عبرانییل 5 - کتاب مقدس به زبان کردی جنوبی - گویش کلهوری

¹ چوینکه هەر کاهن گەوراێگ که له بین ئایەمیل هەڵوژارێید، دەسنیشان کرێید تا وەناو کاروباریل خودا له جێ ئایەمیل کار بکێ تا پیشکەشییل و قروانیيل ئەڕا گونایل بێیده تاویل.

² ئەوه تویەنێ وه نەرمی وەگەرد ئەوانه که نەزان و گومڕان ڕێ رەوشت بکێ، چوینکه خویشێ تویش بی هازیه.

³ وه ئی بونه، ها ملێ هەر ئەوجورە که ئەڕا گونایل مەردم قوروانی پیشکەش کەی، ئەڕا گونایل خویشێ قوروانی پیشکەش بکەی.

⁴ هویچکەسێگ خوەێ ئی شانازی کاهن گەورا بوینه نیەکەێده هن خوەێ، بەڵکەم ئی شانازیه تەنیا زەمانێگ بوده نسیو کەسێگ که خودا ئەو ئایەمه دەنگ بکەی، هەر ئەوجورە که هارون دەنگ کرد.

⁵ مەسیحیش خوەێ بەرزەو نەکرد تا بوده کاهن گەورا، بەڵکەم له لاێ کەسێگ دیاری کریا که وەپێ وەت: «توی کوڕ منید؛ ئیمڕو، مه بیمەسه باوگد.»

⁶ هەر ئەوجورە که له یەێ جێ تریش فەرمایش کەید: «تو تا ئەبەد کاهنی، یەێ کاهن له جیگەێ ملکیسدق.»

⁷ عیسا له ڕوژیل زنەیی خوەێ وه بان زەوی، وەگەرد هاواریل بەرز و ئەسریل وه دەرگاێ خودا که تویەناێ نجات داینێ له مردن داشت، دوعا کرد و لاڵکیاد و وەبونەێ گوش تەکانن تەمامی، دوعاگەی قەبوڵ کریا.

⁸ هەر چەن ئەیو کوڕ بی، وه ڕێ رەنجێگ که کیشاد گوش تەکانن یاێ گرد.

⁹ وەختێ کامڵەو بی، ئەڕا گشت ئەوانەیش که له ئەیو گوش تەکنن، بیه سەرچاوەی نجات ئەبەدی.

¹⁰ جا له لاێ خوداوه دەسنیشان کریاد تا بوده کاهن گەورا، یەێ کاهن له جیگەێ ملکیسدق.

هەڕەشه له باوەت کەفتن له ئیمان

¹¹ له ئی باوەته، چشتیل فرەێگ ئەڕا وەتن دێریم، وەلێ شیو کردنێان سەخته، ئەڕا ئیه که گوشيلدان سەنگینەو بیه.

¹² ئەڕا ئیه که وی حاڵەو که تا ئیسه باێه ماموستا بویاین وه ئیه هەوەجی دێرین کەسێگ بیروڕایل سەرەتایی کەڵام خودا یەێ جارتر نیشاندان بێید. ئیوه وه شیر هەوەجی دێرین، نه خواردمەنی وه قەوەت!

¹³ هەر کەسێگ که شیرخوەره، ناو کەڵام سالح بوین تەجربه نێری، چوینکه ئەوه مناڵەکوڕپەس.

¹⁴ وەلێ خواردەمەنی وه قەوەت هن بازڵەیله هن ئەوانه که هێز هەڵسەنگاننیان، وەگەرد تەمرینیل هەمویشەێ جوری پەروەرده کردنه که خاس و خراو له یەک جیا بکەن.