عبرانییل 8 - کتاب مقدس به زبان کردی جنوبی - گویش کلهوری

کاهن گەوراێ پەێمان نو

¹ ئێرنگه گیان کەڵام وەناو ئەو چشته که ئویشیم، ئیەسه که ئیمه ئیجور کاهن گەوراێگ دێریم که وه لاێ ڕاس تەخت خوداێ گەورا وەناو ئاسمان دانيشتێه و

² خزمەتکار شونیل موقەدەسه، یانێ ئەو دەوار ڕاسەکانیەسه که خوداوەند هەڵێ‎دا، نه ئایەمیزاێ.

³ چوینکه هەر کاهن گەوراێگ ئەڕا تاویل داین پیشکەشییل و قوروانیيل دەسنیشان بود. وه ئی بونه، ئی کاهنیشه ئەڕاێ واجوه چشتێگ ئەڕا پیشکەش کردن بیاشتوید.

⁴ ئێرنگه ئەگەر ئەیو وەبان زەوی بی، بی خەڵاف کاهن نویاتیاد، چوینکه کاهنیل تر هەن که وه پێ شەریعەت پیشکەشییل دەنه تاویل.

⁵ ئەوانه تەنیا یە نمونه و ساێەڕکی چشتیل ئاسمانی خزمەت کەن. ئەڕا ئیه که وەختێگ موسای پەێخەمەر تواسیا دەوارەگه هەڵ بێید، خودا فەرمان دا پێ و فەرمایش کرد: «ئاگادار به که گشت چشتێگ هەر وه پێ نمونەێگ درس بکێ که وەبان کویه وه پێد نیشان دریاد.»

⁶ وەلێ خزمەتێگ که مەسیح پەێا کردێه، فره بانتر له خزمەت جارانه، ئەڕا ئیه که ئەیو وەسلەێ پەێمانێگ خاستره، پەێمانێگ که وەبان وادەیل خاستر نریاسه سەرپاوه.

⁷ چوینکه ئەگەر ئەو پەێمان یەکمه بی نەخس بویا هەوەجی نەوی پەێمانێگتر داوا بکرێی.

⁸ چوینکه خودا وەناوێان نەخسێگ پەێا کەید و فەرمایش کەید: «خوداوەند ئویشێد، بنوڕ ڕوژیلیگ رەسێد که مه وەگەرد بنەماڵەێ ئێسرائیل و بنەماڵەێ یەهودا پەێمانێگ نو بەسم.

⁹ نه جور پەێمانێگ که وەگەرد باپیریلێان بەسام، ئەو ڕوژه که دەسێان گردم تا له میلکان مسر دەرێان بارم؛ خوداوەند فەرمایش کەێد، چوینکه ئەوانه وه پێمان مه وەفادار نەمەنن. جا، لەلێان ڕوی هەڵوگەردانم.

¹⁰ خوداوەند فەرمایش کەی: چوینکه ئیەسه پەێمانێگ که وەشون ئەو ڕوژیله وەگەرد بنەماڵەێ ئێسرائیل بەسم. حوکمیل خوەم نەمه ناو زەین ئەوانه و وەبان دڵیان نویسمی. مه بومه خوداێ ئەوانه و ئەوانه بونه مەردم مه.

¹¹ کەسێگ وه هاوساگەێ خوەێ تالیم نێید و کەسێگ وه براێ خوەێ نیویشی، ”خوداوەند بناس!“ چوینکه گشت ئەوانه له وردو و زرو، مه ناسن،

¹² چوینکه لەنواێ خەتایلیان وه بەزەیێم و گونایلێانیش دیتر وه هویرم نیەتێەرم.»

¹³ خودا وەگەرد قسیه کردن له پەێمانێگ ’نو‘، پەێمان یەکمیەگه بی بایەخ کەید؛ ئەو چشته که بی بایەخ و کویەنه بود، ئەڕا له بین چین گورجه.