودان کەسێگ هەس که نەخوەش بود؟ شێخیل کلیسا دەنگ بکێد و ئەوانه ئەڕاێ دوعا بکەن و وه ناو خوداوەند وەگەرد روین دەسنیشانێ بکەن.

¹⁵ دوعایگ که وەگەرد ئیمان بود، کەسێگ که نەخوەشه نجات دەێ و خوداوەند ئەوه هەڵسنێد و ئەگەر گوناێگ کردوی، بەخشریەد.

¹⁶ جا لەلاێ یەکترەکی گونایل خوەدان وه زوان بارن و ئەڕاێ یەکترەکی دوعا بکەن تا شەفا بگرین. دوعای ئایەم سالحان، هێز فرەێگ دێرێد و کارکەره.

¹⁷ ئەلیاس پەێخەمەر ئنسانێگ بی هەرجور ئیمه، ئەوه وەگێ دڵیگ دوعا کرد که واران نەوارێد و سێ ساڵ و کوتێگ واران وه مل زەوی نەواری؛

¹⁸ جا هەمباز دوعا کرد و ئاسمان واران وارای و زەوی خەلەی خوەێ دا دەس.

¹⁹ برایلم، ئەگەر کەسێگ وەناودان له ڕاسی چەفتەو بود و یەکیگتر ئەوه بارێدەو،

²⁰ ئەو ئایەمه بزانێ که هەر کەس گوناکارێگ له چەفتیەگەێ باریدێەو، گیانێ له مەرگ نجات دەێ و گونایل فرەێگیش داپوشانێه.