یاقوب 1 - کتاب مقدس به زبان کردی جنوبی - گویش کلهوری

¹ له یاقوب، خوڵام خودا و خوداوەند عیسا مەسیح، وه دوانزه هوز قەوم ئێسرائیل که وەناو جهان تەفرتوینان. سڵام!

ئەزمون ئیماندان

² ئێ برایلم، هەر وەخت وەگەرد ئەزمونیل جورواجور ڕوی وه ڕوی بوین، وه خوەشی گەوراێگ بزاننێ!

³ چوینکه زانين ئەزمون بوین ئیماندان، بەردەوامی تیەرێده بار.

⁴ بیلن بەردەوامی کار خوەێ کامڵەو بکێ تاگه بازڵه و کامڵەو بوین و چشتێ کەم نیاشتوین.

⁵ ئەگەر کەسێگدان هەوەجی وه زانیاری دێرێ، له خودا داوا بکێ و وەپێ بەخشرێید، هەر له ئەو خوداێگه که وه گشتیەکی وه دەس دڵوازای و بی سەرزەنشت بەخشێد.

⁶ وەلێ وه ئیمان داوا بکێد و هویچ شک وه دڵ نارێ، چوینکه کەسێگ که شک دێرێ، مینێده تاف دەریا که وا بێدێ و خیدی هەر لاێگەو.

⁷ ئیجور کەسێگ نەبایه خەیاڵ بکێ که له خوداوەند چشتێ گرید،

⁸ ئەوه ئایەمێگه هوکی هوکی و وەناو هویچکام له کردەوەیلێ بەردەوام نیه.

⁹ براێ دەستەنگ وه جیگەێ بەرزێگ که دێرێد، شانازی بکێد و

¹⁰ دەوڵەمەن وه سوکیەگەێ، چوینکه ئەوه جور گوڵ بیاوان له بین چود.

¹¹ وه بونەێ ئیه که خوەر وەگەرد تین بسزنێگ هەڵ‎تێد و گژگیا وشکەو کێ، گوڵەگەێ ڕشێیده خوار و ڕەنگینیەگەێ له بین چود. هەرئیجوره دەوڵەمەنیش له ناوڕاس کاریلێ، له بین چود.

¹² خوەش وه حاڵ ئەوه که وەناو ئەزمونیل بەردەوامه، چوینکه وەختێ له ئەزمون سەربەرز باێه دەیشت، ئەو تاج ژیانه گرید که خودا وه ئەوانه که دوسی دێرن، وادەێ داس.

¹³ هویچکەس وەختێ خەڵەتێ، نویشێ: «ئیە خوداس که مه خەڵەتنێ،» چوینکه خودا وەگەرد هویچ خراویگ نیەخەڵەتێ و هویچ کەسێگیش نیەخەڵەتنێ.

¹⁴ وەلێ وەختێ کەسێگ خەڵەتێی، هەواوهەوەس خوێه که گولێ دێ و خیدێ دام.

¹⁵ جا هەواوهەوەس که ئێمڵه بود، گونا تیەرێده دنیا و گونایش وەختێ حساوی گەورا بود، مەرگ وه بار تیەرێ.

¹⁶ برایل عەزیزم، گول مەخون!

¹⁷ هەر خەڵات خاس و هەر خەڵات کامڵ له بانه، له لاێ باوگ نویریل تێدە خوار. هەر ئەو باوگه که وەناوێ نه گویڕیانیگ هەس و نه هویچ ساێەڕکیگ که وەبونەێ گویڕیان بود.

¹⁸ ئەیو وه پێ خاستەی خوەێ ئیمه وەگەرد کەڵام ڕاسی هاورده دی تا وەناو درس کریاێلی وێنەێ نەوبەر بویمن.

شنەفتن و وه جێ هاوردن

¹⁹ برایل عەزیزم، ئیه بزانن: هەر کەس وەناو شنەفتن تن بود، وەناو قسیه کردن کول بود و وەناو توڕه بوینیش کول بود!

²⁰ وەبونەێ ئیه که توڕەێ ئایەم، سالح بوینێگ که خودا تواێ، وه بار نیەتیەرێد.

²¹ جا هەر جور گەنیان و هەر شونه پایگ که له شەڕئاشویه له خوەدان دویرەو بکەن و وه بێ فیسی کەڵامێگ بگرنەوەر که وەناودان کاڵیاس و تویەنێ گیاندان نجات بێید.

²² وەلێ وه جێ هاوریل کەڵام خودا بون، نه تەنیا گوشکەریلێ که خویان گول دەن!

²³ چوینکه هەرکەس که گوشکەر کەڵامه و وەجێ هاوەرێ نیه، مینێده کەسێگ که وەناو جامەک نوڕیده دەم‎چەو خوەێ.

²⁴ چوینکه ئەوه نوڕیده خوەێ و چود، هەرئەو ئانه له هویرێەو چود که چوی بیه.

²⁵ وەلێ ئەوه که چەو‎ بڕیەسه شەریعەت کامڵ که شەریعەت ڕزگاریه و ئەوه وه جێ تیەرێد، گوشکەر له هویربەریگ نیه بەڵکەم وه جێ هاوەر ئەوەسه، ئەوه وه کردەوەێ خوەێ بمارکه.

²⁶ ئەگەر کەسێگ خوەێ وه خوداپەرەس بزانێ و هەوسار زوانی له دەسیەو نود، بەڵکەم دڵ خوەێ گول بێی، خوداپەرەسی ئەو ئایەمه هویچ نیەتیەرزی.

²⁷ خوداپەرەسی پاک و بی لەک و پێس له وەر چەو خوداێ باوگ، ئەوەسه که دەس یەتیمیل و بێوه ژنيل له وەخت بەردیان بگریم و خوەمان له چەپڵی ئی جهانه بپارێزنیم.