عبرانییل 6 - کتاب مقدس به زبان کردی جنوبی - گویش کلهوری

¹ جا باین دەرسیل سەرەتایی له باوەت مەسیح بنێمنە پشت سەر، وەرەو بازڵه بوین بچیمنه نوا و یەێ جارتر بنەما نەنێیمنه مل ئیانه، یانێ مل توبه له کاریل وەدەرد‎نەخوەر و ئیمان وه خودا

² و تالیم له باوەت خوسڵیل تەعمید و دەس وه بان کەسێگ ناین و زنیەو بوین له مردگیل و موجازات ئەبەدی.

³ ئەگەر خودا هیشت، ئیجوریشه کەیمن.

⁴ چوینکه ئەوانەێ که یەێ جار وه نویر خودایی نویرانیەو بینه و تام ئەو خەڵاتی ئاسمانیه کردنه و وەناو روح‌القودوس بەشدارەو بینه

⁵ و تام خاسێ کەڵام خودا و هێزیل دەوران وەره ڕوی کردنه و

⁶ وەشونێ له ئیمان کەفتنه، مەحاڵ ئەوانه یەێ جارتر وەرەو توبه هاورد، ئەڕا ئیه که وه زیان خوێان، کوڕ خودا وه دواره کوتنه بان سەلیب و ئەیو وه نوای چەو گشت‎یەکی بی حرمەتەو کەن.

⁷ ئەگەر زەویێگ، وارانێگ که چەن جار وه بانێ واریەد هەڵمژنێد و ئەڕا کەسیلێ که وەبونەێ ئەوانه کاڵیاس خەلەی خاسێگ بیده دەس، له خودا بەەرکەت گرید.

⁸ وەلێ ئەگەر زەوی دڕگ و دواڵ دەێده دەس، هویچ نیەتیەرزێد و نزیکه که لانەت بکرێی، ئاخریشێ سزیانه.

⁹ ئێ عەزیزەیل، هەرچەن ئیجوره قسیه کیم، وەلێ له باوەت ئیوه دڵنیایم که چشتیل خاسترێگ، چشتیلی که هن نجاتن، نسیودان بون.

¹⁰ چوینکه خودا بی ئنساف نیه که کردەوەدان و مابەتێگ که وەبونەێ ناو ئەیو له خزمەت وه ئیمانداریل وه مەسیح نیشان داینه و هێمراێ نیشانیش دەین له هویرێ بچود.

¹¹ تاسەێ ئیمه ئیەسه که هەر کامدان هەر ئی غیرەته تا وه ئاخر نیشان بێین تا ئمیددان وه تەمامی وه دی باێ،

¹² تا لەمتی نوین، بەڵکەم له کەسیلێگ نمونه بگرن که له ڕێ ئیمان و سەور بونه میراتیخوەر وادەگان.

خودا وادەیل خوەێ بێده سەر

¹³ وەختێ که خودا وه ئێبراهیم پەێخەمەر واده دا، چوینکه کەسێگ گەوراتر له خود خودا نوی که قەسەم بخوەێده پێ، جا وه خوەێ قەسەم خوارد

¹⁴ و فەرمایش کرد: «بێ گومان بەەرکەتد دەم و نەتەوەد فرەوه کەم.»

¹⁵ وه ئیجوره، ئێبراهیم وه سەورەو چەوەڕێ بی و وادەگه گرد.

¹⁶ ئەڕا ئیه که مەردم وه چشتێگ گەوراتر له خوێان قەسەم خوەن و وەناو گشت دەمقاڵیلیان قسیەێ ئاخر قەسەمیگه تا مور بکرێی.

¹⁷ هەر ویجوره، خودا وەختێگ تواس ئامانج نەگوڕیای خوەێ وه میراتیخوەریل واده خاس ئاشکرا بکێد، ئەوه وەگەرد قەسەمەو زەمانەت کرد،

¹⁸ تا له ڕێ دو چشت نەگوڕیای، که مەحاڵ خودا له باوەت ئەوانه درو بویشێد، ئیمه فره دڵگەرمەو بویمن، ئیمه که ئەڕا پەنا بردن هەێوایمنه تا ئمیدێگ که له وەر دەم ئیمه نریاس، قورس بلچکێیم.

¹⁹ ئی ئمیده، هەر چماێ لەنگەرێگ دڵنیا و قورس ئەڕا گیان ئیمەس، ئمیدێگ که چوده ئەو لاێ پەردەێ دەوار، وه قودس‌الاقداس،

²⁰ شونێگ که عیسا هەر جور نواکیش ئیمه و له جێ ئیمه، چیەسه ناو؛ هەر ئەیو که بیەسه کاهن گەوراێ ئەبەدی، له جیگەێ ملکیسدق.