یاقوب 2 - کتاب مقدس به زبان کردی جنوبی - گویش کلهوری

دویرێ له دو‎چەوەکی

¹ برایلم، ئیوه که وه خوداوەندمان عیسا مەسیح، خوداوەند جەڵاڵ ئیمان دێرین، له بین ئایەمیل دوچەوەکی نەکێن.

² چوینکه ئەگەر کەسێگ وەگەرد کلکەوانه تەڵا و دڵنگ قیمەتی باێده ناو جەمدان و دەستەنگێگیش وەگەرد دڵنگ شڕ و وڕ و دڕیایێگ باێده ناو،

³ و ئەگەر ئیوه وه ئەو کەسێگ که دڵنگ قیمەتی ها وەرێەو خاس حرمەت بگرین و بویشینه پێ: «بەوه له ئی شون خاسه دانیش،» وەلێ وه دەستەنگەگه بویشین: «هەر له ئەوره بوسیه پاوه‎!» یا: «بەوه ئێرا لەنوای پایلم له بان زەوی دانیش،»

⁴ ئێ مەر ئیجوره وەناو خوەدان دوچەوەکی نەکردینه و وەگەرد فکریل خراو، داوەری نەکردینه؟

⁵ برایل عەزیزم، گوش بگرن! مەر خودا دەستەنگیل ئی جهانه هەڵنەوژاردیه تا وەناو ئیمان دەوڵەمەن بون و پادشایێگ وه میراتی بوەن که ئەیو وه ئەوانه که دوسی دێرن، واده داس؟

⁶ وەلێ ئیوه وه دەستەنگ بی حرمەتی کردینه. ئێ مەگەر هەر ئی دەوڵەمەنیله نین که وه ئیوه ستەم کەن و کیشنەدانه دادگا؟

⁷ ئێ مەگەر ئیانه نین که وه ئەو ناو حرمەتداره که نریاسه ملدانەو، کفر کەن؟

⁸ ئەگەر وه ڕاسی شەریعەت شاهانه وه پێ ئی وەتریای کتاو موقەدەسه وه جێ بارین که فەرمایش کەێد: «هاوساگەد هەر جور خوەد دوس بیاشتو،» کار خاسێگ کین.

⁹ وەلێ ئەگەر دوچەوەکی بکێن، گونا کین و شەریعەت، ئیوه خەتاکار دوینید و ماکومدان کێ.

¹⁰ چوینکه ئەگەر کەسێگ گشت شەریعەت بپارێزنێد وەلێ تەنیا یەکی له یاسایلێ بشکنێ، وه شکانن گشت شەریعەت تاوانباره.

¹¹ چوینکه، خوداێگ که فەرمایش کرد: «داوانپێسی مەکه،» هەر ئیجوره فەرمایش کرد: «خوین مەکه.» ئەگەر توی داوانپێسی نەکێ وەلێ خوین بکێ، شەریعەت شکانیده.

¹² جا جور کەسیلێ قسیه بکێن و جور کەسیلێ کار بکێن که وه پێ شەریعەت ڕزگاری، ئەڕاێان داوەری بود،

¹³ وەبونەێ ئیه که ئەوه که بەزەیی وه کەسێگ ناتیه، وه بەزەیی داوەری نیود. بەزەیی وه مل داوەری زاڵەو بود!

ئیمان و کردەوه

¹⁴ برایلم، چ فایده ئەگەر کەسێگ بویشێد ئیمان دێرێ، وەلێ کردەوه نياشتود؟ مەر ئیجوره ئیمانێگ تویەنێ نجاتی بێید؟

¹⁵ ئەگەر براێگ یا خویشکێگ هەوەجی وه دڵنگ و خواردەمەنی هەر ڕوژی بود

¹⁶ و کەسێگ له ئیوه وەپێان بویشی: «بچن وه سڵامەت، گەرم و تێر بوین،» بی ئیه که هەوەجییل جەسەیان بیده پێان؛ چ فایده؟

¹⁷ جا هەر ئیجوریشه ئیمان وه تەنیایی، ئەگەر کردەوه نیاشتود، ئیمان مردگەگه.

¹⁸ ئێرنگه هاتێ کەسێگ باێ بویشی: «توی ئیمان ديری و منیش کردەوه دێرم!» توی ئیماند بێ کردەوەد نیشانم بیه و منیش ئیمانم وه کردەوەم نیشاند دەم.

¹⁹ تو ئیمان ديری که خودا یەکیگه. فره خاس کەی! تەنانەت دێويلیش ئیجور ئیمانێگ دێرن و له ترس وه خوێانا لەرزن!

²⁰ ئێ نەفام، تواێ بزانێ ئەڕا ئیمان بێ کردەوه وەدەرد نەخوەره؟

²¹ ئی مەگەر باپیرمان ئێبراهیم وه کردەوه سالحان وه حساو نات، ئەو وەخته که کوڕەگەێ خوەێ، ئەسحاق، له بان قوروانگا پیشکەش کرد؟

²² دوينی که ئیمان و کردەوەێ وه یەکەو کار کردیان و ئیمانێ وەگەرد کردەوەێ کامڵەو بی.

²³ ئەو چشته که وەناو تەورات نویسریاس هاته دی که ئویشێ: «ئێبراهیم وه خودا ئیمان هاورد و ئیه ئەڕاێ سالح بوین وه حساو هات،» و ئەوه دوس خودا خوەنریا.

²⁴ جا دوینین وه کردەوەس که ئنسان سالحان وه حساو تێد، نه وەگەرد ئیمان تەنیا.

²⁵ هەر ئیجوره ئێ مەگەر راحاب داوانپێس وه کردەوه سالحان وه حساو نات، ئەو وەخته که وه کل کریایێەگان ئامان دا و ئەوانه له یە ڕێ تر کل کرد؟

²⁶ چوینکه هەر ئەوجورە که جەسەێ بی روح مردگه، ئیمانیش بێ کردەوه مردگه.