عبرانییل 9 - کتاب مقدس به زبان کردی جنوبی - گویش کلهوری

پەرەسش وەناو دەوار بان زەوی

¹ ئێرنگه تەنانەت پەێمان یەکم، یاسایلێگ ئەڕا پەرەسش داشت و هەر ئیجوره وەبان زەوییش یەێ شون موقەدەس.

² چوینکه دەوارێگ هەڵ دریاوی که له یەکم بەشەگەێ، چراخدان، میز و نانیگ بی که تەقدیس بی؛ وه ئی شونه وەتیان ’شون موقەدەس‘.

³ دویمین بەشیش وه پشت پەردەێ دویم بی که ناوێ ’موقەدەسترین شون‘ بی؛

⁴ له ناو ئی بەشه، قوروانگای تەڵایی ئەڕا سزانن بوخور بی و هەرئیجوره سنویق پەێمان که له هەر لاێگەو وەگەرد تەڵا پوشریاوی. وەناو ئی سنویقه، کویزەێ تەڵایی که نان ’مەنا‘ وەناوێ بی، هەرئیجوره گوچان هارون که قومچه کردوی و تەختەیل کوچگین پەێمان نریاوید.

⁵ وەبان سنویقەگه، فریشتەیل کەڕوبی ’جەڵاڵ‘ ساێەڕکی خوستوینه بان تەخت بەزەیی. ئیسه نیەتویەنیم وه وردیەو له باوەت ئی چشتیله قسیه بکێم.

⁶ وەشون ئەوه که گشت چشتێگ وەئی جوره ڕێک‎وپێک کریاد، کاهنيل هەمویشه چیانه ناو یەکم بەشەگه تا خزمەت خوێان وەجێ بارن.

⁷ وەلێ تەنیا کاهن گەورا چیاده ناو بەش دویم، ئەویشه تەنیا ساڵی یەێ جار و هەمویشەیش خوین قوروانی وەگەرد خوەێ داشت تا ئەڕا خوەێ و ئەڕا گونایلێ که قەوم نەزانسته کردوین، پیشکەش بکێ.

⁸ وەئیجوره روح‌القودوس نیشان دێ تا زەمانێگ که بەش یەکم هێمراێ بەردەوامه، ئەو ڕێه که وه موقەدەسترین شون چود هێمراێ واز نویه.

⁹ ئیه ئەڕا ئی دەورانه نیشانەیگه، وه پێ ئی ڕیکپێکیه، پیشکەشییل و قوروانییلی دریەنه تاویل که نیەتویەنن وژدان کەسێگ که پەرەسش کەید، وه تەمامی پاکەو بکەن،

¹⁰ بەڵکەم تەنیا وەگەرد خواردن و نوشاین و وەجێ هاوردن یاسایل جورواجور شوردن دینی سەرکار دێرن. یاسایلێ ئەڕا جەسه که تەنیا تا شرو ڕیک و پیکی تازەێگ که خودا دەێ، تیەرزیەن.

خوین مەسیح

¹¹ وەلێ وەختێگ مەسیح له جیگەێ کاهن گەوراێ ئەو چشتیل خاسه ئاشکرا بی که ئێرنگه هاتنەسه دی، چیەسه ناو دەوارێگ گەوراتر و کامڵتر که وه دەس ئایەم درس نەکریاس. یانێ هن ئی درسکریایه نیه.

¹² ئەیو یەێ جار ئەڕا هەمویشه چیەسه ناو موقەدەسترین شون، نه وەگەرد خوین بزنیل و گوریل، بەڵکەم وه خوین خوەێ، ویجوره ڕزگاری ئەبەدی وه دی هاورد.

¹³ چوینکه ئەگەر خوین بزنیل و گاێیل و پاشین خوڵەکەو پارێنه وه مل ئەوانه که ناپاکن، ئیانه تەقدیسەو کەید تا لەشیان پاکەو بود،

¹⁴ چەنێ فرەتر، خوین مەسیح که له ڕێ ئەو روح ئەبەدیه خوەێ بی نەخس وه خودا پیشکەش کرد، وژدان ئیمه له کاریل وەدەرد نەخوەر پاکەو کەید تا که خزمەت خوداێ زنی بکێم!

