عبرانییل 7 - کتاب مقدس به زبان کردی جنوبی - گویش کلهوری

کاهنی ملکیسدق

¹ ئی ملکیسدقه، پادشاێ شار سالیم و کاهن خوداێ هەربەرز بی. وەختێ ئێبراهیم پەێخەمەر له شکەس داین پادشایل هاتیادەو، ملکیسدق تەقیاده پێ و بەەرکەتی دا و

² ئێبراهیم ده کوتی گشت چشتێگ پیشکەشێ کرد. ناو ئەوه یەکم جار وه ماناێ ’پادشاێ سالح بوینه‘ و وەشونیشێ ’پادشاێ سالیم‘، یانێ ’پادشاێ ئاشتی و سڵامەتیه‘.

³ ئی ملکیسدقه نه باوگ دێرێ و نه داڵگ و نه بنەچەک، ڕوژیل زنەیی نه سەرەتایی دێرێ و نه ئاخر، بەڵکەم وێنەێ کوڕ خوداس و تا ئەبەد کاهن مینێد.

⁴ بنوڕن که ئی پیا چ ئایەم گەوراێگ بی که ئێبراهیم باپیرمان، له غەنیمەتەگان دەکوتی داده پێ!

⁵ وه پێ حوکم شەریعەت، نەتەوەێ لاوی که بنه کاهن، باێه له قەوم جویلەکە که برایل ئەوانەنە دەکوتی بگرن، هەرچەن ئەوانیش له نەتەوەێ ئێبراهیمن.

⁶ وەلێ ئی ملکیسدقه که له نەتەوەێ ئەوانه نیه، له ئێبراهیم دەکوتی سەند و ئەوه بەەرکەت ئێبراهیم دا، ئێبراهیم که خاون وادەیل بی.

⁷ بێ گومان، بویچگترە که له گەوراگه بەەرکەت گری.

⁸ وه یەێ لاوه، کەسیلێ دەکوتی گرن که مرن؛ وەلێ وه یەێ لاترەو، کەسێگ که له باوەتێەو شاێەتی دریاس که زنیه، دەکوتی گری.

⁹ تەنانەت تویەنیم بویشیم که لاوییش که خوەێ دەکوتی گری، له ڕێ ئێبراهیم دەکوتی دا.

¹⁰ چوینکه وەختێ که ملکیسدق تەقیاده ئێبراهیمەو، لاوی هێمراێ له پشت باپیرێ بی.

ملکیسدق و عیسا جور یەکن

¹¹ ئێرنگه ئەگەر کەماڵ له ڕێ کاهنیل جیگەێ لاوی وه دەس باتیاد، چ هەوەجیگ داشت کاهنێگ تر وه جیگەێ ملکیسدق و نه وه جیگەێ هارون باێ؟ چوینکه شەریعەت له دەورەێ خزمەت کاهنیل لاوی دریاده قەوم جویلەکە.

¹² چوینکه وەختێ چشتێ وەناو خزمەت کاهنی بگوڕیەد، واجوه شەریعەتیش بگوڕیەد.

¹³ چوینکه کەسێگ که ئی چشتیله له باوەتێەو وەتریاس، وه هوز ترێگ تالوق دێرێ که له ئەو هوزه کەسێگ هەراێهەر وەناو قوروانگا خزمەت نەکردیه؛

¹⁴ چوینکه ئاشکراس که خوداوەندمان عیسا له نەتەوەێ یەهودا بی و موسای پەێخەمەر له باوەت ئەو هوزه باس کاهنی نەکرد.

¹⁵ له ئیەیشه ئاشکراتر ئیه که وەختێ کاهنێگ تر وێنەێ ملکیسدق تێد،

¹⁶ ئەوه نه وه پێ حوکم شەریعەتێگ که وه نەتەوەێ دریاد، بەڵکەم له ڕێ هێز زنەیێگ که له بین نیەچود، بوده کاهن.

¹⁷ چوینکه له باوەت ئەیو وەناو کتاو زەبور ئیجوره شاێەتی دریاس که: «تو تا ئەبەد کاهنید، یەێ کاهن له جیگەێ ملکیسدق.»

¹⁸ ئەڕا ئیه که له یەێ لا حوکم جاران نریاده لا، ئەڕا ئیه که بی هاز و وه دەرد نەخوەر بی،

¹⁹ چوینکه شەریعەت هویچ چشتێگ کامڵەو نەکرد؛ وەلێ له یەێ لاتریش ئمید خاسترێگ دریاده پێمان که له ڕێ ئەوه وه خودا نزیکەو بویمن.

²⁰ ئی کاره بێ قەسەم نوی! چوینکه ئەوانەیگ که وەرجەوە بینه کاهن، بێ قەسەم بینه کاهن،

²¹ وەلێ کاهنی ئیاکه وەگەرد قەسەمەو بی، وه وەسلەێ ئەوه که وەته پێ: «خوداوەند قەسەم خواردێه و فکریشێ نیەگوڕنێدەو که: ”تو تا ئەبەد کاهنید“.»

²² هەر ئیه عیسا کەێده زامن پەێمانێگ خاستر.

²³ ژمارەێ کاهنيل وەرجەوە فره فره بی، چوینکه مردن نوای خزمەت کردنێان گردیا.

²⁴ وەلێ چوینکه عیسا تا ئەبەد زنیه، بن کاهنی نیەتێی.

²⁵ جا عیسا تویەناس تا ئەوانه که له ڕێ ئەیو نزیک خودا بون، تا ئەبەد نجات بێی، ئەڕا ئیه که هەمویشه زنیه تا ئەڕاێان ناوجێ بکێ.

²⁶ ئەڕا ئیه که وه ڕاسی شایسه بی که ئیمه ئیجور کاهن گەوراێگ بیاشتویم، کاهنێگ قودوس، بێتاوان، بی لەک و پێس، جیا له گوناکاریل و له ئاسمانیل بەرزتر کریا.

²⁷ جور ئەو باقی کاهنيل گەورا، هەوەجی نێرید هەر چی ڕوژه، یەکم جار ئەڕا گونایل خوەێ و لەشونی ئەڕا گونایل قەوم، قوروانی پیشکەش بکێ. ئەڕا ئیه که یەێ جار ئەڕا هەمویشه ئی کاره کرد، وەختێ که خوەێ قوروانی کرد.

²⁸ چوینکه شەریعەت، ئایەمیل وەناو بی هازیان ئەڕا کاهنی گەورا دیاری کەی، وەلێ کەلیمەێ ئەو قەسەمه که وەشون شەریعەت هات، کوڕ که تا ئەبەد کامڵەو بیه، دیاری کەی.