¹⁵ وه ئی بونه، مەسیح ناوجێکەر پەێمانێگ تازەس، تا ئەوانه که دەنگ کریانه بتویەنن میراتی ئەبەدی که وادەێ دریاس، بگرنەوەر. چوینکه مردنێگ ڕوی داس که ئەوانه له خەتایلێگ که وەناو پەێمان یەکم هەڵکەفت، ڕزگاری بەخشێد.

¹⁶ ئەڕا ئیه که وەختێ بود وەسیەتێگ وەجێ باری که مالوم بود وەسیەتکەرەگه مردگه،

¹⁷ ئەڕا ئیه که وەسیەت تەنیا وەشون مردن بود وه جێ باێد؛ چوینکه تا زەمانێگ که وەسیەتکەرەگه زنیه، نیود وه جێ باێد.

¹⁸ وه ئی بونه، تەنانەت پەێمان یەکمیش بێ خوین وه جێ نات.

¹⁹ چوینکه ئەو وەخته که موسای پەێخەمەر هەر کام له حوکمیل شەریعەت وه گشت قەومەگە جار دا، خوین گوریل و بزنیل گرد و وەگەرد ئاو و خوری سویەر و پەلیل دار زوفا، هەم وەبان خود تومار و هەم وەبان گشت قەومەگه پاشی

²⁰ و وەت: «ئیەسه خوین پەێمانێگ که خودا وه ئیوه حوکم کرد.»

²¹ هەر ئیجوره خوینەگه هەم پاشیه مل دەوار و هەم وه مل گشت دەفریلێگ که ئەڕا پەرەسش وه کار چیاد.

²² وه ڕاسی، بەنا وه شەریعەت، هەڵاێه گشت چشتێگ وەگەرد خوین پاکەو بود و بی ئەوه که خوینێگ بڕشێید، بەخشاین گونایل نیه.

²³ جا واجو بی ئەو چشتیلی که یەێ نمونه له چشتیل ئاسمانی بوین وەگەرد ئی قوروانیيله پاکەو بون، وەلێ خود چشتیل ئاسمانی وەگەرد قوروانییل خاستر له ئیانه پاکەو بون.

²⁴ چوینکه مەسیح نەچیه ناو موقەدەسترین شونێگ که وه دەس بەشەر درس کریاوی که نمونەێگ له چشتیل ڕاسەکانیه، بەڵکەم چیه ناو خود ئاسمان تا ئێرنگه له جێ ئیمه له لاێ خوداوه ئاشکرا بود.

²⁵ ویجوره نوی که خوەێ چەن جار جور قوروانی بێیده تاویل، هەر ئەو جور که کاهن گەورا هەرچێ ساڵه چوده ناو موقەدەسترین شون، ئەوەیشه وەگەرد خوینێگ که خوین خوەێ نیه.

²⁶ ئەڕا ئیه که ئەگەر ئیجوره بویاد، مەسیح باێه له وەخت دامەزراندن جهان، چەن جار رەنج کیشاوی. وەلێ هەر ئەوجورە که هەس ئەیو یەێ جار ئەڕا هەمویشه وه ئاخر گشت دەورەیل ئاشکرا بیه تا وەگەرد قوروانی کردن خوەێ، گونا له بین بوێد.

²⁷ هەر ئەوجورە که ئەڕا ئایەم یەێ جار مردن و لەشونی داوەری دیاری کریاس،

²⁸ مەسیحیش لەشون ئەوه که یەێ جار قوروانی بی تا گونایل قێر فرەێگ بگرێده سەر شانێ، دویم جار ئاشکراوه بود، نه ئەڕا پەرچەو کردن گونا، بەڵکەم تا ئەوانه که وه تاسەوه چەوەڕێ ئەوەن، نجات بێید.